Mbrëmësorja
Java e Pestë e Kohës së rëndomtë
Java I e Psalterit
E hënë
Mbrëmësorja
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. (K. P. aleluja).
O Autori i madh i qiellit,
që të mos trazojnë të përzierat
ke ndarë rrjedhat e ujit,
dhe cak i vure qiellit.
Me qiellorë forcon vendin,
në një kohë përrenjtë e tokës,
që uji të zbusë flakët,
të mos çajë truallin e tokës.
Zbraz tash, o tejet i shenjti,
dhuntinë e hirit të pashtershëm,
të mos prishë gabimi i vjetër
me raste mashtrimesh të reja.
Besimi ta gjejë dritën,
të sjellë llambën ndriçuese,
të tmerrojë gjithë kotësitë,
mos ta shtypë asnjë gënjeshtër.
Shfaqe, o Atë krejt i shenjtë,
Ti, o Bir, baras me Atin,
me Shpirtin Ngushëllimtar,
që mbretëron n’amshim. Amen.
Ose një himn tjetër, apo një këngë e miratuar nga autoritetet kishtare.
Ant. 1 I drejtë është Zoti, njerëzit e drejtë do ta shohin fytyrën e tij.
Psalmi 11 /10/ (1-7) Shpresa e të drejtit është në Zotin
Lum ata që kanë uri e etje për drejtësi sepse do të ngihen (Mt 5, 6).
Jam ndore të Zotit!
Përse atëherë i thoni shpirtit tim: *
»Fluturo si shpend në mal!
Ja, bakëqijtë harkun e shtrënguan, †
mbi kordë shigjetën vendosën *
për t’i shigjetuar fshehtas të drejtët.
Kur themelet janë të luhatura, *
çfarë mund të bëjë i drejti?«
Zoti është në Tempullin e vet të shenjtë, *
Zoti fronin e ka në qiell.
Sytë e tij vëzhgojnë të vobektin, *
qerpikët e tij shqyrtojnë bijtë e njerëzve.
Zoti shqyrton të drejtin e të paudhin, *
ai e urren atë që e do paudhësinë.
Mbi mëkatarë do të bëjë të bjerë prush: *
zjarr, sulfur e stuhi është pjesa e trashëgimit të tyre.
Zoti është i drejtë e drejtësinë e ka për zemër: *
të drejtët do ta shikojnë fytyrën e tij.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 I drejtë është Zoti, njerëzit e drejtë do ta shohin fytyrën e tij.
Ant. 2 Lum të pastrit në zemër, sepse ata do ta shohin Zotin.
Psalmi 15 /14/ (1-5) Kush është i denjë të qëndrojë para Zotit?
I jeni afruar malit Sion, qytetit të Hyjit të gjallë (Heb 12, 22).
O Zot, e kush do të guxojë të hyjë në tendën tënde? *
Kush do të guxojë të banojë në malin tënd të shenjtë?
Vetëm ai që jeton me nder, *
që vepron me drejtësi
e prej zemrës flet të vërtetën, *
që s’i shpifet kujt me fjalë,
që të afërmin s’e dëmton, *
që shokun nuk e çnderon:
ai që bakeqin e mban për asgjë *
e i çmon ata që e druajnë Zotin,
ai që i përbehet dashamirit të vet
dhe ia mban fjalën, †
nuk jep të holla me kamatë *
e nuk merr ryshfet kundër të pafajshmit.
Kush vepron kështu *
kurrë e për këtë jetë nuk do të luhatet.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Lum të pastrit në zemër, sepse ata do ta shohin Zotin.
Ant. 3 Ati na zgjodhi në Krishtin që të jemi bij të tij.
Kënga Krh. Ef 1, 3-10 Hyji shpëtimtar
Qoftë bekuar Hyji.*
Ati i Zotit tonë Jezu Krishtit,
i cili na bekoi me çdo bekim shpirtëror *
në qiell në Krishtin.
Në Të na zgjodhi *
para krijimit të botës
që të jemi të shenjtë e të papërlyer *
para Tij në dashuri.
Ai na parashënoi për vete *
të jemi bij në shpirt
në saje të Jezu Krishtit *
me pëlqimin e vullnetit të vet
për nder të lavdisë së hirit të tij *
me të cilin na pajisi me anë të të Dashurit:
në Të, në saje të gjakut të tij, *
e fituam shpërblimin;
në Të na u falën fajet *
me anë të begatisë së hirit të tij,
të cilin Hyji e ndikoi në ne *
bashkë me çdo urti e kuptim.
Ai na vuri në dijeni *
mbi misterin e vullnetit të vet
synim që lirisht kishte vendosur *
qysh më parë ta kryente në Të
kur të plotësohej koha: *
të vërë çdo gjë nën kryesinë e Krishtit,
të gjithë qenësitë *
që janë në qiell e në tokë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Ati na zgjodhi në Krishtin që të jemi bij të tij.
Leximi i shkurtër Kol 1, 9b-11
Fitoni me çdo urti e kuptim shpirtëror njohurinë e plotë të vullnetit të Hyjit, që të jetoni në mënyrë të denjë për Zotin dhe t'i pëlqeni Atij plotësisht, duke dhënë fryte veprash të mira dhe duke përparuar në njohurinë e Hyjit, që të forcuar me çdo fuqi si i përgjigjet pushtetit të Hyjnisë së tij, të jeni të fortë e të durueshëm në çdo provë.
Përgjigjja e shkurtër
C Më shëro, o Zot, * sepse kam mëkatuar kundër teje.
Më shëro, o Zot, sepse kam mëkatuar kundër teje.
D Unë thashë: Hyji im, ki mëshirë për mua,
sepse kam mëkatuar kundër teje.
Lavdi Atit e Birit e Shpirtit Shenjt.
Më shëro, o Zot, sepse kam mëkatuar kundër teje.
Kënga ungjillore (Magnificat Lk 1, 46-55)
Ant. Shpirti im e madhëron Zotin: sepse shikoi me pëlqim mbi shërbëtoren e vet të përvuajtur.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvuajturit.
Me të mira i mbushi ata që s'kishin ç'të hanë
e të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Shpirti im e madhëron Zotin: sepse shikoi me pëlqim mbi shërbëtoren e vet të përvuajtur.
Lutjet e besimtarëve
Hyji u lidh me besëlidhje të amshuar me popullin e vet dhe pandërprerë e mbush atë me bekim. Ta falënderojmë dhe plot me shpresë t’i drejtohemi me lutje:
Bekoje, o Zot, popullin tënd!
Shëlboje, o Zot, popullin tënd
— dhe bekoje trashëgiminë tënde.
Bashkoi të gjithë ata që mburren me emrin e krishterë
— që bota të besojë në Krishtin që na e dërgove.
Tregoju hirësinë tënde dashamirëve dhe të njohurve tanë
— që të bëhen erë e këndshme e Krishtit.
Tregoju dashurinë tënde atyre që janë në shtratin e vdekjes
— që sytë e tyre të shohin shëlbimin tënd.
Tregohu i mëshirshëm ndaj të vdekurve,
— bashkoji me të gjithë ata që pushojnë në Krishtin.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
Bëj, o Hyji i amshuar, që ne, shërbëtorët e tu, t’i gëzohemi vazhdimisht shëndetit të shpirtit e të trupit dhe me ndërmjetësinë e nderueshme të shën Marisë, përherë Virgjër, të lirohemi prej trishtimit të tanishëm e të shijojmë gëzimin e amshuar. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve. Amen.
Përfundimi i Orës, sikurse në Shërbesën e rëndomtë.