Leximet e ditës

JAVA E XXXI GJATË VITIT

E MËRKURË

Antifona e hyrjes Krh. Ps 37, 22-23

Mos më lër vetëm, o Zot Hyji im, mos u largo prej meje! Nxito të më ndihmosh, o Zot, fuqia e shpëtimit tim.

Kolekta

O Hyj i gjithëpushtetshëm dhe i mëshirshëm, me hirin tënd besimtarët e tu mund të të shërbejnë me denjësi; bëj, po të lutemi, të nxitojmë pa pengesë nga premtimet e tua. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

Leximi i parë (Fil 2, 12-18) (fq. 1656)

Hyji është ai që, sipas mirësisë së vet, ndikon në ju të doni e të veproni.

Lexim prej Letrës së Shën Palit apostull drejtuar Filipianëve

¹² Të dashurit e mi, ju që ishit gjithmonë të dëgjueshëm, qëndroni, jo vetëm në praninë time, por shumë më tepër tani që nuk jam pranë jush; punoni me frikë dhe me drojë të madhe për shëlbimin tuaj. ¹³ Sepse Hyji është ai që, sipas mirësisë së vet, ndikon në ju që të doni edhe që të veproni.

¹⁴ Bëni gjithçka pa murmurim e pa vonesë, ¹⁵ që të jeni pa të meta dhe të pastër, fëmijë të panjollë të Hyjit në midis të kësaj breznie të prishur e dinake, në të cilën ndriçoni porsi pishtarë në botë, ¹⁶ duke e mbajtur lart Fjalën e Jetës që të mund të mburrem në Ditën e Krishtit se nuk kam vrapuar kot dhe nuk jam munduar kot. ¹⁷ Mu, përkundrazi, edhe në qoftë se duhet që gjaku im të derdhet si fli njomëse e shërbesës hyjnore për fenë tuaj, jam i kënaqur dhe galdoj bashkë me ju. ¹⁸ Po ashtu edhe ju gëzohuni dhe galdoni bashkë me mua!

Fjala e Zotit

Psalmi 27 (26), 1.4.13-14 (fq. 685)

Ref. Zoti është drita ime dhe shpëtimi im.

¹Zoti është drita ime dhe shpëtimi im,

kë do të kem frikë?

Zoti është mbrojtësi i jetës sime,

para kujt do të dridhem?

Ref. Zoti është drita ime dhe shpëtimi im.

⁴ Për një gjë të vetme i lutem Zotit,

vetëm atë ia kërkoj

që të jetoj në Shtëpinë e Zotit

të gjitha ditët e jetës sime,

që ta shijoj kënaqësinë e Zotit

e ta vërej Shtëpinë e Zotit.

Ref. Zoti është drita ime dhe shpëtimi im.

¹³ Besoj se do t'i shijoj të mirat e Zotit

në tokën e të gjallëve.

¹⁴ Shpreso në Zotin: bëhu burrë!

Ji zemërfortë e prite Zotin!

Ref. Zoti është drita ime dhe shpëtimi im.

Aleluja!

Të lumët ju në qoftë se ju fyejnë për shkak të Emrit të Krishtit, sepse Shpirti i Lavdisë, i Hyjit, pushon në ju. (1 Pjt 4, 14)

Aleluja!

Ungjilli (Lk 14, 25-33) (fq. 1486)

Secili prej jush që nuk i bie mohit tërë pasurisë së vet, nuk mund të jetë nxënësi im.

Leximi i Ungjillit të shenjtë sipas Lukës

Në atë kohë, ²⁵ një mori e madhe e popullit po bënte rrugë me Jezusin. Ai u kthye kah ata dhe u tha: ²⁶ »Nëse ndokush vjen tek unë e do më tepër babën, nënën, gruan, fëmijët, vëllezërit, motrat, madje edhe jetën e vet se mua, nuk mund të jetë nxënësi im. ²⁷ Kush nuk e mbart kryqin e vet e nuk më vjen pas, nuk mund të jetë nxënësi im!

²⁸ Cili prej jush, nëse mendon të ndërtojë kullën, nuk ulet më parë të llogarisë shpenzimet a ka sa i duhen për ta kryer? ²⁹ Që, kur t'i shtjerë themelet e të mos mund ta kryejë - të mos fillojë ta vërë në lojë gjithkush ta shohë ³⁰ duke thënë: 'Ky njeri filloi të ndërtojë e nuk mundi ta kryejë!' ³¹ Ose - cili mbret, kur do të niset të luftojë kundër një mbreti tjetër, nuk ulet më parë të pleqërojë a është i zoti me dhjetë mijë ushtarë t'i dalë përballë atij, që i vjen me njëzet mijë? ³² Nëse nuk mundet, çon delegacionin derisa ai është ende larg e kërkon kushtet për paqe.

³³ Kështu, pra, secili prej jush që nuk i bie mohit tërë pasurisë së vet, nuk mund të jetë nxënësi im.«

Fjala e Zotit

Lutja mbi dhurata

Kjo fli qoftë për ty, o Zot, kusht i pastër dhe për ne u bëftë dhuratë bujare e mëshirës sate. Nëpër Krishtin Zotin tonë.

Antifona e kungimit Krh. Ps 15, 11

O Zot, Ti ma tregove udhën e jetës, gëzimin e plotë para fytyrës sate.

Ose: Gjn 6, 58

Sikurse mua më dërgoi Ati i gjallë dhe unë jetoj nëpër Atin, po ashtu edhe ai që më ha mua do të jetojë për mua, thotë Zoti.

Lutja pas kungimit

Shtoje në ne, po të lutemi, o Zot, veprimin e fuqisë sate, që të forcuar nga sakramentet e tua, të përgatitemi për të marrë të mirat e premtuara. Nëpër Krishtin Zotin tonë.