Mbrëmësorja
Java e madhe – E shtunë
Mbrëmësorja
Himni
Ti i vetmi shpëtimtar,
O Shëlbues zëmadh i botës,
nga ne, o Krisht Mbret,
prano lavdinë e Kryqit jetëdhënës.
Me vdekje ti e mposht vdekjen,
e me jetë ti dhuron jetën,
nxitësin mashtrues të vdekjes
djallin ti e kishe thyer.
Me mjeshtri të butë dashurie
dorëzuar gjumit t’varrit,
ti i hap selitë e ferrit,
e u fal lirinë gjithë etërve.
Tash në krah të djathtë të Atit
ku shkëlqen fli e shenjtëruar,
lusim, dëgjo të shpërblyerit
me gjakun tënd gjallërues.
Ty ne me atë ditë e natë
duke ndjekur me doke t’pastra,
kundër të gjitha sulmimeve
flamurin e kryqit të mbartim.
Atit, Ty e Shpirtit Shenjtë
e njëjtë lavdi ju, Jezus, qoftë,
që me fitore të kryqit
na jep përherë na jep të gëzojmë. Amen.
(Në vend të himnit mund të këndohet një këngë e miratuar nga autoritetet kishtare e që i përshtatet kohës)
Ant. 1 O vdekje, unë do të jem vdekja jote; o ferr, unë do të jem rrënimi yt.
Psalmi 116 /115/
Besoj edhe atëherë kur më duhet të them: *
“Jam i pafat për së tepërmi!”.
Në hutimin tim kam thënë: *
“Rrenacak është çdo njeri!”
Si do t’ia shpërblej Zotit *
për të gjitha të mirat që m’i ka dhënë?
Do të ngre gotën e shëlbimit *
e me nderim do të thërras Emrin e Zotit.
Do t’i kryej kushtet e mia bërë Zotit *
në praninë e mbarë popullit të tij.
E çmueshme është para Zotit *
vdekja e shenjtërve të tij.
O Zot, unë jam shërbëtori yt, †
shërbëtori yt dhe biri i shërbëtores sate. *
Ti i këpute hekurat e mi:
ty do të ta kushtoj flinë e lavdit, *
me nderim do të thërras Emrin e Zotit.
Do t’i kryej kushtet e mia bërë Zotit *
në praninë e mbarë popullit të tij,
në oborret e Shtëpisë së Zotit, *
midis teje, o Jerusalem!
Lavdi Atit e Birit
e Shpirtit Shenjt, *
si ka qenë në fillim,
ashtu tash e përgjithmonë e jetës. Amen.
Ant. 1 O vdekje, unë do të jem vdekja jote; o ferr, unë do të jem rrënimi yt.
Ant. 2 Sikurse Jona mbeti tri ditë e tri net në barkun e peshkut: kështu edhe Biri i njeriut në zemrën e tokës.
Psalmi 143 /142/ (1-11)
O Zot, dëgjoje lutjen time, †
vëri vesh sipas besnikërisë sate lutjes sime, *
më dëgjo në saje të drejtësisë sate.
Mos hyr në gjyq me shërbëtorin tënd, *
se asnjë i gjallë nuk mund të dalë i drejtë përpara teje.
Armiku e salvon shpirtin tim, *
përdhe e shtroi jetën time,
më ka lidhur në errësirë *
porsi të vdekurit e kahershëm,
shpirti im po rënkon në mua, *
të mpitë e kam zemrën në kraharor.
Më kujtohen ditët e shkuara, †
i kujtoj të gjitha veprat e tua, *
i peshoj veprat që ti i kreve.
I ngre drejt teje duart e mia, *
shpirti im si toka pa ujë ka etje për ty.
Mu përgjigj pa vonesë, o Zot, *
se mbeta pa frymë,
mos e fsheh fytyrën tënde prej meje *
të mos bëhem si ata që zbresin në varr. –
Bëj ta dëgjoj mëshirën tënde në mëngjes, *
sepse shpresën e kam vënë në ty.
Ma mëso udhën së cilës duhet të eci, *
sepse te ti e kam lartësuar shpirtin.
Më shpëto prej armiqve të mi, *
o Zot, jam ndore tënde!
Më mëso ta kryej vullnetin tënd, †
sepse ti je Hyji im. *
Shpirti yt i mirë le të më prijë në vend të drejtë,
më përtërij në jetë, o Zot, pashë Emrin tënd. *
Pashë drejtësinë tënde nxirre shpirtin tim nga shtrëngimi.
Lavdi Atit e Birit
e Shpirtit Shenjt, *
si ka qenë në fillim,
ashtu tash e përgjithmonë e jetës. Amen.
Ant. 2 Sikurse Jona mbeti tri ditë e tri net në barkun e peshkut: kështu edhe Biri i njeriut në zemrën e tokës.
Ant. 3 Shkatërrojeni këtë tempull, dhe për tri ditë kam për ta rindërtuar, thotë Zoti; fjalën e kishte për tempullin e trupit të tij.
Kënga Fil 2, 6-11
Krishti Jezus, edhe pse me natyrë Hyj, *
barazinë e vet me Të
nuk e çmoi si një visar që s’mundet pa të,
por ia mohoi vetvetes *
e mori natyrën e shërbëtorit
dhe u bë i ngjashëm me njerëz
dhe, për kah pamja e jashtme, *
dukej vetëm njeri.
E përuli vetveten
duke u bërë i dëgjueshëm deri në vdekje, *
mu deri në vdekje në kryq.
Prandaj edhe Hyji e lartësoi tesve *
dhe i dha Emrin që është mbi çdo emër
që në Emër të Jezusit të përkulet çdo gju *
i atyre që janë në qiell, në tokë e në nëntokë
dhe çdo gjuhë të dëshmojë: *
‘Jezu Krishti është Zot!’
Në nder të Hyjit Atë.
Lavdi Atit e Birit
e Shpirtit Shenjt, *
si ka qenë në fillim,
ashtu tash e përgjithmonë e jetës. Amen.
Ant. 3 Shkatërrojeni këtë tempull, dhe për tri ditë kam për ta rindërtuar, thotë Zoti; fjalën e kishte për tempullin e trupit të tij.
Leximi i shkurtër 1 Pjt 1, 18-21
Dinie mirë: nuk keni qenë shpërblyer nga mënyra e zbrazët e jetës suaj të trashëguar nga etërit me ndonjë send të shkatërrueshëm - argjend apo ar, por me gjak të paçmueshëm të Krishtit Qengjit të patëmetë e të panjollë. Ai njëmend ishte i caktuar që para krijimit të rruzullit, por u dëftua në këto kohët e fundit për arsye tuaj. Në saje të tij ju besoni në Hyjin që e ngjalli nga të vdekurit dhe i dha lavdi, kështu që feja juaj dhe shpresa të jenë në Hyjin.
Në vend të përgjigjes së shkurtër thuhet:
Ant. Krishti për ne u bë i dëgjueshëm deri në vdekje, mu deri në vdekje në kryq. Prandaj edhe Hyji e lartësoi tesve dhe i dha emrin që është mbi çdo emër.
Kënga ungjillore (Magnificat Lk 1, 46-55)
Ant. Tani u lavdërua Biri i njeriut, Hyji u lavdërua në të dhe së shpejti do ta pranojë në lavdi.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Tani u lavdërua Biri i njeriut, Hyji u lavdërua në të dhe së shpejti do ta pranojë në lavdi.
Lutjet e besimtarëve
Jezu Krishti për ne u mundua dhe u varros që pastaj të ngjallej. Atij, Shëlbuesit tonë, me përshpirtëri të sinqertë t'i përkulemi dhe përzemërsisht ta lusim:
O Zot, ki mëshirë.
O Jezu Krisht, prej kraharorit tënd, të shporuar me heshtë, rrodhi gjak dhe ujë, mister i mrekullueshëm i mbarë Kishës
— jepi jetë të Fejuarës sate me vdekjen, me varrimin dhe me ngjalljen tënde.
O Zot Jezu, të ra ndër mend për ata që e kishin harruar premtimin mbi ngjalljen tënde
— le të të bjerë ndër mend edhe për ata të cilët nuk dinë për ringjalljen tënde dhe jetojnë pa shpresë.
O Qengji i Hyjit, ti je Pashka jonë, e flijuar për të gjithë njerëzit
— silli kah vetja të gjithë njerëzit.
O Zot i mbarë botës, ti i cili nuk ke fund, vetë deshe të jesh i vënë në varr
— liroje njerëzimin nga ferri dhe jepja lavdinë e pavdekshme.
O Jezu Krisht, Biri i Hyjit të gjallë, ti nga kryqi ia hape cubit parajsën
— të ndjerët të cilët me vdekje dhe me varrim u bënë të ngjashëm me ty, bashkoji në lavdinë tënde të ringjalljes.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm dhe i amshuar, ti që na e jep hirin të kremtojmë misteret e të Njëlindurit Birit tënd, të zbritur prej qiellit në thellësinë e tokës, bëj që, të varrosur me të në pagëzim, të ringjallemi së bashku me të në lavdinë e ringjalljes. Ai që është Zot.
Përfundimi i Orës, sikurse në Shërbesën e rëndomtë.