Leximet e ditës

JAVA E XXVII GJATË VITIT

E ENJTE

Antifona e hyrjes Krh. Est 4, 17

Gjithçka, o Zot, është në dorën tënde dhe askush s’mund t’i kundërshtojë vullnetit tënd. Ti ke krijuar çdo gjë: qiellin e tokën, të gjitha mrekullitë që i përfshin kupa qiellore. Ti je Zotëruesi i të gjithave.

Kolekta

O Hyj i gjithëpushtetshëm dhe i amshuar, mirësia jote i tejkalon meritat dhe dëshirat tona: ki mëshirë për ne, na fal çka ndërgjegjja jonë na padit, e shto ato që lutja jonë nuk i përfshin. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Gal 3, 1-5) (fq. 1641/2)

Filluat me Shpirtin Shenjt e po mbaroni me trup!

Lexim prej Letrës së Shën Palit apostull drejtuar Galatasve

¹ Po kush, o galatas të pamend, jua mori mendtë, kurse para syve tuaj Jezu Krishti u përshkrua i kryqëzuar?

² Vetëm kaq dua të di prej jush: a e morët Shpirtin Shenjt në saje të veprave të Ligjit, apo pse e pranuat fenë? ³ Po a kaq të marrë jeni?! Filluat me Shpirtin Shenjt e të mbaroni me trup?! ⁴ Po a thua kot i përjetuat të gjitha këto gjëra? Oh të kishin qenë kot!

⁵ Po a thua se Ai që ju jep Shpirtin Shenjt dhe bën ndër ju vepra të mrekullueshme, i bën këto pse ju i kryeni veprat e Ligjit e jo pse e keni dëgjuar Mësimin e fesë?

Fjala e Zotit

Psalmi Lk 1, 69-70.71-72.73-75 (fq. 1460)

Ref. Qoftë bekuar Zoti, Hyji i Izraelit, sepse e vizitoi popullin e vet.

⁶⁹ Ai e ngriti Shpëtimtarin tonë

në shtëpinë e Davidit, shërbëtorit të vet,

⁷⁰ sikurse premtoi kaherë

me gojë të profetëve të tij të shenjtë.

Ref. Qoftë bekuar Zoti, Hyji i Izraelit, sepse e vizitoi popullin e vet.

⁷¹ Se do të na shpëtojë prej armiqve tanë

dhe prej dorës së të gjithë atyre që na urrejnë;

⁷² se do të bëjë mirësinë që ua premtoi etërve tanë

e do t’i bjerë në mend Besëlidhja e tij e shenjtë.

Ref. Qoftë bekuar Zoti, Hyji i Izraelit, sepse e vizitoi popullin e vet.

⁷³ E betimi që bëri në dobi të Abrahamit, atit tonë,

se do të na e bëjë të mundshme

⁷⁴ t’i shërbejmë pa frikë, të çliruar nga duart e armikut

⁷⁵ në shenjtëri e drejtësi para tij për çdo ditë të jetës sonë.

Ref. Qoftë bekuar Zoti, Hyji i Izraelit, sepse e vizitoi popullin e vet.

Aleluja!

Hapi, o Zot, zemrat tona që t’i pranojmë fjalët e Birit tënd. (krh. Vap 16, 14b)

Aleluja!

Ungjilli (Lk 11, 5-13) (fq. 1479)

Kërkoni e do të gjeni.

Leximi i Ungjillit të shenjtë sipas Lukës

Në atë kohë Jezusi u tha nxënësve të vet: ⁵»Nëse ndonjëri prej jush ka një mik dhe i shkon në mesnatë e i thotë: 'Mik, m'i jep hua tri bukë ⁶ se më erdhi prej udhe miku im e nuk kam çka t'i jap për darkë,' ⁷ e ai prej brenda iu përgjigj: 'Mos më trazo! Dera është tashmë e mbyllur e fëmijët e mi e unë ramë në shtrat! Nuk mund të çohem t'i jap!' - ⁵ Unë po ju them edhe nëse s'çohet t'ia japë pse e ka mik, do të çohet me siguri për t'i dhënë aq sa kërkon për shkak të trazimit.

⁹ Edhe unë po ju them: lypni e do t'ju jepet, kërkoni e do të gjeni, trokëllitni e do t'ju çelet. ¹⁰ Sepse, kushdo lyp, merr; kush kërkon, gjen; atij që trokëllit, i hapet dera.

¹¹ Dhe, cili prej jush që është baba, po i lypi djali, peshk, në vend të peshkut do t'i japë gjarpër? ¹² Ose, nëse i lyp vezë, do t'i japë akrep?

¹³ Nëse, pra, ju, edhe pse të këqij, dini fëmijëve tuaj t'u jepni dhurata të mira, sa më tepër Ati qiellor do t'u japë Shpirtin Shenjt atyre që ia kërkojnë!«

Fjala e Zotit

Lutja mbi dhurata

Pranoje, o Zot, flinë e themeluar prej teje dhe bëj që shërbesa e këtyre mistereve, që po e kremtojmë sipas urdhrit tënd, ta plotësojë shëlbimit tënd dhe të na shenjtërojë. Nëpër Krishtin Zotin tonë.

Antifona e kungimit Vaj 3, 25

I mirë është Zoti për ata që shpresojnë në të, ndaj shpirtit që e kërkon.

Ose: Krh. 1 Kor 10, 17

Edhe pse jemi shumë, jemi një trup i vetëm, sepse të gjithë marrim pjesë në një bukë e në një kelk.

Lutja pas kungimit

O Hyj i gjithëpushtetshëm, bëj që të gjithë ne, pasi e morëm këtë sakrament si ushqim dhe pije shpirtërore, të shndërrohemi në atë që kemi marrë. Nëpër Krishtin Zotin tonë.