Leximet e ditës

JAVA E XXIX GJATË VITIT

 

E ENJTE

 

Antifona e hyrjes Krh. Ps 16, 6.8

 

Të thirra në ndihmë, o Hyj, e Ti vështrove; ma vër veshin e dëgjo fjalët e mia. Më ruaj porsi beben e syrit; më mbroj nën hijen e krahëve të tu.

 

Kolekta

 

O Hyj i gjithëpushtetshëm dhe i amshuar, bëj që gjithmonë ta kryejmë me përkushti vullnetin tënd dhe t’i shërbejmë madhërisë sate me zemër të sinqertë. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Ef 3, 14-21) (fq. 1649)

 

Të rrënjosur e të themeluar në dashuri jeni të mbushur me tërë plotësinë e Hyjit.

 

Lexim prej Letrës së Shën Palit apostull drejtuar Efesianëve

 

Fëmijëzit e mi, ¹⁴ i përkuli gjunjët e mi para Atit, ¹⁵ prej të Cilit merr emrin e vet çdo atëri në qiell e mbi tokë, ¹⁶ që të denjohet, në saje të begatisë së Lavdisë së vet, t'ju forcojë me anë të Shpirtit të vet në fuqi për të mirën e njeriut të brendshëm, ¹⁷ që Krishti të banojë në zemrat tuaja me anë të fesë në mënyrë që, të rrënjosur e të themeluar në dashuri, ¹⁸ të mund ta kuptoni bashkë me të gjithë shenjtërit çka është Gjerësia, Gjatësia, Lartësia dhe Thellësia ^l9 e ta merrni vesh dashurinë e Krishtit që kapërcen çdo dije, kështu që të mbusheni me tërë plotësinë e Hyjit.

²⁰ E Atij, që, në saje të fuqisë që vepron në ne, mund të bëjë shumë më tepër se ne mund të kërkojmë ose edhe mund të mendojmë, ²¹ Atij i qoftë Lavdia në Kishë e në Jezu Krishtin në të gjitha breznitë e jetës së jetëve. Amen.

 

Fjala e Zotit

 

Psalmi 33 (32), 1-2.4-5.11.12.18-19 (fq. 692)

 

Ref. Plot është toka me dashurinë e Zotit.

 

Galdoni, o të drejtë në Zotin,

të drejtëve u ka hije lavdërimi!

² Lavdërojeni Zotin me kitarë,

bini gëzueshëm lirës me dhjetë korda!

 

Ref. Plot është toka me dashurinë e Zotit.

 

⁴ Sepse e drejtë është fjala e Zotit

e të gjitha veprat e tij me besë.

⁵ Ai e do drejtësinë e gjyqin,

plot është toka me mirësinë e Zotit.

 

Ref. Plot është toka me dashurinë e Zotit.

 

¹¹ Synimi i Zotit qëndron për amshim,

mendimet e zemrës së tij prej breznie në brezni.

¹² Lum ai komb që për Hyj e ka Zotin,

populli që Zoti e zgjodhi për pronë.

 

Ref. Plot është toka me dashurinë e Zotit.

 

¹⁸ Qe, sytë e Zotit janë mbi ata që e druajnë,

mbi ata që shpresojnë në mirësinë e tij:

¹⁹ për t'i shpëtuar nga vdekja

e për t'i ushqyer në kohën e urisë.

 

Ref. Plot është toka me dashurinë e Zotit.

 

Aleluja!

Kam bjerrë çdo gjë dhe të gjitha i çmoj si llom, me qëllim që të fitoj Krishtin ⁹ dhe të gjendem në Të. (Fil 3, 8-9)

Aleluja!

 

Ungjilli (Lk 12, 49-53) (fq. 1483)

 

Nuk erdha të sjell paqen mbi tokë, por përçarjen!

 

Leximi i Ungjillit të shenjtë sipas Lukës

 

Në atë kohë, Jezusi u tha nxënësve të vet: ⁴⁹ »Erdha të sjell zjarrin mbi tokë e sa dëshiroj të ishte tashmë i ndezur flakë! ⁵⁰ E po, më duhet të pagëzohem me pagëzim, e sa ngushtë jam derisa të kryhet!

⁵¹ A kujtoni se erdha të sjell paqen mbi tokë? Jo, po ju them, por përçarjen! ⁵² Qysh tash, për të vërtetë, pesë anëtarë në një shtëpi, do të jenë të ndarë: tre kundër dyve e dy kundër treve: ⁵³ Babai do të zihet me djalë, e djali me babanë, nëna me bijën, e bija me nënën, vjehrra me renë e reja me vjehrrën.«

 

Fjala e Zotit

 

Lutja mbi dhurata

 

Bëj, po të lutemi, o Zot, t’u shërbejmë denjësisht dhuratave të tua, kështu që misteret e tua, të cilave u shërbejmë, të na pastrojnë me hirin tënd. Nëpër Krishtin Zotin tonë.

 

Antifona e kungimit Krh. Ps 32, 18-19

 

Sytë e Zotit janë mbi ata që e druajnë, mbi ata që shpresojnë në mirësinë e tij, për t’i shpëtuar nga vdekja, për t’i ushqyer në kohën e urisë.

 

Ose: Mk 10, 45

 

Biri i njeriut erdhi që të japë jetën e vet si shëlbim për shumë njerëz.

 

Lutja pas kungimit

 

Bëj, po të lutemi, o Zot, të na vlejë kremtimi i mistereve qiellore, që të nxjerrim ndihmë prej të mirave të përkohshme dhe të drejtohemi nga të mirat e amshuara. Nëpër Krishtin Zotin tonë.