Mbrëmësorja

kreshmët – e enjte pas të mërkurës përhime

 

Mbrëmësorja

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen.

 

   Himni

 

   O Jezus, je themeluesi

   i agjërimit të kreshmëve,

   mëngjillet na i mësove

   për shërim të mendjeve.

 

   Bëju tashti krah Kishës,

   pendesës qëndroji pranë,

   shtrirë përdhe të lutemi

   të falësh mëkatet tanë.

 

   Ti fajet e ribëra

   shlyeji me hirin tënd,

   e rojën kah e ardhmja

   me shumë butësi përdore.

 

   Të shpërblyer nga veprat

   vjetore të pendimit,

   të shkojmë në gëzimet e Pashkëve

   të denja për kremtimin.

 

   Ty gjithësia e sendeve

   Të adhuroftë, Trini e mëshirshme,

   Me faljen tënde të përtërirë,

   të këndojmë një këngë të re. Amen.

 

Ant. 1 Në ty shpresoj, o Zot, dashuria ime dhe strehimi im.

 

Psalmi 144 /143/ I (1-8)

 

   Lutja e Mbretit për fitore dhe për paqe

 

   Duart e tija e filluan luftën kur ai e mundi mbretërinë e së keqes. Ai tha: Keni besim në mua, unë e munda botën! (Krh. Gjn 16, 33) (Shën Ilari).

 

Qoftë bekuar Zoti, ndihmëtari im †

   që m’i mëson duart për luftim *

   e gishtërinjtë për luftë.

 

Mëshira ime dhe kështjella ime, *

   strehimi im dhe çlirimtari im,

shqyti im pas të cilit fshihem, *

   ai që popullin tim e vë nën sundimin tim.

 

O Zot, e ç’është njeriu që t’i japësh rëndësi, *

   biri i njeriut që të kujdesesh për të?

Njeriu i përngjan avullit, *

   ditët e tija si hija që kalon.

 

O Zot, priri qiejt e tu e zbrit, *

   preki malet e ato le të tymojnë.

Gjuaj rrufe e shpërndaji armiqtë, *

   flakëro shigjetat dhe shpartalloji!

 

Shtrije dorën tënde prej së larti †

   më shpëto e më nxirr prej ujërave të mëdha, *

   prej kthetrave të bijve të huaj,

 

goja e të cilëve gënjeshtra veç flet, *

   e djathta e të cilëve ngrihet për t’u betuar në rrenë.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Në ty shpresoj, o Zot, dashuria ime dhe strehimi im.

 

Ant. 2 Lum ai popull që Hyjin e ka Zot!

 

Psalmi 144 /143/

 

II (9-15)

 

   Lutja e Mbretit

 

   Në Jezu Krishtin Hyji na tregoi në shekujt e ardhshëm pasurinë e patregueshme të hirit të tij nëpërmes mirësisë së tij që ka për ne (Ef 2, 6. 7).

 

O Zot, për ty do ta këndoj një këngë të re, *

   për ty do të luaj në harpën dhjetë kordash,

sepse mbretërve ti u jep fitoren, *

   e shpëton Davidin, shërbëtorin tënd,

   prej shpatës vrastare.

 

Më shpëto e më liro *

   prej kthetrave të bijve të të huajve,

goja e të cilëve gënjeshtra veç flet, *

   e djathta e të cilëve ngrihet për t’u betuar në rrenë.

 

Bëj që fëmijët tanë të jenë porsi pema *

   që rritet në rininë e vet,

bijat tona porsi shtyllat e këndeve, *

   të hijshme porsi shtyllat e Tempullit.

 

Drithnikët tanë mbushi plotë e përplot *

   me gjithfarë frytesh me mbushulli,

 

dhentë tona me mijëra u shtofshin, †

   të panumërta nëpër fushat tona, *

   gjedhet tona të majme e të shëndosha.

 

Rrënime as sulme mos pastë në muret tona, *

   as vaj e gjëmë ndër sheshet tona!

 

Lum ai popull që i ka këto të mira, *

   lum ai popull që Hyjin e ka Zot!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Lum ai popull që Hyjin e ka Zot!

 

Ant. 3 Ja tani koha e shëlbimit dhe e Mbretërisë së Hyjit tonë.

 

Kënga Krh. Zb 11, 17-18; 12, 10b-12a

 

   Gjyqi i Zotit

 

Po të falënderojmë, o Zotëri,

   Hyj i Gjithëpushtetshëm, *

   ty që je, ty që ishe,

 

sepse e ushtrove fuqinë tënde të madhe *

   dhe e more mbretërimin!

 

Paganët u hidhëruan, †

   por arriti zemërimi yt! *

   Erdhi koha të gjykohen të vdekurit,

 

koha e shpërblimit për shërbëtorët e tu *

   profetët dhe shenjtërit

dhe për të gjithë ata që e druan Emrin tënd *

   - për të vegjël e të mëdhenj.

 

Ja, tani koha e shëlbimit, †

   e pushtetit dhe e Mbretërisë së Hyjit tonë *

   dhe e sundimit të Krishtit të tij!

 

Sepse u hodh poshtë paditësi i vëllezërve tanë *

   që ditë e natë i padiste para Hyjit tonë.

 

Por ata e mundën në fuqi të gjakut të Qengjit †

   dhe në saje të dëshmisë së vet: *

   nuk e deshën jetën e vet aq sa ta dronin vdekjen.

 

Prandaj galdo, o qiell, *

   galdoni edhe ju, o qiellorë të gjithë!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Ja tani koha e shëlbimit dhe e Mbretërisë së Hyjit tonë.

 

   Leximi i shkurtër Jak 4, 7-8. 10

 

   Nënshtrohuni, pra Hyjit! Kundërshtoni djallit dhe do të largohet prej jush! Afrohuni Hyjit edhe Ai do t’ju afrohet juve! Pastroni duart, o mëkatarë! Pastroni zemrat, o njerëz dy mendjesh! Përuluni para Hyjit dhe Ai do t’ju lartësojë.

 

   Përgjigjja e shkurtër

 

   C Më jep mençurinë * që ta mbaj ligjin tënd.

   Më jep mençurinë që ta mbaj ligjin tënd.

   D Më mëso mendjen dhe urtinë

   që ta mbaj ligjin tënd.

   Lavdi Atit e Birit e Shpirtit Shenjt.

   Më jep mençurinë që ta mbaj ligjin tënd.

 

   Kënga ungjillore (Magnificat Lk 1, 46-55)

 

Ant. Kush e humb jetën e vet për shkakun tim, do ta shpëtojë, thotë Zoti.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Kush e humb jetën e vet për shkakun tim, do ta shpëtojë, thotë Zoti.

 

   Lutjet e besimtarëve

 

Hyji na shndrit me hirin e Shpirtit Shenjt që të ndriçojmë me vepra të drejtësisë dhe të fesë. T’i japim lavdi mëshirës së tij dhe t’i themi:

 

   Përtërije, o Zot, popullin që e ka shpëtuar Biri yt.

 

O Hyj, burim dhe krijues i çdo shenjtërie, me misterin eukaristik bashkoi ipeshkvijtë, meshtarët dhe diakonët me Krishtin

— që hirin të cilin e kanë marrë me shugurimin meshtarak, të mund ta rrezatojnë sa më shumë.

Mësoji besimtarët që në mënyrë të denjë dhe të fuqishme të mund ta marrin pjesë në tryezën e fjalës dhe të Korpit të Krishtit,

— në mënyrë që çka marrin me fe, ta ruajnë me sjellje dhe me jetë.

Bëj që me dhuratën tënde të mund ta njohim dinjitetin njerëzor të shëlbuar me Gjakun e Birit tënd

— dhe të nderojmë lirinë dhe ndërgjegjen e çdo njeriu-vëlla.

Bëj që njerëzit t'i frenojnë dëshirat e shfrenuara për gjëra materiale

— dhe ndihmoju gjithë atyre që kanë nevojë për Ty.

Ki mëshirë për ata besimtarë që sot kanë kaluar nga kjo jetë te Ti

— dhe jepua dhuratën e lumturisë së amshuar.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   Po të lutemi, o Zot, priju veprave tona me hirin tënd dhe përcilli me ndihmën tënde, kështu që, veprimtaria jonë të zë fill prej teje dhe me ndihmën tënde, të kryhet. Nëpër Zotin...

 

   Përfundimi i Orës sikurse në Shërbesën e rëndomtë.