Leximet e ditës

JAVA E XXXI GJATË VITIT

 

E SHTUNË

 

Antifona e hyrjes Krh. Ps 37, 22-23

 

Mos më lër vetëm, o Zot Hyji im, mos u largo prej meje! Nxito të më ndihmosh, o Zot, fuqia e shpëtimit tim.

 

Kolekta

 

O Hyj i gjithëpushtetshëm dhe i mëshirshëm, me hirin tënd besimtarët e tu mund të të shërbejnë me denjësi; bëj, po të lutemi, të nxitojmë pa pengesë nga premtimet e tua. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve.

 

Leximi i parë (Fil 4, 10-19) (fq. 1658/9)

 

Gjithçka mundem me ndihmën e Atij që më jep fuqi!

 

Lexim prej Letrës së Shën Palit apostull drejtuar Filipianëve

 

Vëllezër, ¹⁰ jam gëzuar në Zotin, pse kujdesi juaj ndaj meje mundi së fundi të lulëzojë. Vërtet, ju edhe më parë keni menduar të kujdeseni për mua, por nuk keni pasur rast.

¹¹ Nuk po them kështu për arsye të skamit, sepse ju e dini se unë jam mësuar të jem i kënaqur me aq sa kam. ¹² Di të jetoj në skam dhe di të jetoj në pasje. Jam mësuar gjithsesi dhe për gjithçka: të ngihem e të jem i uritur, të kem mjaft e të kem pak! ¹³ Gjithçka mundem me ndihmën e Atij që më jep fuqi!

¹⁴ Por, prapëseprapë, është bukur për ju që morët pjesë në nevojën time. ¹⁵ Po edhe ju, o filipianë, e dini mirë se në fillim të predikimit të Ungjillit, kur u nisa prej Maqedonisë, asnjë kishë nuk më dha gjë lidhur me "të dala e të marra", përveç ju të vetmit. ¹⁶ Madje edhe në Selanik kur isha në nevojë, më dërguat ndihma një herë e dy herë.

^l7 Jo, nuk kërkoj dhurata, por kërkoj fryt të begatshëm në dobinë tuaj. ¹⁸ Kam gjithçka më duhet, madje edhe për së tepërmi: jam plot me çdo të mirë që mora prej Epafrodit, çka ju më dërguat: "erë e mirë" ‑ fli e erëndshme që i pëlqen Hyjit.

¹⁹ Dhe Hyji im do të plotësojë çdo nevojë tuajën me begatinë e vet, për mrekulli, nëpër Jezu Krishtin.

 

Fjala e Zotit

 

Psalmi 112 (111), 1b-2.5-6.8a.9 (fq. 790)

 

Ref. Lum ai njeri që e druan Zotin.

 

¹ Lum ai njeri që e druan Zotin,

që kënaqet në urdhërimet e tija.

² Fara e tij do të jetë e fortë mbi tokë,

do të bekohet breznia e të drejtëve.

 

Ref. Lum ai njeri që e druan Zotin.

 

⁵ I ëmbël është njeriu që përdëllen e huajon,

punët e veta i kryen me ndërgjegje,

⁶ ai askurrë nuk do të bjerë poshtë.

Në kujtim të përhershëm mbetet i drejti,

 

Ref. Lum ai njeri që e druan Zotin.

 

⁸ Të fortë e ka zemrën, nuk do të trembet

⁹ Është dorëdhënë, u fal skamnorëve;

drejtësia e tij qëndron në shekuj të shekujve,

balli i tij ngallit për nder.

 

Ref. Lum ai njeri që e druan Zotin.

 

Aleluja!

Jezu Krishti që ishte i pasur, u bë për ju i varfër, që ju të bëheni të pasur me anë të varfërisë së tij. (2 Kor 8, 9)

Aleluja!

 

Ungjilli (Lk 16, 9-15) (fq. 1488/9)

 

Po qe se nuk u dëftuat besnikë në pasurinë e rrejshme, kush do t'jua besojë pasurinë e vërtetë?

 

Leximi i Ungjillit të shenjtë sipas Lukës

 

Në atë kohë Jezusi u tha nxënësve të vet : ⁹ Fitoni për vete miq me anë të pasurisë së rrejshme të kësaj bote që, kur kjo t'ju mungojë, t'ju pranojnë në banesat e amshuara.

¹⁰ Kush është besnik në sende të vogla, është besnik edhe në sende të mëdha; e kush nuk është besnik në sende të vogla, ai nuk është besnik as në sende të mëdha. ¹¹ Po qe se nuk u dëftuat besnikë në pasurinë e rrejshme, kush do t'jua besojë pasurinë e vërtetë? ¹² Po qe se nuk u dëftuat të besueshëm në gjënë e huaj, kush do t'jua japë tuajën?

¹³ Asnjë shërbëtor nuk mund t'u shërbejë njëkohësisht dy zotërinjve: Sepse, ose do ta urrejë njërin e tjetrin do ta duajë, ose pas njërit do të shkojë e tjetrin do ta përbuzë. Nuk mund t'i shërbeni Hyjit dhe pasurisë.

¹⁴ Të gjitha këto po i dëgjonin farisenjtë që s'i ngin gjë me para dhe e përqeshnin. ¹⁵ Jezusi u tha: »Ju dini të paraqiteni para njerëzve të drejtë, porse Hyji i njeh zemrat tuaja! Veçse, çka është e madhërueshme para njerëzve, është ndyrësi para Hyjit.

 

Fjala e Zotit

 

Lutja mbi dhurata

 

Kjo fli qoftë për ty, o Zot, kusht i pastër dhe për ne u bëftë dhuratë bujare e mëshirës sate. Nëpër Krishtin Zotin tonë.

 

Antifona e kungimit Krh. Ps 15, 11

 

O Zot, Ti ma tregove udhën e jetës, gëzimin e plotë para fytyrës sate.

 

Ose: Gjn 6, 58

 

Sikurse mua më dërgoi Ati i gjallë dhe unë jetoj nëpër Atin, po ashtu edhe ai që më ha mua do të jetojë për mua, thotë Zoti.

 

Lutja pas kungimit

 

Shtoje në ne, po të lutemi, o Zot, veprimin e fuqisë sate, që të forcuar nga sakramentet e tua, të përgatitemi për të marrë të mirat e premtuara. Nëpër Krishtin Zotin tonë.