Leximet e ditës

JAVA E XXXI GJATË VITIT

 

E MARTË

 

Antifona e hyrjes Krh. Ps 37, 22-23

 

Mos më lër vetëm, o Zot Hyji im, mos u largo prej meje! Nxito të më ndihmosh, o Zot, fuqia e shpëtimit tim.

 

Kolekta

 

O Hyj i gjithëpushtetshëm dhe i mëshirshëm, me hirin tënd besimtarët e tu mund të të shërbejnë me denjësi; bëj, po të lutemi, të nxitojmë pa pengesë nga premtimet e tua. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Fil 2, 5-11) (fq. 1656)

 

E përuli vetveten prandaj edhe Hyji e lartësoi.

 

Lexim prej Letrës së Shën Palit apostull drejtuar Filipianëve

 

Vëllezër, ⁵ kini në ju po ato ndjenja që ishin në Krishtin Jezus: ⁶ i cili, edhe pse me natyrë Hyj, barazinë e vet me Të nuk e çmoi si një visar që s'mundet pa të, ⁷ por ia mohoi vetvetes e mori natyrën e shërbëtorit dhe u bë i ngjashëm me njerëz dhe, për kah pamja e jashtme, dukej vetëm njeri. ⁸ E përuli vetveten duke u bërë i dëgjueshëm deri në vdekje, mu deri në vdekje në kryq. ⁹ Prandaj edhe Hyji e lartësoi tesve dhe i dha emrin që është mbi çdo emër ¹⁰ që në Emër të Jezusit të përkulet çdo gju i atyre që janë në qiell, në tokë e në nëntokë ¹¹ dhe çdo gjuhë të dëshmojë: "Jezu Krishti është Zot!" Në nder të Hyjit Atë.

 

Fjala e Zotit

 

Psalmi 22 (21), 26b-27.28-30ab.30e.31-32 (fq. 679)

 

Ref. Lavdi ty, o Zot, në bashkësi të shenjtërve.

 

²⁶ Ndër sy të besimtarëve të tu do t'i kryej kushtet.

²⁷ Do të hanë skamnorët e do të ngihen,

do ta lavdërojnë Zotin ata që e kërkojnë:

"Rroftë zemra e tyre për amshim!'

 

Ref. Lavdi ty, o Zot, në bashkësi të shenjtërve.

 

²⁸ Do të kujtohen e do të kthehen te Zoti

mbarë skajet e tokës,

do të adhurojnë para tij mbarë familjet e kombeve.

 

Ref. Lavdi ty, o Zot, në bashkësi të shenjtërve.

 

²⁹ Sepse Zoti është mbret!

Ai i sundon kombet!

³⁰ Atë, vetëm atë do ta adhurojnë

të gjithë ata që pushojnë nën dhe.

 

Ref. Lavdi ty, o Zot, në bashkësi të shenjtërve.

 

Kurse shpirti im për të do të jetojë,

³¹ në shërbim të tij do të jetë fara ime,

breznisë së ardhshme do t’i tregohet për Zotin,

³² për drejtësinë e tij do t’i tregohet popullit që vjen:

»Kështu bëri Zoti!«

 

Ref. Lavdi ty, o Zot, në bashkësi të shenjtërve.

 

Aleluja!

Ejani tek unë të gjithë ju që jeni të lodhur prej barrës së rëndë e unë do tu çlodh, thotë Zoti. (krh. Mt 11, 28)

Aleluja!

 

Ungjilli (Lk 14, 15-24) (fq. 1486)

 

'Dil në rrugë e ngjat gardheve e shtrëngo njerëzit të vijnë e të ma mbushin shtëpinë.

 

Leximi i Ungjillit të shenjtë sipas Lukës

 

Në atë kohë, ¹⁵ një njeri prej të grishurve në tryezë, kur i dëgjoi fjalët e Jezusit, tha: »Lum ai që do të marrë pjesë në gazmendin e Mbretërisë së Hyjit!

¹⁶ Jezusi i tha: "Një njeri përgatiti një darkë të madhe dhe grishi shumë vetë. ¹⁷ Në kohën e darkës çoi shërbëtorin e vet t'u thotë të grishurve: 'Ejani se gjithçka është gati!!' ¹⁸ Por të gjithë - si të ishin marrë vesh - zunë të përligjen: i pari tha: 'Bleva një arë, më duhet të shkoj ta shoh, të lutem: më arsyeto!' ¹⁹ I dyti tha: 'Bleva pesë pendë qe e po shkoj t'i sprovoj. Të lutem, më arsyeto! ²⁰ I treti tha: 'U martova e prandaj s'mund të vij!'

²¹ Shërbëtori u kthye dhe ia tregoi të gjitha zotërisë së vet. Atëherë i zoti i shtëpisë, i zemëruar, i tha shërbëtorit të vet: 'Shko vrap në tregje e rrugëve të qytetit e bjer këtu lypës, të gjymtë, të verbër e të shqeptë!'

²² Shërbëtori i tha: 'Zotëri, si urdhërove ti u bë, por ka ende vend.' ²³ E zotëria i tha shërbëtorit: 'Dil në rrugë e ngjat gardheve e shtrëngo njerëzit të vijnë e të ma mbushin shtëpinë.' ²⁴ Unë po ju siguroj se asnjë prej atyre njerëzve që qenë të grishur, s'do ta shijojë darkën time!«

 

Fjala e Zotit

 

Lutja mbi dhurata

 

Kjo fli qoftë për ty, o Zot, kusht i pastër dhe për ne u bëftë dhuratë bujare e mëshirës sate. Nëpër Krishtin Zotin tonë.

 

Antifona e kungimit Krh. Ps 15, 11

 

O Zot, Ti ma tregove udhën e jetës, gëzimin e plotë para fytyrës sate.

 

Ose: Gjn 6, 58

 

Sikurse mua më dërgoi Ati i gjallë dhe unë jetoj nëpër Atin, po ashtu edhe ai që më ha mua do të jetojë për mua, thotë Zoti.

 

Lutja pas kungimit

 

Shtoje në ne, po të lutemi, o Zot, veprimin e fuqisë sate, që të forcuar nga sakramentet e tua, të përgatitemi për të marrë të mirat e premtuara. Nëpër Krishtin Zotin tonë.