Leximet e ditës

JAVA E XXIX GJATË VITIT

 

E MARTË

 

Antifona e hyrjes Krh. Ps 16, 6.8

 

Të thirra në ndihmë, o Hyj, e Ti vështrove; ma vër veshin e dëgjo fjalët e mia. Më ruaj porsi beben e syrit; më mbroj nën hijen e krahëve të tu.

 

Kolekta

 

O Hyj i gjithëpushtetshëm dhe i amshuar, bëj që gjithmonë ta kryejmë me përkushti vullnetin tënd dhe t’i shërbejmë madhërisë sate me zemër të sinqertë. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ef 2, 12-22) (fq. 1648)

 

Krishti është Paqja jonë, Ai që prej dy popujve bëri një.

 

Lexim prej Letrës së Shën Palit apostull drejtuar Efesianëve

 

Vëllezër, ¹² le t'ju bjerë në mend se në atë kohë ishit pa Mesinë, të përjashtuar nga nënshtetësia e Izraelit, të huaj për Besëlidhjet e premtimit, ishit të pashpresë e të patenzot në botë. ¹³ Por tani, në Jezu Krishtin, ju që ishit 'larg' erdhët 'ngjat' ‑ në saje të gjakut të Krishtit.

¹⁴ Përnjëmend Ai është Paqja jonë, Ai që prej dy popujve bëri një e përmbysi murin ndarës domethënë armiqësinë ‑ në trupin e vet. ¹⁵ Ai e shfuqizoi Ligjin e urdhërimeve me të gjitha rregulloret, me qëllim që prej dyve: paganëve e hebrenjve, të trajtonte në vetvete një njeri të ri e, duke vendosur paqen, ¹⁶ të dy t'i pajtonte në një trup me Hyjin me anë të kryqit duke e asgjësuar në vetvete armiqësinë. ¹⁷ E prandaj erdhi t'ju kumtojë paqen juve që ishit larg, paqen edhe atyre që ishin ngjat. ¹⁸ Në sajë të tij, pra, si njëra palë ashtu edhe tjetra, kemi të drejtë të dalim para Atit në fuqi të të njëjtit Shpirt Shenjt.

¹⁹ Prandaj, nuk jeni më të huaj e mërgimtarë, por jeni bashkëqytetarë të shenjtërve dhe anëtarë të familjes së Hyjit, ²⁰ të ndërtuar mbi themelin e vërtetë që janë apostujt e profetët, ku guri i këndit që mban gjithçka, është vetë Jezusi Mesi. ²¹ Në Të mbarë ndërtesa është e lidhur dhe rritet në tempull të shenjtë në Zotin. ²² Në të edhe ju jeni bërë pjesë e ndërtesës së përbashkët që të bëheni në Shpirtin Shenjt banesë e Hyjit.

 

Fjala e Zotit

 

Psalmi 85 (84), 9ab-10.11-12.13-14 (fq. 755)

 

Ref. Ti, o Zot, je paqja jonë.

 

⁹ Do të dëgjoj çka thotë Zoti Hyj,

ai premton paqe për popullin e vet.

¹⁰ Shpëtimi i tij është ngjat atyre që e druajnë,

lavdia e tij do të banojë në vendin tonë.

 

Ref. Ti, o Zot,  je paqja jonë.

 

¹¹ Dashuria dhe e vërteta do të përpiqen,

drejtësia e paqja do të merren ngrykë.

¹² E vërteta do të mbijë nga toka

e drejtësia do të shikojë prej qiellit.

 

Ref. Ti, o Zot,  je paqja jonë.

 

¹³ Sepse Zoti ka për të dhënë çdo të mirë

edhe toka jonë do ta japë frytin e vet.

¹⁴ Drejtësia do t'i shkojë përpara

dhe do t'u tregojë udhën hapave të tij.

 

Ref. Ti, o Zot,  je paqja jonë.

 

Aleluja!

Rrini zgjuar e lutuni në çdo moment, që të mund të qëndroni para Birit të Njeriut. (Lk 21, 36)

Aleluja!

 

Ungjilli (Lk 12, 35-38) (fq. 1482/3)

 

Lum shërbëtorët që, kur kthehet zotëria, i gjen zgjuar!

 

Leximi i Ungjillit të shenjtë sipas Lukës

 

Në atë kohë, Jezusi u tha nxënësve të vet:

³⁵ »Jini gati - të veshur e të ngjeshur me llamba të ndezura - ³⁶ porsi ata që presin zotërinë e vet kur kthehet prej dasmës për t'ia çelur derën posa të vij e të trokëllitë.

³⁷ Lum shërbëtorët që, kur kthehet zotëria, i gjen zgjuar! Përnjëmend po ju them: ai vetë do të ngjeshet, ata do t'i ulë në tryezë do të afrohet dhe vetë do t'i shërbejë.

³⁸ Po erdhi në të dytën ose në të tretën rojë të natës dhe po i gjeti kështu, lum ata!

 

Fjala e Zotit

 

Lutja mbi dhurata

 

Bëj, po të lutemi, o Zot, t’u shërbejmë denjësisht dhuratave të tua, kështu që misteret e tua, të cilave u shërbejmë, të na pastrojnë me hirin tënd. Nëpër Krishtin Zotin tonë.

 

Antifona e kungimit Krh. Ps 32, 18-19

 

Sytë e Zotit janë mbi ata që e druajnë, mbi ata që shpresojnë në mirësinë e tij, për t’i shpëtuar nga vdekja, për t’i ushqyer në kohën e urisë.

 

Ose: Mk 10, 45

 

Biri i njeriut erdhi që të japë jetën e vet si shëlbim për shumë njerëz.

 

Lutja pas kungimit

 

Bëj, po të lutemi, o Zot, të na vlejë kremtimi i mistereve qiellore, që të nxjerrim ndihmë prej të mirave të përkohshme dhe të drejtohemi nga të mirat e amshuara. Nëpër Krishtin Zotin tonë.