Mbrëmësorja
Java e Pestë e Kohës së rëndomtë
Java I e Psalterit
E diele
Mbrëmësorja I
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. (K. P. aleluja).
Himni
O Zot, krijues i të gjithave
drejtues në botë, që ditën
e vesh me dritë të hijshme
e me hir të gjumit natën,
Prehja gjymtyrëve të këputura
t’u kthejë zellin e punës,
të lehtësojë mendjet e lodhura,
të heqë gjëmat ngashëruese.
Falë ditës që kaloi,
e uratëve në natë të re,
ndihmo fajtorët me anë të premtimit
me këngë shpalosim himnin.
Thellësisht të këndoftë zemra,
për Ty zëri të kumbojë,
Të dashtë dëshira e pastër,
t’adhuroftë mendja e përkorë.
Kur errësira e madhe
me net të mbulojë ditën,
feja të mos njohë terrin,
nga feja shkëlqeftë nata.
Na ruaj, Atë plot drejtësi,
dhe, o Bir, baras me Atin
bashkë me Shpirtin Ngushëllues,
që n’jetë të jetës je sundues. Amen.
Ose një himn tjetër, apo një këngë e miratuar nga autoritetet kishtare.
Ant. 1 Porsi tymi i kemit, u ngrittë lutja ime drejt teje, o Zot.
Psalmi 141 /140/ (1-9) Lutja në rrezik
Nga dora e engjëllit tymi i erëndshëm i kemit u ngrit para Hyjit bashkë me uratat e shenjtërve (Zb 8, 4).
O Zot, klitha drejt teje, eja më të shpejt tek unë! *
Dëgjoje zërin tim kur thërras drejt teje!
U ngrittë lutja ime si tymi i kemit në praninë tënde, *
lartësimi i duarve të mia porsi flija e mbrëmjes.
Vërja rojën, o Zot, gojës sime, *
edhe rojtarët në derë të buzëve të mia.
Mos lejo të priret zemra ime në punë të këqija †
për të sendërtuar punë të liga me njerëz të paudhë *
që të mos i shijoj kënaqësitë e tyre.
Le të më rrahë i drejti: kjo është mëshirë,
le të më qortojë, †
por vaji i mëkatarit mos e leftë kokën time, *
por paça uratën përballë mbrapshtisë së tyre!
Kur nga gremina t’i plandosin gjyqtarët e tyre *
do të shohin sa të ëmbla kanë qenë fjalët e mia.
Porsi ashklat e latuesit e të prerësit nëpër tokë *
shpërndahen eshtrat e tyre grykës së Nëntokës!
Te ti, o Zot, Hyji im, janë sytë e mi, *
ty të rashë ndore, mos lejo të birret shpirti im.
Më ruaj prej grackës që ma kanë ngrehur, *
prej pengesave të atyre që bëjnë të keqen.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Doksologjia Lavdí Atit ... thuhet në fund të çdo psalmi dhe kënge, nëse nuk ka ndonjë udhëzim tjetër.
Ant. 1 Porsi tymi i kemit, u ngrittë lutja ime drejt teje, o Zot.
Ant. 2 Ti, o Zot, je strehimi im, prona ime në tokën e të gjallëve.
Psalmi 142 /141/ (2-8) Ti je strehimi im
Krishti në mundim thërret Atin: “Abbà, Atë! Largoje prej meje këtë gotë...” (Mk 14, 36) dhe kërkon ringjalljen mbi të cilën Kisha e shenjtërve e rrënjos fenë e saj. (Krh. Cassiodoro)
Me gjithë zë e thërras Zotin në kushtrim, *
me sa zë kam Zotin e përbej,
para tij zhgrehem në vajtimin tim, *
para tij e qes shtrëngimin tim.
Megjithëse shpirti im po meket në mua, *
ti e njeh udhën time.
Udhës nga më duhej të kaloja *
ma ngrehën grackën.
Shikoja djathtas e shihja: *
s’ ishte askush që të më njihte!
Askund shteg shpëtimi *
dhe s’është askush që të kujdeset për jetën time!
Atëherë të thirra në ndihmë, o Zot, †
e thashë: »Ti je strehimi im, *
ti je pjesa ime në tokën e të gjallëve.
Vështroji britmat e mia, *
sepse jam përvujtëruar për së tepërmi.
Më liro prej salvuesve të mi, *
sepse janë më të fortë se unë.
Nxirre shpirtin tim prej rrethimit *
që ta lavdëroj Emrin tënd.
Rreth meje do të bashkohen të drejtët *
nëse mirësisht do të kujdesesh për mua.«
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Ti, o Zot, je strehimi im, prona ime në tokën e të gjallëve.
Ant. 3 Jezusi e përuli vetveten deri në vdekje; prandaj Hyji e lartësoi në lavdí.
Kënga Fil 2, 6-11 Krishti, shërbëtor i Hyjit
Krishti Jezus, edhe pse me natyrë Hyj, *
barazinë e vet me Të
nuk e çmoi si një visar që s’mundet pa të,
por ia mohoi vetvetes *
e mori natyrën e shërbëtorit
dhe u bë i ngjashëm me njerëz
dhe, për kah pamja e jashtme, *
dukej vetëm njeri.
E përuli vetveten
duke u bërë i dëgjueshëm deri në vdekje,*
mu deri në vdekje në kryq.
Prandaj edhe Hyji e lartësoi tesve *
dhe i dha Emrin që është mbi çdo emër
që në Emër të Jezusit të përkulet çdo gju *
i atyre që janë në qiell, në tokë e në nëntokë
dhe çdo gjuhë të dëshmojë: *
‘Jezu Krishti është Zot!’
Në nder të Hyjit Atë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Jezusi e përuli vetveten deri në vdekje; prandaj Hyji e lartësoi në lavdí.
Leximi i shkurtër Rom 11, 33-36
O thellësi e pasurisë, e urtisë dhe e dijes së Hyjit! Sa të pavëzhgueshme janë gjyqet e tija, sa të pashqyrtueshme janë udhët e tija! E njëmend, 'kush e njohu mendimin e Zotit? Kush iu bë Atij këshilltar? Kush i dha Atij më parë që të jetë detyrë t'i kthehet?' (Is 40, 13; Jer 13, 18; Jb 41, 3) Sepse, gjithçka është, është prej Tij, nëpër Të dhe për Të. Qoftë lavdëruar përgjithmonë e jetës! Amen!
Përgjigjja e shkurtër
C Sa të mëdha janë * veprat e tua, o Zot!
Sa të mëdha janë veprat e tua, o Zot!
D Ti i bëre me mirësi dhe urti
veprat e tua, o Zot!
Lavdi Atit e Birit e Shpirtit Shenjt.
Sa të mëdha janë veprat e tua, o Zot!
Kënga ungjillore (Magnificat Lk 1, 46-55)
Viti A:
Ant. Jini porsi dritëza, që u bën dritë të gjithëve në shtëpi.
Viti B:
Ant. Në mbrëmje, me të perënduar të diellit, ia sollën para të gjithë të sëmurët dhe të djallosurit: dhe ai i shëronte.
Viti C:
Ant. Populli po shtyhej rreth Zotërisë, për ta dëgjuar fjalën e Hyjit.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvuajturit.
Me të mira i mbushi ata që s'kishin ç'të hanë
e të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Viti A:
Ant. Jini porsi dritëza, që u bën dritë të gjithëve në shtëpi.
Viti B:
Ant. Në mbrëmje, me të perënduar të diellit, ia sollën para të gjithë të sëmurët dhe të djallosurit: dhe ai i shëronte.
Viti C:
Ant. Populli po shtyhej rreth Zotërisë, për ta dëgjuar fjalën e Hyjit.
Lutjet e besimtarëve
Ta lavdërojmë një të vetmin Zot: Atin, Birin e Shpirtin Shenjt dhe t’i lutemi me gjithë zemër:
Rri, o Zot, me popullin tënd
O Zot i shenjtë, Atë i gjithëpushtetshëm, bëj që në tokën tonë të mbijë drejtësia:
— dhe populli yt të gëzojë plotësinë e vëllazërimit e të paqes.
Bëj që të gjithë popujt të hyjnë në Mbretërinë tënde:
— kështu që të shëlbohen të gjithë njerëzit dhe kombet.
Bëj që bashkëshortët të qëndrojnë në paqen tënde dhe të kryejnë vullnetin tënd:
— dhe përherë të jetojnë në dashuri ndaj njëri-tjetrit.
O Zot, shpërbleji të gjithë bamirësit tanë
— dhe jepu atyre jetën e pasosur.
Shikoji me mirësi të gjithë ata që humbin jetën në luftë apo janë viktima të urrejtjes njerëzore:
— pranoji në paqen qiellore.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
Ruaje, po të lutemi, o Zot, me dashuri të vazhdueshme këtë familje, dhe, pasi kjo mbështetet vetëm në shpresën e hirit tënd, ta gëzojë gjithherë ndihmën e mbrojtjes sate. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve. Amen.
Përfundimi i Orës sikurse në Shërbesën e rëndomtë.