Mbrëmësorja

Java e Katërt e kreshmëve – e martë

 

Mbrëmësorja

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen.

 

   Himni

 

   O Jezus, je themeluesi

   i agjërimit të kreshmëve,

   mëngjillet na i mësove

   për shërim të mendjeve.

 

   Bëju tashti krah Kishës,

   pendesës qëndroji pranë,

   shtrirë përdhe të lutemi

   të falësh mëkatet tanë.

 

   Ti fajet e ribëra

   shlyeji me hirin tënd,

   e rojën kah e ardhmja

   me shumë butësi përdore.

 

   Të shpërblyer nga veprat

   vjetore të pendimit,

   të shkojmë në gëzimet e Pashkëve

   të denja për kremtimin.

 

   Ty gjithësia e sendeve

   Të adhuroftë, Trini e mëshirshme,

   Me faljen tënde të përtërirë,

   të këndojmë një këngë të re. Amen.

 

Ant. 1 Po si mundim t’i këndojmë këngët e Zotit në dhe të huaj?

 

   Psalmi 137 /136/ (1-6) Mbi lumenjtë e Babilonisë

 

   Deri të banojmë në këtë trup, jemi të mërguar, larg Zotit; sepse jetojmë në fe e jo në pamje të Zotit (2Kor 5, 6. 7).

 

Mbi lumenj të Babilonit,

   atje rrinim e lotonim *

   e nëpër mend shkonim Sionin. –

Në shelgje, në mes të tij, *

   qestet tona në gem i varëm.

 

Shi atje shpërngulësit tanë *

   t’u këndojmë prej nesh kërkuan,

të gëzohemi shtypësit urdhëronin: *

   »Na i këndoni këngët e Sionit!«

 

Po si mundim t’i këndojmë *

   këngët e Zotit në dhe të huaj?

Oh, m’u thaftë-o krahu mua, *

   Jerusalem për në të harrofsha,

 

për qiellzë gjuha m’u kaptë mua, *

   të të kujtoj ty nëse unë pushofsha,

në mos e vënça Jerusalemin *

   mbi të gjitha gëzimet e mia!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Po si mundim t’i këndojmë këngët e Zotit në dhe të huaj?

 

Ant. 2 Ty do të të këndoj, o Zot, në praninë e engjëjve.

 

   Psalmi 138 /137/ (1-8) Himn falënderimi

 

   Mbretërit e dheut në të do ta sjellin lavdinë e vet (Zb 21, 24).

 

Me gjithë shpirt të falënderoj, o Zot, *

   sepse i dëgjove fjalët e gojës sime.

Të këndoj në praninë e engjëjve, *

   adhuroj në drejtim të Tempullit tënd të shenjtë.

 

E lavdëroj Emrin tënd †

   për dashurinë e besnikërinë tënde, *

   sepse e madhërove tesve premtimin tënd.

 

Sa herë të thirra në ndihmë, ti më vështrove, *

   shpirtit tim ia kërthndeze fuqitë.

Do të të lavdërojnë, o Zot, të gjithë mbretërit e tokës *

   sepse i dëgjuan premtimet e gojës sate.

 

Do t’i këndojnë udhët e Zotit, *

   sepse e madhe është lavdia e Zotit;

sepse i Lartë është Zoti e i shikon të përvujtët *

   e prej së largu i dallon krenarët.

 

Kur të më duhet të eci në mes të vështirësive, *

   ti ma ruaj jetën,

shtrije dorën kundër zemërimit të armiqve të mi *

   e më shpëto me të djathtën tënde.

 

Çka kam filluar, Zoti do ta kryejë për mua. †

   E amshueshme është, o Zot, mirësia jote: *

   mos e përbuz veprën e duarve të tua!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Ty do të të këndoj, o Zot, në praninë e engjëjve.

 

Ant. 3 Lavdi ty, Qengj i prerë, ty nderi dhe pushteti në shekuj.

 

   Kënga Krh. Zb 4, 11; 5, 9. 10. 12. Himni i të shëlbuarve

 

I denjë je, o Zot, Hyji ynë, *

   të marrësh lavdinë, nderin dhe pushtetin,

 

sepse ti krijove gjithçka, †

   dhe me vullnetin tënd *

   gjithçka u bë dhe u krijua!

 

Ti je i denjë, o Zot,

   të marrësh librin *

   dhe t’ia zgjidhësh vulat,

 

sepse qe prerë †

   dhe me gjakun tënd i shpërbleve për Hyjin *

   njerëzit e çdo fisi, gjuhe, populli dhe kombësie,

 

dhe i bëre për Hyjin tonë

   mbretëri dhe priftërinj *

   dhe ata do të mbretërojnë përmbi tokë.

 

I denjë është Qengji i prerë †

   të marrë pushtetin, pasurinë, dijen, *

   fuqinë, nderin, lumturinë dhe lavdinë!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Lavdi ty, Qengj i prerë, ty nderi dhe pushteti në shekuj.

 

   Leximi i shkurtër Rom 8, 5-8

 

   Ata që jetojnë nën ndikimin e trupit, jepen pas sendeve të trupit, e ata që jetojnë nën ndikimin e Shpirtit Shenjt, jepen pas sendeve shpirtërore: të bësh çka dëshiron trupi, sjell vdekjen e të bësh çka dëshiron Shpirti Shenjt, sjell jetën e paqen. Sepse, prirja e trupit është kundër Hyjit: nuk i bindet Ligjit të Hyjit, madje as nuk mundet. Ata që jetojnë nën ndikimin e trupit, nuk mund t'i pëlqejnë Hyjit.

 

   Përgjigjja e shkurtër

 

   C Na përtërij në zemër, * dhe do të jemi populli yt.

   Na përtërij në zemër, dhe do të jemi populli yt.

   D Vendos në ne, o Zot, një shpirt të ri,

   dhe do të jemi populli yt.

   Lavdi Atit e Birit e Shpirtit Shenjt.

   Na përtërij në zemër, dhe do të jemi populli yt.

 

   Kënga ungjillore (Magnificat Lk 1, 46-55)

 

Ant. Tani u shërove: mos mëkato më, që të mos të gjejë ndonjë e zezë më e madhe.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Tani u shërove: mos mëkato më, që të mos të gjejë ndonjë e zezë më e madhe.

 

   Lutjet e besimtarëve

 

Ta madhërojmë Krishtin Zot i cili i ngritur në kryq të gjithë i afroi kah vetja. Me përshpirtëri t'i drejtohemi:

 

   O Zot, tërhiqi të gjithë njerëzit kah vetja

 

O Hyj, dritë e cila ndriçon nga misteri i kryqit le t'i tërheqë të gjithë

— që të të njohin Ty, rrugën, të vërtetën dhe jetën.

Të gjithëve që kanë etje për Ty

— jepu ujin e jetës që të mos kenë etje më.

Ndriçoji të gjithë ata që kultivojnë shkencën dhe mjeshtëritë e tjera

— që t'i bëjnë njerëzit më të përshtatshëm për Mbretërinë tënde.

Ktheji të gjithë ata që për shkak të mëkateve apo shkandullit janë larguar prej teje

— që të afrohen dhe të qëndrojmë përherë në dashurinë tënde.

Të gjithë të vdekurit tanë pranoji në lumturinë tënde

— që të gëzohen përgjithmonë me të lumen Mari gjithmonë Virgjër dhe me të gjithë shenjtërit.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   Ky ushtrim kreshmor në jetën e krishterë, i përgatittë, o Zot, zemrat e besimtarëve të tu, që t’i përjetojnë si duhet misteret e Pashkëve dhe t’ua kumtojnë vëllezërve shëlbimin tënd. Nëpër Zotin.

 

   Përfundimi i Orës, sikurse në Shërbesën e rëndomtë.