Mbrëmësorja

kreshmët – e premte pas të mërkurës përhime

 

Mbrëmësorja

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen.

 

   Himni

 

   O Jezus, je themeluesi

   i agjërimit të kreshmëve,

   mëngjillet na i mësove

   për shërim të mendjeve.

 

   Bëju tashti krah Kishës,

   pendesës qëndroji pranë,

   shtrirë përdhe të lutemi

   të falësh mëkatet tanë.

 

   Ti fajet e ribëra

   shlyeji me hirin tënd,

   e rojën kah e ardhmja

   me shumë butësi përdore.

 

   Të shpërblyer nga veprat

   vjetore të pendimit,

   të shkojmë në gëzimet e Pashkëve

   të denja për kremtimin.

 

   Ty gjithësia e sendeve

   Të adhuroftë, Trini e mëshirshme,

   Me faljen tënde të përtërirë,

   të këndojmë një këngë të re. Amen.

 

Ant. 1 Çdo ditë të bekoj, o Zot, i kujtoj veprat e dashurisë sate.

 

Psalmi 145 /144/ I (1-13)

 

   Lavdi Lartmadhërisë hyjnore

 

   E pashqyrtueshme është pasuria e Krishtit. E del në dritë para të gjithëve me anë të Kishës të synuar qysh prej amshimit e të zbatuar nëpër Jezu Krishtin, Zotërinë tonë (Krh. Ef 3, 8-11).

 

Do të të lartësoj, o Mbret, Hyji im, *

   dhe do ta bekoj Emrin tënd përgjithmonë e jetë.

Çdo ditë do të të bekoj *

   dhe do ta lavdëroj Emrin tënd

   përgjithmonë e jetë.

 

Zoti është i madh e i lavdërueshëm, *

   e pashqyrtueshme është madhëria e tij!

 

Breznia breznisë do t’ia tregojë veprat e tua *

   dhe do ta shpallin pushtetin tënd.

Do ta shpallin madhërinë e shenjtërisë sate, *

   do t’i tregojnë mrekullitë e tua.

 

Do ta tregojnë fuqinë e veprave të tua të tmerrshme, *

   do t’i kumtojnë veprat e madhërishme të tuat.

Do ta përhapin kujtimin e hirësisë sate të madhe, *

   do t’i brohorisin drejtësisë sate.

 

Zoti është vetë butësia e mëshira, *

   i ngadalshëm në zemërim dhe plot dashuri.

Zoti është i mirë për të gjithë, *

   i dhimbshëm për të gjitha krijesat e veta.

 

Le të të lavdërojnë, o Zot, të gjitha veprat e tua *

   e le të të bekojnë shenjtërit e tu.

Le ta tregojnë lavdinë e Mbretërisë sate, *

   le të kuvendin për pushtetin tënd,

 

për t’ua shpallur njerëzve gjithëpushtetësinë tënde *

   dhe lavdinë e madhërisë së mbretërisë sate.

Mbretëria jote është mbretëri e amshueshme, *

   pushteti yt prej breznie në brezni.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Çdo ditë të bekoj, o Zot, i kujtoj veprat e dashurisë sate.

 

Ant. 2 Sytë e të gjithëve janë drejtuar me shpresë te ti, o Zot.

 

Psalmi 145 /144/ II (14-21)

 

   Mbretëria jote është mbretëri e amshuar

 

   Qoftë bekuar Hyji. Ati i Zotit tonë Jezu Krishtit (Ef 1, 3).

 

Besnik është Zoti në gjitha premtimet e veta, *

   i shenjtë në të gjitha veprat e veta.

Zoti ua jep dorën atyre që u merren këmbët, *

   i çon ata që rrëzohen.

 

Sytë e të gjithëve shpresojnë në ty, *

   ti u jep ushqim në kohën e duhur.

Ti e hap dorën tënde *

   dhe mbush me të mira çdo gjë të gjallë.

 

I drejtë është Zoti në të gjitha udhët e veta *

   dhe i shenjtë në të gjitha veprat e veta.

Zoti është afër të gjithë atyre që e thërrasin, *

   të gjithë atyre që e thërrasin me çiltëri.

 

E plotëson dëshirën e atyre që e druajnë, *

   ua dëgjon britmën dhe i shpëton.

Zoti i ruan të gjithë ata që e duan, *

   kurse të paudhët të gjithë do t’i shuajë.

 

Goja ime do ta shfaqë lavdinë e Zotit, †

   çdo njeri do ta bekojë Emrin e tij të shenjtë *

   përgjithmonë e jetë.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Sytë e të gjithëve janë drejtuar me shpresë te ti, o Zot.

 

Ant. 3 Të drejta dhe të vërteta janë udhët e tua, o Mbret i popujve!

 

Kënga Krh. Zb 15, 3-4

 

   Himn adhurimi dhe lavdi

 

Të mëdha dhe të madhërueshme janë veprat e tua, †

   o Zot, Hyj, o i Gjithëpushtetshëm! *

   Të drejta dhe të vërteta janë udhët e tua,

   o Mbreti i popujve!

 

Kush të mos të druajë ty, o Zot, †

   dhe kush të mos e lavdërojë Emrin tënd?! *

   Ti i vetmi, je Shenjti!

 

Të gjitha kombet do të vijnë †

   dhe do të adhurojnë para Teje, *

   sepse Gjyqet e tua u dëftuan të drejta!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Të drejta dhe të vërteta janë udhët e tua, o Mbret i popujve!

 

   Leximi i shkurtër Jak 5, 16. 19-20

 

   Rrëfeni mëkatet njëri-tjetrit dhe lutuni për njëri-tjetrin që të shëroheni! Urata e të drejtit ka shumë fuqi kur thuhet me gjithë zemër.

   Vëllezërit e mi, në qoftë se ndonjë prej jush e lë Udhën e së Vërtetës, por nëse ndokush e kthen, le ta dini se kush e kthen mëkatarin prej udhës së gabuar do të (ia) shëlbojë shpirtin nga vdekja dhe do të bëjë të zhduket një shumicë mëkatesh.

 

   Përgjigjja e shkurtër

 

   C Lum njeriu që kujdeset për të dobëtin:

   * Zoti do të kujdeset për të.

   Lum njeriu që kujdeset për të dobëtin: Zoti do të kujdeset për të.

   D Do të bëjë që të jetojë i lumtur mbi tokë:

   Zoti do të kujdeset për të.

   Lavdi Atit e Birit e Shpirtit Shenjt.

   Lum njeriu që kujdeset për të dobëtin: Zoti do të kujdeset për të.

 

   Kënga ungjillore (Magnificat Lk 1, 46-55)

 

   Ant. Dasmorët do të agjërojnë, kur t’ua rrëmbejnë dhëndrin.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

   Ant. Dasmorët do të agjërojnë, kur t’ua rrëmbejnë dhëndrin.

 

   Lutjet e besimtarëve

 

Shëlbuesi i botës, Jezu Krishti, me vdekjen e vet e shkatërroi vdekjen tonë dhe me ngjalljen e vet e përtëriu jetën. Atë ta adhurojmë dhe sinqerisht ta lusim:

 

   Shuguroje popullin të cilin e ke shëlbuar me gjakun tënd.

 

Shëlbuesi ynë Jezu Krisht, bëj që me kthimin nga mëkatet dhe me pendesë të përhershme të marrim pjesë në mundimet e tua

— kështu që të mund të marrim pjesë edhe në lumturinë e amshuar.

Bëj që ta fitojmë mbrojtjen e Nënës sate, Ngushëllueses së të pikëlluarve,

— që ta meritojmë atë ngushëllim me të cilin mund të na ngushëllosh vetëm Ti.

Bëj që besimtarët e tu të bëhen pjesëmarrës në mundimet e Tua në çastet e vështira të jetës

— në mënyrë që ta dëftojnë me jetë shëlbimin tënd.

E përule vetveten duke u bërë i dëgjueshëm deri në vdekje, mu deri në vdekje në kryq

— bëj që shërbëtorët e tu të bëhen të dëgjueshëm, të durueshëm dhe të qëndrueshëm.

Me dhuratën tënde ke bërë që trupat e të vdekurve të bëhen të ngjashëm me Trupin tënd të famshëm

— bëj që edhe ne të bëhemi pjesëmarrës të lumturisë së tyre.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   Përcilli me mirësi, po të lutemi, o Zot, veprat e pendesës që kemi filluar, kështu që, pendesës, të cilën e ushtrojmë përjashta, t’i përgjigjet përmirësimi i brendshëm i shpirtit. Nëpër Zotin...

 

   Përfundimi i Orës sikurse në Shërbesën e rëndomtë.