Leximet e ditës

JAVA E XXX GJATË VITIT

 

E SHTUNË

 

Antifona e hyrjes Krh. Ps 104, 3-4

 

Le të galdojë zemra e atyre që kërkojnë Zotin. Kërkoni Zotin dhe fuqinë e tij, gjithmonë kërkoni fytyrën e tij.

 

Kolekta

 

O Hyj i gjithëpushtetshëm dhe i amshuar, shtoje në ne fenë, shpresën e dashurinë dhe, për të fituar çka na premton, bëj të duam çka na urdhëron. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Fil 1, 18b-26) (fq. 1655)

 

Për mua Krishti është jetë dhe vdekja fitim.

 

Lexim prej Letrës së Shën Palit apostull drejtuar Filipianëve

 

Vëllezër, ¹⁸ në çdo rast predikohet Krishti, qoftë për qëllime të tjera, qoftë me çiltëri. Kësaj gjëje i gëzohem dhe do t'i gëzohem! ¹⁹ Sepse e di se në sajë të lutjeve tuaja dhe të ndihmës së Shpirtit të Jezu Krishtit kjo do të më vlejë për shëlbim, ²⁰ sikurse pres me dëshirë të flaktë dhe shpresoj se nuk do të turpërohem për asgjë, porse me guximin tim të plotë ‑ si gjithmonë ashtu edhe tani ‑ Krishti do të madhërohet në trupin tim, si në jetofsha si në vdissha.

²¹ Vërtet, për mua Krishti është jetë dhe vdekja fitim! ²² Por në qoftë se jeta në trup më mundëson një veprimtari frytdhënëse, çka atëherë të zgjedh? Nuk po di! ²³ Jam ndërdyzash: dëshiroj të shkoj e të jem me Krishtin, sepse kjo është gjë shumë, shumë më e mirë, ²⁴ por të jetoj në këtë trup është më e nevojshme për ju.

²⁵ Për tani e di se do të mbetem dhe do të rri në mesin tuaj për përparimin tuaj e në gëzim të fesë, ²⁶ që mburrja juaj për mua në Jezu Krishtin të shtohet, kur përsëri të vij ndër ju.

 

Fjala e Zotit

 

Psalmi 42 (41), 2.3.5cdef (fq. 704)

 

Ref. Shpirti im ka etje për Hyjin, për Hyjin e gjallë.

 

² Sikurse dreri i dëshiron

burimet e ujërave të gjalla,

po ashtu shpirti im

të dëshiron ty, o Hyj!

 

Ref. Shpirti im ka etje për Hyjin, për Hyjin e gjallë.

 

³ Shpirti im ka etje për Hyjin,

për Hyjin e gjallë:

oh, e kur do të shkoj

e do të dal para fytyrës së Hyjit?!

 

Ref. Shpirti im ka etje për Hyjin, për Hyjin e gjallë.

 

⁵ Mallëngjehet shpirti im

si shtegtoja në krye të turmës,

me brohori e këngë lavdi

në procesion kremtues!

 

Ref. Shpirti im ka etje për Hyjin, për Hyjin e gjallë.

 

Aleluja!

Merrni mbi vete zgjedhën time, thotë Zoti, pranoni t’ju mësoj unë që jam zemër butë e i përvujtë. (Mt 11, 29ab)

Aleluja!

 

Ungjilli (Lk 14, 1.7-11) (fq. 1485)

 

Kushdo e lartëson veten, do të përvujtërohet e kush e përvujtëron vetveten, do të lartësohet.

 

Leximi i Ungjillit të shenjtë sipas Lukës

 

¹ Një të shtunë Jezusi shkoi në shtëpinë e një kryetari farisenjsh për të ngrënë bukë e të pranishmit po e vërenin dijekeqas.

⁷ Duke vënë re se si të grishurit zgjidhnin vendet e para, u tha këtë shëmbëlltyrë: ⁸ »Kur ndokush të të ftojë në dasmë, mos u ul në krye të vendit, pse ndoshta është i grishur ndonjë qe duhet nderuar më tepër se ti, ⁹ që, kur të vijë ai që të ka thirrur ty dhe atë, të mos të thotë: 'Lëshoja vendin këtij!' Atëherë të duhet, plot turp, të shkosh e të zësh vendin e fundit.¹⁰ Përkundrazi, kur të jesh i grishur, shko e rri në vendin e fundit që, kur të vij ai që të ka grishur, të thotë: 'Mik, ngjitu më lart!' Atëherë ke për të qenë i nderuar në sy të të gjithë të grishurve. ¹¹ Vërtet, kushdo e lartëson veten, do të përvujtërohet e kush e përvujtëron vetveten, do të lartësohet.«

 

Fjala e Zotit

 

Lutja mbi dhurata

 

Shikoji me mirësi, o Zot, dhuratat që po ia kushtojmë madhërisë sate, që shërbesa që tani po kryejmë të jetë në nder të emrit tënd. Nëpër Krishtin Zotin tonë.

 

Antifona e kungimit Krh. Ps 19, 6

 

Të gëzohemi për ngadhënjimin tënd, të galdojmë për nder të emrit të Hyjit tonë!

 

Ose: Ef 5, 2

 

Krishti na deshi ne dhe për ne ia flijoi vetveten Hyjit porsi kusht dhe fli që jep erë të mirë.

 

Lutja pas kungimit

 

Bëj, po të lutemi, o Zot, që sakramentet e tua të plotësojnë në ne atë që përmbajnë, kështu që, çka tani po kryejmë në shenjë, ta fitojmë në realitet. Nëpër Krishtin Zotin tonë.