Leximet e ditës

1 nëntor

 

TË GJITHË SHENJTËRIT

E kremte

 

Antifona e Hyrjes

 

Le të gëzohemi të gjithë së bashku në Zotin, dhe le ta kremtojmë këtë ditë feste në nder të të gjithë Shenjtërve: bashkë me ne në këtë festë gëzohen engjëjt, dhe e lavdërojnë Birin e Hyjit.

 

Thuhet Lavdi

 

Kolekta

 

O Hyj i gjithëpushtetshëm dhe i amshueshëm, Ti na dhe hirin t’i nderojmë meritat e të gjithë Shenjtërve në një festë të vetme; po të lutemi, me ndërmjetësinë e të gjithëve, na dhuro mëshirën tënde të pakufishme. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Zb 7, 2-4.9-14) (fq. 1740)

 

Pashë: një shumicë të madhe që askush s’mund e numëronte, prej çdo kombi, çdo fisi, populli dhe gjuhe!

 

Lexim prej Librit të Zbulesës së Shën Gjonit apostull

 

Unë Gjoni ² pashë edhe një engjëll tjetër që ngritej nga Lindja. Ai kishte vulën e Hyjit të gjallë. Ai i thirri me sa zë kishte katër engjëjt që kishin marrë pushtetin të dëmtojnë tokën dhe detin: ³ »Mos i bëni dëm as tokës, as detit, as lëndëve deri që t’i vulosim në ballë shërbëtorët e Hyjit tonë!«

 ⁴ Atëherë dëgjova numrin e atyre që ishin vulosur, 144. 000 nga të gjitha fiset e bijve të Izraelit.

 ⁹ Pastaj pashë: një shumicë të madhe që askush s’mund e numëronte, prej çdo kombi, çdo fisi, populli dhe gjuhe! Qëndronin në këmbë para fronit dhe para Qengjit të veshur me petka të bardha e me palma në dorë. ¹⁰ Ata shpallnin me zë të lartë: »Shëlbimi i përket Hyjit tonë që rri në fron dhe Qengjit!«

¹¹ Të gjithë engjëjt që ishin në këmbë rreth fronit, rreth udhëheqësve dhe rreth katër Gjallorëve, ranë përmbys dhe adhuruan Hyjin. ¹² Thoshin:

»Amen! Bekim e lavdi, dije e falënderim, nder, pushtet dhe fuqi Hyjit tonë në shekuj të shekujve! Amen!«

¹³ Atëherë njëri nga udhëheqësit mori fjalën dhe më pyeti: »Këta që janë të veshur me petka të bardha, kush janë dhe nga kanë ardhur?« ¹⁴ Unë u përgjigja: »Imzot, ti e di!« Dhe ai më tha: »Këta janë ata që erdhën nga prova e madhe; i lanë petkat dhe i zbardhuan në gjakun e Qengjit.

 

Fjala e Zotit

 

Psalmi 24 (23), 1bc-2.3-4ab.5-6 (fq. 682)

 

Ref. Kjo është breznia që kërkon fytyrën tënde, o Zot.

 

¹ E Zotit është toka dhe gjithçka ajo ka,

rruzulli mbarë e të gjithë banorët e tij.

²Ai vetë e themeloi mbi dete,

dhe e bëri të qëndrueshme mbi lumenj.

 

Ref. Kjo është breznia që kërkon fytyrën tënde, o Zot.

 

³ Kush do të ngjitet mbi malin e Zotit

e kush do të qëndrojë në vendin e tij të shenjtë?

⁴ Ai që duart i ka të pafajshme e zemrën të pastër,

Ai që nuk e drejtoi shpirtin e vetë në kotësi,

ai që nuk betohet në rrenë.

 

Ref. Kjo është breznia që kërkon fytyrën tënde, o Zot.

 

⁵ Ky do ta marrë bekimin prej Zotit,

shfajësimin e Hyjit, Shëlbuesit të vet.

⁶ E tillë është breznia e atyre që kërkojnë Zotin,

e atyre që kërkojnë fytyrën e Hyjit të Jakobit.

 

Ref. Kjo është breznia që kërkon fytyrën tënde, o Zot.

 

Leximi i dytë (1 Gjn 3, 1-3) (fq. 1722)

 

Do ta shohim Hyjin ashtu siç është.

 

Lexim prej Letrës së parë të Shën Gjonit apostull

 

Fort të dashur, ¹ shikoni ç’dashuri të madhe na dhuroi Ati sa që quhemi bijtë e Hyjit edhe jemi! Bota nuk na njeh sepse nuk e njeh Atë. ² Të dashur, tani jemi fëmijët e Hyjit, por çka do të jemi ende nuk u zbulua. Kaq dimë: kur të shfaqet do të bëhemi të ngjashëm me Të, sepse do ta shohim ashtu siç është. ³ Kush e ka këtë shpresë në Të, bëhet i pastër siç është Ai i pastër.

 

Fjala e Zotit

 

Aleluja!

Ejani tek unë të gjithë ju që jeni të lodhur prej barrës së rëndë e unë do t’ju çlodh, thotë Zoti. (Mt 11, 28)

Aleluja!

 

Ungjilli (Mt 5, 1-12a) (fq. 1387/8)

 

Gëzohuni e galdoni, sepse i madh do të jetë shpërblimi juaj në qiell!

 

Leximi i Ungjillit të shenjt sipas Mateut

 

Në atë kohë,¹ Jezusi, kur pa turmën, u ngjit në mal. Kur u ul, iu afruan nxënësit e tij. ² Atëherë mori fjalën dhe i mësoi duke thënë:

³ “Lum skamnorët në shpirt sepse e tyre është Mbretëria e qiejve! ⁴ Lum ata që qajnë sepse do të ngushëllohen! ⁵ Lum ata që janë të butë sepse do ta trashëgojnë tokën! ⁶ Lum ata që kanë uri e etje për drejtësi sepse do të ngihen! ⁷ Lum të mëshirshmit sepse do të gjejnë mëshirë! ⁸ Lum ata që janë të pastër në zemër sepse do ta shohin Hyjin. ⁹ Lum pajtuesit sepse do të quhen bijtë e Hyjit. ¹⁰ Lum ata që salvohen pse kryejnë çka Hyji kërkon sepse e tyre është Mbretëria e qiellore. ¹¹ Të lumët ju kur t’ju shajnë e t’ju salvojnë dhe kur, për shkakun tim, t’i thonë të gjitha të zezat kundër jush, por në rrenë! ¹² Gëzohuni e galdoni, sepse i madh do të jetë shpërblimi juaj në qiell!”

 

Fjala e Zotit

 

Thuhet Besoj

 

Besoj në një Hyj të vetëm,

Atin e gjithëpushtetshëm,

krijuesin e qiellit e të tokës,

të gjitha sendeve që shihen dhe që nuk shihen.

Besoj në një Zot të vetëm, Jezu Krishtin,

një të vetmin Birin e Hyjit,

të lindur prej Atit para të gjithë shekujve.

Hyj prej Hyjit, Dritë prej Dritës,

Hyj i vërtetë prej Hyjit të vërtetë.

I lindur, jo i krijuar, i njëqenshëm me Atin,

nëpërmjet të cilit janë krijuar të gjitha sendet.

Ai, për ne njerëzit dhe për shpëtimin tonë, zbriti prej qiellit.

  Në fjalët që vijojnë, deri në fjalët u bë njeri, të gjithë përkulen:

E u mishërua për virtyt të Shpirtit Shenjt

prej Virgjërës Mari dhe u bë njeri.

U kryqëzua për ne nën Poncin Pilat,

pësoi dhe u varros

dhe u ngjall të tretën ditë sipas Shkrimeve

e u ngjit në qiell dhe rri në të djathtën e Atit.

Dhe përsëri do të vijë me lavdi

për të gjykuar të gjallët e të vdekurit,

e mbretëria e tij nuk do të ketë mbarim.

Besoj në Shpirtin Shenjt, që është Zot dhe jetëdhënës,

që rrjedh prej Atit e prej Birit,

që me Atin e me Birin adhurohet e lavdërohet,

që foli me anë të profetëve.

Edhe një Kishë të vetme, të shenjtë, katolike dhe apostolike.

Dëshmoj një pagëzim të vetëm për faljen e mëkateve.

Pres ngjalljen e të vdekurve

dhe jetën e pasosur. Amen.

 

Lutja mbi dhurata

 

Të pëlqefshin, o Zot, dhuratat që po t’i paraqesim në nder të të gjithë Shenjtërve dhe pasi besojmë se ata kanë fituar pavdekësinë, bëj ta sprovojmë ndërmjetësinë e tyre për shpëtimin tonë. Nëpër Krishtin Zotin tonë.

 

Prefacioni: Lavdia e Jerusalemit Qiellor

 

M. Zoti qoftë me ju.

P. Dhe me shpirtin tënd.

M. T’i lartësojmë zemrat.

P. I kemi te Zoti.

M. Të falënderojmë Zotin, Hyjin tonë.

P. Është punë e denjë dhe e drejtë.

 

Përnjëmend është punë e denjë dhe e drejtë,

është detyra jonë dhe burim shpëtimi

të të falënderojmë gjithmonë e gjithkund ty,

o Zot, Atë i shenjtë, Hyj i gjithëpushtetshëm dhe i amshuar.

Ne sot kremtojmë qytetin tënd të shenjtë,

atdheun tonë, Jerusalemin qiellor,

ku bashkësia e vëllezërve tanë dhe motrave tona

të lavdëron për amshim.

Atje edhe ne, udhëtarë mbi tokë, vrapojmë,

të ndriçuar nga feja

dhe të gëzuar për fatin e lumtur

të këtyre gjymtyrëve të lartë të Kishës,

që Ti na i jep si ndërmjetës e shembull jete.

Dhe prandaj, bashkë me të gjithë shenjtërit e engjëjt,

po të madhërojmë dhe njëzëri këndojmë:

 

Shenjt, Shenjt, Shenjt.

 

Antifona e kungimit Mt 5, 8-10

 

Lum ata që janë të pastër në zemër, sepse do ta shohin Hyjin. Lum pajtuesit, sepse do të quhen bijtë e Hyjit. Lum ata që salvohen pse kryejnë çka Hyji kërkon, sepse e tyre është Mbretëria e qiellit.

 

Lutja pas kungimit

 

Ty të adhurojmë, o Hyj i shenjtë dhe i shkëlqyeshëm në shenjtërit e tu; e të lutemi: na jep hirin tënd që, të shenjtëruar në plotësinë e dashurisë sate, të kalojmë prej kësaj tryeze, ku na ke pranuar si shtegtarë në gostinë e atdheut të amshuar. Nëpër Krishtin Zotin tonë.

 

Mund të përdoret trajtëza e bekimit kremtor, fq. 519

 

Për Meshën kushtimore të të gjithë Shenjtërve, fq. 994