Mbrëmësorja
kreshmët – e mërkura përhime
Mbrëmësorja
D Hyj, më eja në ndihmë!
C O Zot, shpejto të më ndihmosh!
D Lavdi Atit e Birit e Shpirtit Shenjt,
C si ka qenë në fillim,
ashtu tash e përgjithmonë e jetës. Amen.
Himni
O Jezus, je themeluesi
i agjërimit të kreshmëve,
mëngjillet na i mësove
për shërim të mendjeve.
Bëju tashti krah Kishës,
pendesës qëndroji pranë,
shtrirë përdhe të lutemi
të falësh mëkatet tanë.
Ti fajet e ribëra
shlyeji me hirin tënd,
e rojën kah e ardhmja
me shumë butësi përdore.
Të shpërblyer nga veprat
vjetore të pendimit,
të shkojmë në gëzimet e Pashkëve
të denja për kremtimin.
Ty gjithësia e sendeve
Të adhuroftë, Trini e mëshirshme,
Me faljen tënde të përtërirë,
të këndojmë një këngë të re. Amen.
(Në vend të himnit mund të këndohet një këngë e miratuar nga autoritetet kishtare e që i përshtatet kohës)
Ant. 1 Sa e mrekullueshme është dija jote për mua, o Zot.
Psalmi 139 /138/ I (1-12)
Zoti sheh gjithçka
Kush e njohu mendimin e Zotit? Kush iu bë Atij këshilltar? (Rom 11, 34).
O Zot, ti më shqyrton e më njeh, *
ti di kur rri e kur ngrihem,
prej së largu i njeh mendimet e mia. *
Si në shtegtoj si në pushoj, ti më vëren,
ti i di të gjitha udhët e mia. †
Pa më ardhur ende fjala në majë të gjuhës, *
dhe, ja, ti, o Zot, i njeh të gjitha!
Përpara e pas ti, o Zot, më rrethon, *
ti e ke vënë mbi mua dorën tënde.
E mrekullueshme është dija jote për mua, *
tepër e lartë, s’jam në gjendje t’ia arrij.
Ku mund të shkoj larg prej shpirtit tënd, *
ku të iki larg prej pranisë sate?
Nëse ngjitem në qiell, ti atje je, *
nëse zbres në Nëntokë, edhe aty je.
Po t’i marr krahët e agimit *
e të shkoj të banoj në skajin e detit,
edhe atje dora jote do të më përcjellë *
e do të më mbajë e djathta jote.
Në thënça: »Le të më mbulojë së paku errësira *
edhe drita natë le të bëhet mbi mua!«,
por as terri s’është aspak terr për ty †
edhe nata është si dritë e ndritshme *
- për ty errësira është porsi drita!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Sa e mrekullueshme është dija jote për mua, o Zot.
Ant. 2 Ti më njeh në thellësi të zemrës, o Zot, dhe i jep çdonjërit sipas veprave të tija.
Psalmi 139 /138/
II (13-18. 23-24)
O Zot, ti më shqyrton dhe më njeh
Hyji nuk është larg asnjërit prej nesh... në Të jetojmë, lëvizim e jemi (Vap 17, 27. 28).
Ti je ai që m’i krijove veshkat, *
ti më ke endur në kraharorin e nënës!
Të lavdëroj pse më krijove kaq mrekullisht, †
të mrekullueshme janë veprat e tua, *
po, shpirti im mirë e di!
Eshtrat e mi nuk të mbetën të fshehur †
kur unë po trajtohesha në fshehtësi *
i endur në thellësinë e tokës.
Ende të patrajtuar më panë sytë e tu, †
në librin tënd ishin të shkruara të gjitha ditët: *
ishin të njehura megjithëse asnjë s’ishte ende prej tyre.
Tepër të çmueshme janë për mua, e Hyj, mendimet e tua, *
e panumërueshme është shuma e tyre!
Po t’i numëroja, janë më shumë se rëra! *
Po t’iu dilja në skaj, më mbeteshe prapë ti!
Më shqyrto, o Hyj, dhe njihe zemrën time, *
më sprovo e njihi shtigjet e mia
e shiko në mos ka në mua udhë kotësie *
dhe më kthe në udhën e amshueshme.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Ti më njeh në thellësi të zemrës, o Zot, dhe i jep çdonjërit sipas veprave të tija.
Ant. 3 Nëpër Krishtin gjithësia u krijua dhe çdo gjë qëndron në të.
Kënga Krh. Kol 1, 3. 12-20
Krishti, i Parëlinduri i çdo krijese, është i Parëlinduri i atyre që ngjallen prej të vdekurve.
E falënderojmë Hyjin, *
Atin e Zotit tonë Jezu Krishtit,
sepse na bëri të aftë të kemi pjesë *
në trashëgimin e shenjtërve në dritë.
Ai na nxori nga pushteti i errësirës *
dhe na kaloi në Mbretërinë e Birit të vet të dashur,
në të cilin kemi shpërblimin *
- faljen e mëkateve.
Ai është shëmbëllesa e Hyjit të papashëm, *
i Parëlinduri - para çdo krijese.
Ai është para çdo gjëje *
dhe çdo gjë qëndron në Të.
Gjithçka u krijua nëpër Të dhe për Të *
në qiell e në dhe,
çka shihet e çka nuk shihet.
Ai është Kryet e Trupit - Kishës; *
Ai është Fillimi,
i Parëlinduri ndër të vdekurit *
- që të jetë në gjithçka i Pari.
Sepse Hyjit i pëlqeu
të banojë në Të e tërë Plotësia *
dhe, me anë të Tij, gjithçka të pajtohet me të.
Në saje të Gjakut të kryqit të Tij, †
Hyji vendosi paqen me krijesat e veta *
qoftë në tokë qoftë në qiell.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Nëpër Krishtin gjithësia u krijua
dhe çdo gjë qëndron në të.
Leximi i shkurtër Fil 2, 12b-15
Punoni me frikë dhe me drojë të madhe për shëlbimin tuaj. Sepse Hyji është ai që, sipas mirësisë së vet, ndikon në ju që të doni e të veproni. Bëni gjithçka pa murmurim e pa vonesë, që të jeni pa të meta dhe të pastër, fëmijë të panjollë të Hyjit në midis të kësaj breznie të prishur e dinake, në të cilën ndriçoni porsi pishtarë në botë.
Përgjigjja e shkurtër
C Lum ai që të kërkon me gjithë zemër
* dhe ecën në ligjet e tua.
Lum ai që të kërkon me gjithë zemër dhe ecën në ligjet e tua.
D Është besnik ndaj mësimeve të tua
dhe ecën në ligjet e tua.
Lavdi Atit e Birit e Shpirtit Shenjt.
Lum ai që të kërkon me gjithë zemër dhe ecën në ligjet e tua.
Kënga ungjillore (Magnificat Lk 1, 46-55)
Ant. Kur të bësh lëmoshë, mos të dijë e majta çka bën e djathta.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Kur të bësh lëmoshë, mos të dijë e majta çka bën e djathta.
Lutjet e besimtarëve
Nder e lavdi Zotit i cili bëri besëlidhje të re e të amshuar me popullin e vet nëpërmjet Gjakut të Jezu Krishtit dhe e përsërit në gostinë eukaristike. T'ia drejtojmë lutjen tonë me fjalët:
Bekoje, o Zot, popullin tënd.
Drejtoji, o Zot, me vullnetin tënd, popujt dhe pushtetmbajtësit
— që të veprojnë me sinqeritet për dobinë e të gjithë njerëzve.
Zmadhoje përshpirtërinë e atyre që mohuan çdo send dhe shkuan pas Krishtit
— që të mund të japin dëshmi të vërtetë dhe shembull shenjtërie.
Ti ke krijuar të gjithë njerëzit në përngjasimin tënd
— bëj që t'i shmangen pabarazisë së padrejtë.
Të gjithë ata që bredhin, afroi pranë vetes, dhuroju miqësinë dhe të vërtetën tënde
— dhe na mëso që edhe ne t'iu japim përkrahje.
Bëj që të vdekurit të hyjnë në lumturinë tënde
— dhe të të lavdërojnë përgjithmonë.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
Bëj, po të lutemi, o Zot, ta fillojmë me agjërimet e shenjta udhën e kthimit të vërtetë, kështu që, me ndihmën e përkorjes kreshmore, të dalim ngadhënjyes në luftim kundër djallit, shpirtit të së keqes. Nëpër Zotin.
Përfundimi i Orës sikurse në Shërbesën e rëndomtë.