Leximet e ditës

JAVA E XXVII GJATË VITIT

E MARTË

Antifona e hyrjes Krh. Est 4, 17

Gjithçka, o Zot, është në dorën tënde dhe askush s’mund t’i kundërshtojë vullnetit tënd. Ti ke krijuar çdo gjë: qiellin e tokën, të gjitha mrekullitë që i përfshin kupa qiellore. Ti je Zotëruesi i të gjithave.

Kolekta

O Hyj i gjithëpushtetshëm dhe i amshuar, mirësia jote i tejkalon meritat dhe dëshirat tona: ki mëshirë për ne, na fal çka ndërgjegjja jonë na padit, e shto ato që lutja jonë nuk i përfshin. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Gal 1, 13-24) (fq. 1640)

Hyji e zbuloi në mua Birin e vet për ta shpallur ndër paganë.

Lexim prej Letrës së Shën Palit apostull drejtuar Galatasve

Vëllezër, ¹³ keni dëgjuar sigurisht për sjelljen time të dikurshme në judaizëm: si e salvoja mbi çdo masë Kishën e Hyjit dhe u mundoja ta shkretoj atë ¹⁴ e, prejse tepër i dhënë mbas traditave të të parëve të mi, i tejkalova në judaizëm shumicën e moshatarëve në kombin tim.

¹⁵ Porse, kur Atij, që më zgjodhi qysh në kraharorin e nënës dhe më thirri me hirin e vet, i pëlqeu ¹⁶ ta zbulojë në mua Birin e vet për ta shpallur ndër paganë ‑ unë, menjëherë, pa u këshilluar me asnjë njeri ¹⁷ e pa u ngjitur aspak në Jerusalem te ata që para meje ishin apostuj, shkova në Arabi dhe përsëri u ktheva në Damask.

¹⁸ E vetëm pas tri vjetësh u ngjita në Jerusalem, për t'u njoftuar me Kefën e ndenja te ai pesëmbëdhjetë ditë. ¹⁹ Të tjerë prej apostujsh, përveç Jakobit, të vëllait të Zotit, nuk pashë asnjë. ²⁰ Për çka po ju shkruaj betohem para Hyjit se nuk ju gënjej.

²¹ Pastaj kalova në krahinat e Sirisë e të Cilicisë. ²² Personalisht isha i panjohur Kishave të Krishtit në Jude. ²³ Ato vetëm kishin dëgjuar: "Ai që dikur na salvonte, tani shpall fenë që dikur e shkretonte, "²⁴ dhe e lavdëronin Hyjin për shkak tim.

Fjala e Zotit

Psalmi 139 (138), 1b-3.13-14ab.14c-15 (fq. 819)

Ref. Më udhëheq, o Zot, në udhën e përjetësisë.

¹O Zot, ti më shqyrton e më njeh,

² ti di kur rri e kur ngritem,

prej së largu i njeh mendimet e mia.

³ Si në shtegtoj si në pushoj, ti më vëren,

ti i di të gjitha udhët e mia.

Ref. Më udhëheq, o Zot, në udhën e përjetësisë.

¹³ Ti je ai që m'i krijove veshkat,

ti më ke endur në kraharorin e nënës!

¹⁴ Të lavdëroj pse më krijove kaq mrekullisht,

të mrekullueshme janë veprat e tua.

Ref. Më udhëheq, o Zot, në udhën e përjetësisë.

¹⁴Të mrekullueshme janë veprat e tua,

po, shpirti im mirë e di!

¹⁵Eshtrat e mi nuk të mbetën të fshehur

kur unë po trajtohesha në fshehtësi

i endur në thellësinë e tokës.

Ref. Më udhëheq, o Zot, në udhën e përjetësisë.

Aleluja!

Të lumtë ata që e dëgjojnë fjalën e Hyjit dhe e zbatojnë me dashuri. (krh. Lk 11, 28)

Aleluja!

Ungjilli (Lk 10, 38-42) (fq. 1479)

Marta e priti Jezusin në shtëpi. Maria zgjodhi pjesën më të mirën që nuk do t'i merret.

Leximi i Ungjillit të shenjtë sipas Lukës

Në atë kohë, ³⁸ Jezusi hyri në një fshat dhe një grua, me emër Martë, e priti në shtëpi.

³⁹ Ajo kishte një motër që quhej Mari. Kjo iu ul Zotërisë te këmbët dhe dëgjonte fjalën e tij.

⁴⁰ Marta, e zënë krejtësisht me punët e shërbimit të pritjes, iu afrua e i tha: »Zotëri, a nuk po të duket rëndë që motra ime më la krejt vetëm të shërbej? Thuaj, pra, të më ndihmojë!« ⁴¹ »Martë, Martë - iu përgjigj Zotëria - ti po brengosesh dhe po shqetësohesh për shumë gjëra, e pra ⁴² e nevojshme është vetëm një. Vërtet Maria zgjodh pjesën më të mirën që nuk do t'i merret.«

Fjala e Zotit

Lutja mbi dhurata

Pranoje, o Zot, flinë e themeluar prej teje dhe bëj që shërbesa e këtyre mistereve, që po e kremtojmë sipas urdhrit tënd, ta plotësojë shëlbimit tënd dhe të na shenjtërojë. Nëpër Krishtin Zotin tonë.

Antifona e kungimit Vaj 3, 25

I mirë është Zoti për ata që shpresojnë në të, ndaj shpirtit që e kërkon.

Ose: Krh. 1 Kor 10, 17

Edhe pse jemi shumë, jemi një trup i vetëm, sepse të gjithë marrim pjesë në një bukë e në një kelk.

Lutja pas kungimit

O Hyj i gjithëpushtetshëm, bëj që të gjithë ne, pasi e morëm këtë sakrament si ushqim dhe pije shpirtërore, të shndërrohemi në atë që kemi marrë. Nëpër Krishtin Zotin tonë.