Mbrëmësorja
25 mars, Lajmërimi i lindjes së Krishtit
Mbrëmësorja I
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. (K. P. aleluja).
Himni
E ta marrë vesh mbarë shekulli
se ka ardhë çmimi i jetës;
pas zgjedhës s’armikut t’egër
botës iu duk shëlbimi.
Çka priu me këngë Isaia
u plotësuan në Virgjërën,
e çka lajmëroi kryengjëlli,
Shpirti i Shenjtë përmbushi.
Në krahëror zuri Maria
nga farë e fjalës besnike:
atë që s’përfshin tërë bota,
e mbart ama e një vashe.
Çka ndohti Adami i vjetër,
e lau Adami i ri,
çka ai flaku me kreni,
ky e ngriti shumë kokulur.
Çdo lavdi i qoftë Krishtit,
Birit të Hyjit, Atë Qiellor,
ngjizur në të lumen Virgjër
nën hije të Shpirtit Shenjt. Amen.
Ose një himn tjetër apo një këngë e përshtatshme e miratuar nga autoritetet kishtare.
Ant. 1 Një pinjoll do të dalë nga trungu i Jeseut, një pip i zgjedhur do të piptojë nga rrënja e tij. Në të do të pushojë Shpirti i Hyjit (K.P. aleluja).
Psalmi 113 /112/ (1-9)
Lavdërojeni, shërbëtorët e Zotit, *
lavdërojeni, Emrin e Zotit!
Qoftë bekuar Emri i Zotit *
qysh tash e deri në amshim,
Që kur lind dielli e derisa perëndon *
qoftë bekuar Emri i Zotit!
I madhërueshëm është Zoti mbi të gjithë popujt, *
lavdia e tij i tejkalon qiejt
Kush është si Zoti, Hyji ynë, †
që fronin e ka në Lartësi, *
e nga lart vrojton qiellin e tokën?
Nga pluhuri e ngre skamnorin, *
nga llomi e lartëson të vobektin
për ta vënë të rrijë me princa, *
me princat e popullit të vet.
Ai bën të banojë beronja në shtëpi të vet *
nënë fëmijësh të gëzueshme.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Një pinjoll do të dalë nga trungu i Jeseut, një pip i zgjedhur do të piptojë nga rrënja e tij. Në të do të pushojë Shpirti i Hyjit (K.P. aleluja).
Ant. 2 Zoti do t’i japë fronin e Davidit, atit të tij, dhe ai do të mbretërojë për amshim (K.P. aleluja).
Psalmi 147 (1-9)
Lavdëroje, Jerusalem, Zotin, *
madhëroje, o Sion, Hyjin tënd!
Sepse i forcoi shulat e dyerve të tua, *
i bekoi bijtë e tu në ty!
Ai ua siguron kufijve të tu paqen, *
ai të ushqen me palcën e grurit.
Ai e dërgon fjalën e vet mbi tokë, *
lajmi i tij vrapon me shpejtësi.
E hedh borën porsi lesh, *
e derdh brymën porsi hi.
E lëshon breshrin porsi kafshatë, *
kush mund të qëndrojë para të ftohtit të tij?
E dërgon fjalën e vet e ato shkrihen, *
çon erën e vet e ujërat rrjedhin.
Ai ia zbulon fjalën e vet Jakobit, *
drejtësitë e gjyqet e veta Izraelit.
Nuk bëri kështu me asnjë komb tjetër: *
asnjërit nuk ia zbuloi vendimet e veta.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Zoti do t’i japë fronin e Davidit, atit të tij, dhe ai do të mbretërojë për amshim (K.P. aleluja).
Ant. 3 Sot Fjala e amshuar, e lindur prej Atit para të gjithë shekujve, e përuli vetveten, dhe u bë një njeri i vdekshëm (K.P. aleluja).
Kënga Fil 2, 6-11
Krishti Jezus, edhe pse me natyrë Hyj, *
barazinë e vet me Të
nuk e çmoi si një visar që s’mundet pa të,
por ia mohoi vetvetes *
e mori natyrën e shërbëtorit
dhe u bë i ngjashëm me njerëz
dhe, për kah pamja e jashtme, *
dukej vetëm njeri.
E përuli vetveten
duke u bërë i dëgjueshëm deri në vdekje, *
mu deri në vdekje në kryq.
Prandaj edhe Hyji e lartësoi tesve *
dhe i dha Emrin që është mbi çdo emër
që në Emër të Jezusit të përkulet çdo gju *
i atyre që janë në qiell, në tokë e në nëntokë
dhe çdo gjuhë të dëshmojë: *
‘Jezu Krishti është Zot!’
Në nder të Hyjit Atë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Sot Fjala e amshuar, e lindur prej Atit para të gjithë shekujve, e përuli vetveten, dhe u bë një njeri i vdekshëm (K.P. aleluja).
Leximi i shkurtër 1 Gjn 1, 1-3a
Çka ishte qysh në fillim, çka dëgjuam, çka pamë me sytë tanë, çka soditëm dhe duart tona prekën, në lidhje me Fjalën e jetës, - po, Jeta u shfaq, ne e pamë dhe dëshmojmë dhe ju kumtojmë Jetën e pasosur, që ishte te Ati dhe na u shfaq neve - çka pamë e dëgjuam po jua kumtojmë edhe juve që edhe ju të keni bashkësi me ne.
Përgjigjja e shkurtër
C Një pinjoll do të dalë nga Jeseu * një yll nga Jakobi.
Një pinjoll do të dalë nga Jeseu, një yll nga Jakobi.
D Nga Virgjëra do të lindë Shëlbuesi,
një yll nga Jakobi.
Lavdi Atit e Birit e Shpirtit Shenjt.
Një pinjoll do të dalë nga Jeseu, një yll nga Jakobi.
Në kohën e Pashkëve:
C Një pinjoll do të dalë nga Jeseu një yll nga Jakobi.
* Aleluja, aleluja.
Një pinjoll do të dalë nga Jeseu, një yll nga Jakobi.
Aleluja, aleluja.
D Nga Virgjëra do të lindë Shëlbuesi.
Aleluja, aleluja.
Lavdi Atit e Birit e Shpirtit Shenjt.
Një pinjoll do të dalë nga Jeseu, një yll nga Jakobi.
Aleluja, aleluja
Kënga ungjillore (Magnificat Lk 1, 46-55)
Ant. Shpirti Shenjt do të zbresë në ty e fuqia e Hyjit të tejetlartë do të të mbulojë me hijen e vet (K.P. aleluja).
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Shpirti Shenjt do të zbresë në ty e fuqia e Hyjit të tejetlartë do të të mbulojë me hijen e vet (K.P. aleluja).
Lutjet e besimtarëve
Me fe dhe me shpresë t'i brohorisim Atit të amshuar, i cili në ditën e sotme nëpërmjet engjëllit të tij ia lajmëroi Marisë shpëtimin tonë:
O Zot, na e jep hirin tënd.
Ti e zgjodhe Virgjrën Mari që të jetë nënë e Birit tënd
— ki mëshirë për të gjithë ata të cilët e presin shëlbimin e tij.
Ti i lajmërove Marisë paqe dhe gëzim nëpërmjet engjëllit Gabriel
— jepja mbarë botës gëzimin e shpëtimit dhe paqen e vërtetë.
Ti me pranimin e shërbëtores sate dhe me veprimin e Shpirtit Shenjt bëre që fjala jote të banojë ndër ne
— bëji zemrat tona të gatshme që ta pranojnë Krishtin siç e pranoi Virgjëra Mari.
Ti kujdesesh për të përvuajturit dhe të uriturit i mbush me të mira
— ngriti të dobëtit, ndihmoji ata që kanë nevojë dhe ngushëlloji ata që po vdesin.
O Zot, ti mund të bësh çdo gjë, ti i vetmi bën vepra të mrekullueshme
— na shpëto ditën e fundit kur t'i ringjallësh të vdekurit në jetën e amshuar.
Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj, ti deshe që Fjala jote të bëhej njeri i vërtetë në kraharorin e Virgjrës Mari; pasi e pranojmë atë për Shëlbues, njëherësh njeri të vërtetë e Hyj të vërtetë, bëj të jemi pjesëtarë të natyrës së tij hyjnore. Nëpër Zotin.
Përfundimi i Orës, sikurse në Shërbesën e rëndomtë.