Leximet e ditës

JAVA E XXX GJATË VITIT

E MARTË

Antifona e hyrjes Krh. Ps 104, 3-4

Le të galdojë zemra e atyre që kërkojnë Zotin. Kërkoni Zotin dhe fuqinë e tij, gjithmonë kërkoni fytyrën e tij.

Kolekta

O Hyj i gjithëpushtetshëm dhe i amshuar, shtoje në ne fenë, shpresën e dashurinë dhe, për të fituar çka na premton, bëj të duam çka na urdhëron. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Ef 5, 21-33) (fq. 1651)

Ky mister është i madh: e kam fjalën në lidhjen e Krishtit me Kishën.

Lexim prej Letrës së Shën Palit apostull drejtuar Efesianëve

Vëllezër, ²¹ nënshtrohuni njëri‑tjetrit në frikën e Krishtit! ²² Gratë le t'u binden burrave të vet sikurse Zotit. ²³ Sepse burri është kryet e gruas sikurse edhe Krishti është kryet e Kishës ‑ Ai, Shëlbuesi i Trupit. ²⁴ Pra, sikurse Kisha i nënshtrohet Krishtit, ashtu edhe gratë le t'u binden burrave të vet në gjithçka.

²⁵ Ju, o burra, doni gratë tuaja sikurse Krishti e ka dashur Kishën dhe e ka flijuar vetveten për të ²⁶ për ta bërë të shenjtë duke e pastruar me lamje dhe me fjalë, ²⁷ që ta bënte gati për vete një Kishë të lavdishme, të panjollë, të parrudhë, pa ndonjë send si këto, të jetë e shenjtë dhe e patëmetë. ²⁸ Në këtë mënyrë duhet që edhe burrat t'i duan gratë e veta ‑ porsi trupin e vet. Kush e do gruan e vet, do vetveten. ²⁹ Sepse askurrë askush nuk e urren trupin e vet, por e ushqen dhe kujdeset për të, porsi Krishti për Kishën. ³⁰ Sepse jemi gjymtyrët e Trupit të tij.

³¹ "Për këtë arsye njeriu do ta lërë babën dhe nënën e do të jetojë bashkë me gruan e vet e të dy do të bëhen një trup i vetëm." ³² Ky është mister i madh: e kam fjalën në lidhjen e Krishtit me Kishën. Shkurt, për sa u përket juve, secili prej jush le ta duajë gruan e vet porsi vetveten e gruaja le ta nderojë burrin e vet.

Fjala e Zotit

Psalmi 128 (127), 1-2.3.4-5 (fq. 810)

Ref. Do të jetë i bekuar ai që e druan Zotin.

¹Lum njeriu që e druan Zotin,

që ecën udhëve të tij.

² Do të ushqehesh prej punës së duarve të tua,

i lumi ti, mirë do të kalosh!

Ref. Do të jetë i bekuar ai që e druan Zotin.

³ Gruaja jote: vresht plot fruta

në dhomat e shtëpisë sate;

djemtë e tu: pinjoj ulliri

përreth tryezës sate!

Ref. Do të jetë i bekuar ai që e druan Zotin.

⁴ Ja, se si bekohet njeriu që e druan Zotin!

⁵ Të bekoftë Zoti prej Sionit

e pafsh lumturinë e Jerusalemit

në të gjitha ditët e jetës sate

Ref. Do të jetë i bekuar ai që e druan Zotin.

Aleluja!

Po të bekoj, o Atë, Zotërues i qiellit e i dheut, që ua zbulove të vegjëlve misteret e Mbretërisë qiellore. (krh. Mt 11, 25)

Aleluja!

Ungjilli (Lk 13, 18-21) (fq. 1484)

Kokrra e sinapit u zhvillua e u bë lëndë e madhe.

Leximi i Ungjillit të shenjtë sipas Lukës

Në atë kohë Jezusi tha: ¹⁸ »Me çka është e ngjashme Mbretëria e Hyjit? Me çka ta krahasoj? ¹⁹ Është e ngjashme me kokrrën e sinapit, të cilën njeriu e mori dhe e mbolli në kopsht të vet. Ajo me kohë u zhvillua e u bë lëndë dhe shpendët e qiellit bënë çerdhe në degët e saja.«

²⁰ Dhe vijoi: »Me çka tjetër ta krahasoj Mbretërinë e Hyjit? ²¹ Ajo i përngjan tharmit, të cilin e mori gruaja, e përzjeu me tri masë miell, derisa s'u mbrua krejt.«

Fjala e Zotit

Lutja mbi dhurata

Shikoji me mirësi, o Zot, dhuratat që po ia kushtojmë madhërisë sate, që shërbesa që tani po kryejmë të jetë në nder të emrit tënd. Nëpër Krishtin Zotin tonë.

Antifona e kungimit Krh. Ps 19, 6

Të gëzohemi për ngadhënjimin tënd, të galdojmë për nder të emrit të Hyjit tonë!

Ose: Ef 5, 2

Krishti na deshi ne dhe për ne ia flijoi vetveten Hyjit porsi kusht dhe fli që jep erë të mirë.

Lutja pas kungimit

Bëj, po të lutemi, o Zot, që sakramentet e tua të plotësojnë në ne atë që përmbajnë, kështu që, çka tani po kryejmë në shenjë, ta fitojmë në realitet. Nëpër Krishtin Zotin tonë.