Mbrëmësorja

Java e pestë e kreshmëve – e hënë

 

Mbrëmësorja

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen.

 

   Himni

 

   Dëgjo, o Krijues dashamirës,

   me lot po të lutemi,

   ndër agjërime të shenjta

   ke themeluar kreshmët.

 

   Gjurmues hyjnor i zemrave,

   që njeh dobësitë e forcave;

   atyre që kah ti kthehen

   jepu hirin e faljes.

 

   Vërtet kemi bërë shumë mëkate,

   të penduarve jepu mëshirimin,

   e me lavd të emrit tënd

   të dobëtëve jepu shërimin.

 

   Kështu trupin jashtë dërrmoje

   nënshtroja agjërimeve,

   dhe mendja e përkorë

   t’i shmanget njollës së fajeve.

 

   Ndihmo, Trini e lume,

   na lejo, Njëni e vetme,

   për të tutë të jenë të frytshme

   këto dhunti frenimi. Amen.

 

Ant. 1 I drejtë është Zoti, njerëzit e drejtë do ta shohin fytyrën e tij.

 

   Psalmi 11 /10/ (1-7) Shpresa e të drejtit është në Zotin

 

   Lum ata që kanë uri e etje për drejtësi sepse do të ngihen(Mt 5, 6).

 

Jam ndore të Zotit!

   Përse atëherë i thoni shpirtit tim: *

   »Fluturo si shpend në mal!

 

Ja, keqbërësit harkun e shtrënguan, †

   mbi kordë shigjetën vendosën *

   për t’i shigjetuar fshehtas të drejtët.

 

Kur themelet janë të luhatura, *

   çfarë mund të bëjë i drejti?«

 

Zoti është në Tempullin e vet të shenjtë, *

   Zoti fronin e ka në qiell.

 

Sytë e tij vëzhgojnë të vobektin, *

   qerpikët e tij shqyrtojnë bijtë e njerëzve.

Zoti shqyrton të drejtin e të paudhin, *

   ai e urren atë që e do paudhësinë.

 

Mbi mëkatarë do të bëjë të bjerë prush: *

   zjarr, sulfur e stuhi është pjesa e trashëgimit të tyre.

 

Zoti është i drejtë e drejtësinë e ka për zemër: *

   të drejtët do ta shikojnë fytyrën e tij.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 I drejtë është Zoti, njerëzit e drejtë do ta shohin fytyrën e tij.

 

Ant. 2 Lum të pastrit në zemër, sepse ata do ta shohin Zotin.

 

   Psalmi 15 /14/ (1-5) Kush është i denjë të qëndrojë para Zotit?

 

   I jeni afruar malit Sion, qytetit të Hyjit të gjallë (Heb 12, 22).

 

O Zot, e kush do të guxojë të hyjë në tendën tënde? *

   Kush do të guxojë të banojë në malin tënd të shenjtë?

Vetëm ai që jeton me nder, *

   që vepron me drejtësi

 

e prej zemrës flet të vërtetën, *

   që s’i shpifet kujt me fjalë,

që të afërmin s’e dëmton, *

   që shokun nuk e çnderon:

 

ai që bakeqin e mban për asgjë *

   e i çmon ata që e druajnë Zotin,

 

ai që i përbehet dashamirit të vet

   dhe ia mban fjalën, †

   nuk jep të holla me kamatë *

   e nuk merr ryshfet kundër të pafajshmit.

 

Kush vepron kështu *

   kurrë e për këtë jetë nuk do të luhatet.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Lum të pastrit në zemër, sepse ata do ta shohin Zotin.

 

Ant. 3 Në Krishtin Ati na zgjodhi që të jemi bijtë e tij.

 

   Kënga Krh. Ef 1, 3-10 Hyji shpëtimtar

 

Qoftë bekuar Hyji.*

   Ati i Zotit tonë Jezu Krishtit,

i cili na bekoi me çdo bekim shpirtëror *

   në qiell në Krishtin.

 

Në Të na zgjodhi *

   para krijimit të botës

që të jemi të shenjtë e të papërlyer *

   para Tij në dashuri.

 

Ai na parashënoi për vete *

   të jemi bij në shpirt

në saje të Jezu Krishtit *

   me pëlqimin e vullnetit të vet

 

për nderë të lavdisë së hirit të tij *

   me të cilin na pajisi me anë të të Dashurit:

në Të, në saje të gjakut të tij, *

   e fituam shpërblimin;

 

në Të na u falën fajet *

   me anë të begatisë së hirit të tij,

të cilin Hyji e ndikoi në ne *

   bashkë me çdo urti e kuptim.

 

Ai na vuri në dijeni *

   mbi misterin e vullnetit të vet

synim që lirisht kishte vendosur *

   qysh më parë ta kryente në Të

 

kur të plotësohej koha: *

   të vërë çdo gjë

   nën kryesinë e Krishtit,

të gjithë qenësitë *

   që janë në qiell e në tokë.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Në Krishtin Ati na zgjodhi që të jemi bijtë e tij.

 

   Leximi i shkurtër Rom 5, 8-9

 

   Hyji e dëftoi dashurinë e vet kundrejt nesh kështu: ndërsa ne ende ishim mëkatarë, Krishti vdiq për ne. E mbasi tani ne jemi të shfajësuar me anë të gjakut të tij, është më se e sigurt se ai do të na shpëtojë nga dënimi.

 

   Përgjigjja e shkurtër

 

   C Na e trego dashurinë tënde, o Krisht, * e ne do të shëlbohemi.

   Na e trego dashurinë tënde, o Krisht, e ne do të shëlbohemi.

   D Pastroji mëkatet tona me gjakun tënd,

   e ne do të shëlbohemi.

   Lavdi Atit e Birit e Shpirtit Shenjt.

   Na e trego dashurinë tënde, o Krisht, e ne do të shëlbohemi.

 

   Kënga ungjillore (Magnificat Lk 1, 46-55)

 

Ant. Nuk dëshmoj vetëm unë për vetvete por për mua dëshmon edhe Ati që më dërgoi.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Nuk dëshmoj vetëm unë për vetvete por për mua dëshmon edhe Ati që më dërgoi.

 

   Lutjet e besimtarëve

 

T'i drejtohemi me shpresë Jezu Krishtit, Zotit tonë, i cili na ka shëlbuar ne, popullin e vet, nga mëkatet tona:

 

   O Jezu Krisht, biri i Davidit, ki mëshirë për ne.

 

Të lutemi, o Zot, për Kishën tënde, për të cilën Ti je flijuar dhe të cilën e ke larë dhe shuguruar në ujin e fjalës së jetës

— përherë përtërije dhe pastroje me pendesë të qëndrueshme.

Mësues i mirë, tregojua të rinjve rrugën të cilën secilit ua ke caktuar

— që të shkojnë asaj rruge dhe në të të gjejnë shpëtimin.

Ti ke pasur mëshirë gjithmonë për të varfrit, zgjoje shpresën e të sëmurëve dhe shëroi nga sëmundjet e tyre

— por bëj që edhe ne të kemi më shumë kujdes për ta.

Bëj që të jemi të vetëdijshëm për dinjitetin tonë që na e ke dhënë me pagëzim

— që të jetojmë vetëm për Ty.

Jepua paqen dhe lumturinë të vdekurve

— dhe neve bashkë me ta na e bëj të mundur të mbretërojmë në lumturi.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   O Hyj, ti që me hirin tënd na pasuron me çdo bekim, bëj, po të lutemi, të shndërrohemi rrënjësisht në krijesa të reja që të bëhemi gati për lumturinë e mbretërisë qiellore. Nëpër Zotin.

 

Përfundimi i Orës, sikurse në Shërbesën e rëndomtë.