Leximet e ditës

JAVA E XXVIII GJATË VITIT

 

E SHTUNË

 

Antifona e hyrjes Ps 129, 3-4

 

Nëse do t’i mbash mend paudhësitë, o Zot, o Zot, e kush do të qëndrojë para teje? Por te Ti gjendet falja, o Hyj i Izraelit.

 

Kolekta

 

Na priftë, o Zot dhe na shoqëroftë përherë hiri yt dhe vazhdimisht na bëftë të kujdesshëm të kryejmë vepra të mira. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ef 1, 15-23) (fq. 1647)

 

E vendosi Krishtin si Krye të Kishës, e cila është Trupi i tij.

 

Lexim prej Letrës së Shën Palit apostull drejtuar Efesianëve

 

Vëllezër, ¹⁵ qysh se dëgjova për fenë tuaj në Jezusin Zot dhe për dashurinë ndaj të gjithë shenjtërve, ¹⁶ nuk pushoj të falënderohem për ju e t'ju kujtoj në lutje të mia, ¹⁷ që Hyji i Zotit tonë Jezu Krishtit, Ati i Lavdisë, t'ju japë Shpirtin e dijes e të zbulesës për ta njohur Atë; ¹⁸ t'ju japë syve të zemrës suaj dritë, që të mund ta kuptoni shpresën e madhe që e jep thirrja e tij, begatinë e pakufishme të trashëgimit të tij ndër shenjtër, ¹⁹ dhe madhërinë e pamasë të fuqisë së tij ndaj nesh që besojmë, të matur sipas veprimtarisë së pushtetit dhe forcës së Tij, ²⁰ të cilën e tregoi me vepër në Krishtin duke e ngjallur nga të vdekurit dhe duke e vendosur në të djathtën e vet në qiell, ²¹ mbi çdo Principatë, Pushtet, Fuqi, Zotërim dhe mbi çdo emër që mund të përmendet jo vetëm në këtë, por edhe në botën e ardhshme. ²² Dhe çdo gjë vuri nën këmbët e tija e Atë e vendosi mbi çdo gjë ‑ për Krye të Kishës, ²³ e cila është Trupi i tij, plotësimi i Atij që plotëson gjithçka në të gjithë.

 

Fjala e Zotit

 

Psalmi 8, 2-3ab.4-5.6-7 (fq. 665)

 

Ref. O Atë, ti e vendose Birin mbi çdo gjë.

 

² O Zot, Zoti ynë,

sa i mrekullueshëm është Emri yt mbi mbarë dheun!

Me madhëri e tejkalon edhe qiellin!

³ Prej gojës së ferishteve e të foshnjave.

 

Ref. O Atë, ti e vendose Birin mbi çdo gjë.

 

⁴ Kur e sodis qiellin - veprën e gishtave të tu,

hënën e yjet që ti u dhe qendër,

⁵ çka është atëherë njeriu që ta kujtosh,

biri i Adamit që të përkujdesesh për të?

 

Ref. O Atë, ti e vendose Birin mbi çdo gjë.

 

⁶ E pra, e bëre pak më të vogël se engjëjt,

e kurorëzove me lavdi e shkëlqim,

⁷ i dhe pushtet mbi veprat e duarve të tua.

Gjithçka vure nën këmbët e tij.

 

Ref. O Atë, ti e vendose Birin mbi çdo gjë.

 

Aleluja!

Shpirti i së vërtetës do të dëshmojë për mua, por edhe ju do të dëshmoni për mua thotë Krishti. (Gjn 15, 26b.27a)

Aleluja!

 

Ungjilli (Lk 12, 8-12) (fq. 1482)

 

Shpirti Shenjt në atë orë do t'ju mësojë çka duhet të thoni.

 

Leximi i Ungjillit të shenjtë sipas Lukës

 

Në atë kohë Jezusi u tha nxënësve të vet: ⁸»Unë po ju them: kushdo të dëshmojë para njerëzve se është imi, edhe Biri i njeriut do ta dëshmojë se është i tij para engjëjve te Hyjit. ⁹ E ai që të më bjerë mohit para njerëzve, edhe atij do t'i bihet mohit para engjëjve të Hyjit.

¹⁰ Kushdo të thotë ndonjë fjalë kundër Birit të njeriut, ka për t'iu falur, por kush të shajë Shpirtin Shenjt, nuk do të ketë falje.

¹¹ Mandej, kur t'ju qesin para sinagogave, para ushtruesve të drejtësisë e para pushteteve, mos u shqetësoni se si do të mbroheni e çka do të thoni: ¹² sepse Shpirti Shenjt në atë orë do t'ju mësojë çka duhet të thoni.«

 

Fjala e Zotit

 

Lutja mbi dhurata

 

Pranoji, o Zot, bashkë me lutjet e besimtarëve, edhe flitë e kushtuara, që me përkushtinë ndaj shërbesës së shenjtë, të kalojmë në lumturinë qiellore. Nëpër Krishtin Zotin tonë.

 

Antifona e kungimit Krh. Ps 33, 11

 

Pasanikët u varfëruan dhe patën uri, ndërsa ata që kërkojnë Zotin do të kenë çdo të mirë.

 

Ose: 1 Gjn 3, 2

 

Kur Zoti të shfaqet, do të bëhemi të ngjashëm me të, sepse do ta shohim ashtu si është.

 

Lutja pas kungimit

 

Po të lutemi me përvujtëri, o Zot, që sikurse na ushqen me Trupin e Gjakun e shenjtë, ashtu edhe na bëj pjesëtarë të natyrës hyjnore. Nëpër Krishtin Zotin tonë.