Mbrëmësorja
Java e pestë e kreshmëve – enjte
Mbrëmësorja
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen.
Himni
O Jezus, je themeluesi
i agjërimit të kreshmëve,
mëngjillet na i mësove
për shërim të mendjeve.
Bëju tashti krah Kishës,
pendesës qëndroji pranë,
shtrirë përdhe të lutemi
të falësh mëkatet tanë.
Ti fajet e ribëra
shlyeji me hirin tënd,
e rojën kah e ardhmja
me shumë butësi përdore.
Të shpërblyer nga veprat
vjetore të pendimit,
të shkojmë në gëzimet e Pashkëve
të denja për kremtimin.
Ty gjithësia e sendeve
Të adhuroftë, Trini e mëshirshme,
Me faljen tënde të përtërirë,
të këndojmë një këngë të re. Amen.
Ant. 1 Unë të thirra në ndihmë, o Zot, e ti më shërove, do të të lavdëroj përgjithmonë.
Psalmi 30 /29/ (2-13) Falënderim për shpëtim nga vdekja
Krishti e falënderon Atin për ringjalljen e tij të lavdishme (Kasiano).
Të madhëroj, o Zot, pse më shpëtove *
e nuk lejove të ngihen armiqtë e mi mbi mua.
O Zot, Hyji im, *
unë të thirra e ti më shërove,
ti, o Zot, ma nxore shpirtin nga Nëntoka, *
më ktheve në jetë që të mos zbres në varr.
Këndoni Zotit ju, o besimtarët e tij, *
falënderojeni Emrin e shenjtë të tij!
Sepse një çast zgjat hidhërimi i tij *
e tërë jetën dashamirësia e tij!
Mbrëmja vjen me lot, *
e mëngjesi plot hare!
Kur nuk më mungonte gjë, thosha: *
»Askurrë s’do të trandem!«
Më ke vënë, o Zot, në majën e malit të sigurt, *
porse, posa ma fsheh fytyrën tënde, frikësohem.
Atëherë ty, o Zot, të lëshoja kushtrimin, *
i lutesha Hyjit tim.
Ç’dobi nga gjaku im *
në qoftë se zbres në shkatërrim?
A thua do të të lavdërojë pluhuri, *
e do ta kumtojë besnikërinë tënde?
Më dëgjoi Zoti e pati mëshirë për mua, *
Zoti u bë ndihmëtari im.
Ti vajin ma ktheve në valle, *
ma zhgjeshe grathoren time e më ngjeshe me hare,
që shpirti im të të këndojë e të mos pushojë: *
»O Zot, Hyji im, do të të lavdëroj për amshim!«
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Unë të thirra në ndihmë, o Zot, e ti më shërove, do të të lavdëroj përgjithmonë.
Ant. 2 Lum ai njeri, të cilit Zoti ia fal mëkatin.
Psalmi 32 /31/ (1-11) Falënderim për faljen e mëkateve
Davidi e shpall të lumtur atë njeri të cilin Hyji e bën të drejtë pavarësisht nga veprat (Rom 4, 6).
Lum ai që iu fal mëkati, *
që iu mbulua faji!
Lum ai njeri që Zoti nuk e numëron ndër mëkatarë, *
në shpirtin e të cilit nuk ka dredhi.
Pse heshta, eshtrat m’u kalbën *
prej dënesës së vazhdueshme,
sepse ditën, natën dora jote rëndonte mbi mua, *
fuqia më lëshonte porsi në vapë të verës.
Atëherë ta dëftova mëkatin tim, *
fajin tim më nuk e fsheha.
Thashë: »Do t’ia rrëfej Zotit fajin tim,« *
e ti ma fale fajësinë e mëkatit tim.
Prandaj le të lutet çdo besimtar *
në kohë të përshtatshme,
kur të vërshojnë ujërat e shumta, *
atë s’do ta zënë.
Ti je strehimi im, ti më ruan prej vështirësisë, *
do të më rrethosh me këngë gëzimi.
Do të të bëj të dijshëm,
do të ta mësoj rrugën që duhet ndjekur, *
sytë e mi do t’i përqendroj mbi ty.
Mos u bëni si kali e mushku
që nuk kanë mend. †
Për ta lypset kapistër e fre për t’i sunduar, *
përndryshe s’do të afroheshin tek ti.
Shumë vështirësi e rrethojnë bakeqin, *
atë që shpreson në Zotin e rrethon hiri.
Gëzohuni në Zotin e galdoni, o të drejtë, *
brohoritni të gjithë ju që jeni zemërpastër.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Lum ai njeri, të cilit Zoti ia fal mëkatin.
Ant. 3 E mori në dorë mbretërinë e vet, Zoti Hyj, Zotëruesi i gjithësisë.
Kënga Krh. Zb 11, 17-18; 12, 10b-12a Gjyqi i Zotit
Po të falënderojmë, o Zotëri,
Hyj i Gjithëpushtetshëm, *
ty që je, ty që ishe,
sepse e ushtrove fuqinë tënde të madhe *
dhe e more mbretërimin!
Paganët u hidhëruan, †
por arriti zemërimi yt! *
Erdhi koha të gjykohen të vdekurit,
koha e shpërblimit për shërbëtorët e tu *
profetët dhe shenjtërit
dhe për të gjithë ata që e druan Emrin tënd *
- për të vegjël e të mëdhenj.
Ja, tani koha e shëlbimit, †
e pushtetit dhe e Mbretërisë së Hyjit tonë *
dhe e sundimit të Krishtit të tij!
Sepse u hodh poshtë paditësi i vëllezërve tanë *
që ditë e natë i padiste para Hyjit tonë.
Por ata e mundën në fuqi të gjakut të Qengjit †
dhe në saje të dëshmisë së vet: *
nuk e deshën jetën e vet aq sa ta dronin vdekjen.
Prandaj galdo, o qiell, *
galdoni edhe ju, o qiellorë të gjithë!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 E mori në dorë mbretërinë e vet, Zoti Hyj, Zotëruesi i gjithësisë.
Leximi i shkurtër Heb 13, 12-15
Jezusi, për ta shenjtëruar popullin me gjakun e vet, pësoi jashtë derës së qytetit. Këndej, le të dalim edhe ne jashtë fushimit në takim me Të duke e marrë mbi vete poshtërimin e tij. Sepse, nuk e kemi këtu qytetin e përhershëm, por kërkojmë atë të ardhshmin. Këndej, me anë të tij t’i kushtojmë vazhdimisht Hyjit fli lavdie, d.m.th. frytin e buzëve që dëshmojnë emrin e tij.
Përgjigjja e shkurtër
C Na shëlbove, o Zot, * me gjakun tënd.
Na shëlbove, o Zot, me gjakun tënd.
D Ti bëre prej nesh
një popull mbretërish dhe meshtarë
me gjakun tënd.
Lavdi Atit e Birit e Shpirtit Shenjt.
Na shëlbove, o Zot, me gjakun tënd.
Kënga ungjillore (Magnificat Lk 1, 46-55)
Ant. Përpara se të ishte Abrahami, Unë Jam, thotë Zoti.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Përpara se të ishte Abrahami, Unë Jam, thotë Zoti.
Lutjet e besimtarëve
Krishti na e dha urdhrin e ri të dashurisë së ndërsjelltë. Prej tij, Zotit tonë, të kërkojmë edhe ne atë që na nevojitet:
O Zot, shtoje dashurinë e popullit tënd.
Mësues i mirë, na mëso Të duam në vëllezërit tanë
— dhe në ta të të bëjmë mirë Ty.
Ti në kryq prej Atit ke kërkuar falje për vrasësit tu
— bëj që edhe ne t'i duam armiqtë dhe të lutemi për përndjekësit.
Me misterin e korpit dhe të gjakut tënd, shtoje në ne dashurinë na jep forcë dhe shpresë
— të ligshtët forcoji, të pikëlluarit ngushëlloi, atyre që janë në pragun e vdekjes jepu shpresë për një jetë që nuk kalon.
Dritë e botës, ti të verbrit nga lindja me larje në ujë ua ktheve pamjen e syve
— ndriçoji ata që përgatiten për pagëzim me ujin e pagëzimit dhe fjalën e jetës.
Të vdekurit që kanë kaluar nga kjo jetë në amshim ngiji me dashurinë tënde
— dhe neve na numëro në mes të të zgjedhurve të tu.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
Ndihmoj, o Zot, dhe mbroj vazhdimisht besimtarët e tu që shpresojnë në mëshirën tënde, kështu që të pastruar prej njollës së mëkatit, të qëndrojnë në jetë shenjtërie dhe ta fitojnë trashëgimin e premtimit tënd. Nëpër Zotin.
Përfundimi i Orës, sikurse në Shërbesën e rëndomtë.