Mbrëmësorja

25 Dhjetor – Kërshëndellat

 

Mbrëmësorja II

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

 ashtu tash e përgjithmonë e jetës. Amen.

 

   Himni

 

   O Krisht, Shëlbuesi i t’gjithëve,

   prej Atit, Bir i vetëm,

   veç ti para fillimit

   u linde e me gojë s’shprehet.

 

   Ti dritë, shkëlqim i Atit,

   ti shpresë për jetën e t’gjithëve,

   dëgjo lutjet që nxjerrin

   shërbëtorët tu nëpër botë.

 

   Kujto, o Autor shëlbimi

   se dikur more trajtën

   e trupit tonë, kur t’lindi

   një Virgjër e paprekur.

 

   Dëshmon kjo ditë e tashme

   që rrjedh në rreth të vitit,

   veç ti nga froni i Atit

   erdhe shpëtim për botën.

 

   Këtë qielli, toka e deti,

   çdo gjë që ndër to ndodhet,

   ty autor të ardhjes sate

   lavdërojnë me këngë të hareshme.

 

   Dhe ne që u shpërblyem

   me gjakun tënd të shenjtë,

   n’ditën e lindjes sate

   bashkë himn të ri këndojmë.

 

   Ty të qoftë lavdia, o Jezus,

   që u linde nga Nënë Virgjër

   me Atin e me Shpirtin

   jetëdhënës në shekujt e shekujve. Amen.

 

   Ose një himn tjetër apo një këngë e përshtatshme e miratuar nga autoritetet kishtare.

 

Ant. 1 Ty të qoftë mbretëria në ditën e lavdisë sate: në shkëlqim e në shenjtëri Hyji të lindi para agimit.

 

    Psalmi 110 /109/ (1-5. 7)

 

I tha Zoti Zotit tim: *

   »Rri në të djathtën time,

derisa t’i vë armiqtë e tu *

   shtrojë për këmbët e tua!«

 

Skeptrin e pushtetit tënd Zoti do ta shtrijë nga Sioni: *

   sundo midis armiqve të tu!

 

Ty të përket më i larti pushtet *

   në ditën e fuqisë sate

në shkëlqime të shenjta *

   nga kraharori para Yllit të Dritës

   unë të linda.

 

Zoti u përbetua, assesi s’do të pendohet: *

   Ti je prift për amshim

   në mënyrën e Melkizedekut«.

 

Zoti është në të djathtën tënde, *

   i dërrmon mbretërit ditën e zemërimit të vet.

 

Në udhëtim ujë do të pijë prej përroit, *

   prandaj lart do ta ngrejë kokën.

 

Ant. 1 Ty të qoftë mbretëria në ditën e lavdisë sate: në shkëlqim e në shenjtëri Hyji të lindi para agimit.

 

Ant. 2 Te Zoti është mëshira, shëlbimi i tij është i madh.

 

    Psalmi 130 /129/ (1-8)

 

Prej humnerës klitha te ti, o Zot, *

   o Zot, dëgjoje britmën time!

Le ta dëgjojnë veshët e tu, *

   zërin e lutjes sime.

 

Nëse do t’i mbash mend paudhësitë, o Zot, *

   o Zot, e kush do të qëndrojë para teje? –

Por te ti gjendet falja *

   që të dimë të të druajmë.

 

Shpresoj në ty, o Zot, *

   shpirti im shpreson në premtimin e tij.

E pret shpirti im Zotin *

   më tepër se rojtarët agimin.

 

Më tepër se rojtarët agimin *

   le të shpresojë Izraeli në Zotin,

sepse te Zoti është mëshira *

   dhe i madh është tek Ai shpërblimi.

 

Ai do ta nxjerrë Izraelin *

   prej të gjitha paudhësive të tija.

 

Ant. 2 Te Zoti është mëshira shëlbimi i tij është i madh.

 

Ant. 3 Qysh në fillim, para shekujve, Fjala ishte Hyj: Shëlbues i botës.

 

    Kënga Krh. Kol 1, 3. 12-20

 

E falënderojmë Hyjin, *

   Atin e Zotit tonë Jezu Krishtit,

sepse na bëri të aftë të kemi pjesë *

   në trashëgimin e shenjtërve në dritë.

 

Ai na nxori nga pushteti i errësirës *

   dhe na kaloi në Mbretërinë e Birit të vet të dashur,

në të cilin kemi shpërblimin *

   - faljen e mëkateve.

 

Ai është shëmbëllesa e Hyjit të papashëm, *

   i Parëlinduri - para çdo krijese.

Ai është para çdo gjëje *

   dhe çdo gjë qëndron në Të.

 

Gjithçka u krijua nëpër Të dhe për Të *

   në qiell e në dhé,

   çka shihet e çka nuk shihet.

 

Ai është Kryet e Trupit - Kishës; *

   Ai është Fillimi,

i Parëlinduri ndër të vdekurit *

   - që të jetë në gjithçka i Pari.

 

Sepse Hyjit i pëlqeu

   të banojë në Të e tërë Plotësia *

   dhe, me anë të Tij, gjithçka të pajtohet me të.

 

Në saje të Gjakut të kryqit të Tij, †

   Hyji vendosi paqen me krijesat e veta *

   qoftë në tokë qoftë në qiell.

 

Ant. 3 Qysh në fillim, para shekujve, Fjala ishte Hyj: Shëlbues i botës.

 

   Leximi i shkurtër 1 Gjn 1, 1-3

 

   Çka ishte qysh në fillim, çka dëgjuam çka pamë me sytë tanë, çka soditëm dhe duart tona prekën, në lidhje me Fjalën e jetës, - po, Jeta u shfaq, ne e pamë dhe dëshmojmë dhe ju kumtojmë Jetën e pasosur, që ishte te Ati dhe na u shfaq neve - çka pamë e dëgjuam po jua kumtojmë edhe juve që edhe ju të keni bashkësi me ne. E bashkësia jonë është me Atin dhe me Birin e tij, Jezu Krishtin.

 

   Përgjigjja e shkurtër

 

   C Fjala e Zotit u bë njeri * aleluja, aleluja.

   Fjala e Zotit u bë njeri aleluja, aleluja.

   D Dhe banoi ndër ne,

   aleluja, aleluja.

   Lavdi Atit e Birit e Shpirtit Shenjt.

   Fjala e Zotit u bë njeri aleluja, aleluja.

 

   Kënga ungjillore (Magnificat Lk 1, 46-55)

 

   Ant. Sot lindi Krishti, u shfaq Shpëtimtari; sot mbi tokë këndojnë engjëjt dhe gëzohen kryeengjëjt; sot galdojnë të drejtët, dhe brohorasin me gëzim: Lavdi Hyjit në më të lartin qiell, aleluja.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvuajturit.

 

Me të mira i mbushi ata që s'kishin ç'të hanë

   e të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

   Ant. Sot lindi Krishti, u shfaq Shpëtimtari; sot mbi tokë këndojnë engjëjt dhe gëzohen kryeengjëjt; sot galdojnë të drejtët, dhe brohorasin me gëzim: Lavdi Hyjit në më të lartin qiell, aleluja.

 

   Lutjet e besimtarëve

 

Me gëzim ta lavdërojmë Krishtin. Në lindjen e tij engjëjt i kumtuan paqen botës, prandaj t’i drejtohemi me lutje:

 

   Lindja jote, o Zot, le të na sjellë paqe të gjithëve.

 

O Zot, me çdo të mirë mbushe Kishën tënde:

—   të cilën e ngushëllon me misterin e lindjes sate.

Bari dhe prijës i shpirtrave tanë,

—   bëj që papa dhe ipeshkvijtë tanë të jenë ndarës besnikë të hireve të tua të shumëfishta.

Mbret i amshuar, ti u linde në kohë, për një kohë jetove dhe deshe ta provosh jetëshkurtësinë njerëzore:

—   bëj që ne, të dobëtit dhe të vdekshmit, të jemi pjesëtarë të amshimit tënd.

Shekujt të pritën dhe ti na erdhe në plotësimin e kohës:

—   tregojua praninë tënde atyre të cilët ende të presin.

Ti u bëre njeri dhe e përtërive natyrën njerëzore të shkatërruar me mëkat:

—   bëj që të ndjerët të përngjasojnë ty.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   O Hyj, ti që denjësinë e natyrës njerëzore e trajtove mrekullisht, dhe mrekullisht e përtërive, bëj, po të lutemi, të bëhemi pjesëtarë të Hyjnisë së Jezu Krishtit, i cili u denjua të marrë pjesë në natyrën tonë njerëzore. Ai që jeton e mbretëron me ty në shekuj të shekujve. Amen.

 

   Përpos në të kremte dhe të dielën e Familjes Shenjte, gjatë Tetëditëshit të Krishtlindjes kremtohet gjithmonë Mbrëmësorja e ditës së Tetëditëshit, në mënyrën që është e paraqitur për çdo ditë përkatëse, dhe kjo pa marrë parasysh Orët tjera, që mund të jenë të festave që kremtohet në ditë të ndryshme.

   Për çdo ditë thuhet Pasmbrëmësorja e së dielës, e para ose e dyta (fq. 955, ose 958).

 

            Përfundimi i Orës, sikurse në Shërbesën e rëndomtë.