Mbrëmësorja

JAva e dytë e Pashkëve - E mërkurë

 

Mbrëmësorja

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen. Aleluja!

   Himni

 

   O Zot, mbret i amshueshëm,

   gjithmonë me Atin Bir,

   sipas shëmbëllesës sate

   njeriun Adam krijove.

 

   Që e kish mashtruar djalli,

   armiku i njerëzimit,

   trajtën e tij të trupit

   nga Virgjëra e more.

 

   Që t’na bashkosh me Hyjin

   në bashkëjetesë të mishit,

   në pagëzim do të na japësh,

   Shëlbues, mëshirë e falje.

 

   Të marrësh kryqin u denjove

   për t’u shërbyer njerëzve;

   ti gjakun tënd dhurove

   çmim për shpëtimin tonë.

 

   Ti u ngjalle duke marrë

   lavdinë e caktuar nga Ati,

   nëpër ty ne besojmë

   me përkushtim të ngjallemi.

 

   Qofsh përherë gëzimi i Pashkëve

   për mendjet tona, o Jezus,

   dhe ne me hir rilindur

   na mblidh në ngadhënjimet e tua.

 

   Ty, Jezus, të qoftë lavdia,

   që shndrit me mundje të vdekjes,

   bashkë me Atin e me Shpirtin

   ndër gjithë shekujt burim jete. Amen.

 

(Në vend të himnit mund të këndohet një këngë e miratuar nga autoritetet kishtare e që i përshtatet kohës)

 

Ant. 1 Mos të shqetësohet zemra juaj, por kini besim në mua, aleluja.

 

Psalmi 62 /6l/ (2-13)

 

   Hyji është paqja jonë e vetme

 

   Dhe Hyji, në të cilin e kemi shpresën, ju mbushtë me çdo gëzim e paqe në besimin tuaj (Rom 15, 13).

 

Vetëm në Hyjin pusho, shpirti im, *

   sepse prej tij vjen shpëtimi im

Vetëm ai është qeta ime e shpëtimi im, *

   kështjella ime: më kurrë nuk do të trandem!

 

Deri kur do të suleni kundër një njeriu, †

   do ta rrëzoni të gjithë së bashku *

   si murin e prishur, si gardhin e thyer?

 

Synojnë ta rrëzojnë prej së larti, †

   kënaqësinë e gjejnë në rrenë. *

   Me gojë bekojnë e me zemër mallkojnë.

 

Vetëm në Hyjin pusho, o shpirti im, *

   vetëm në të qëndron shpresa ime!

Vërtet vetëm Ai është Hyji im e shpëtimi im, *

   kështjella ime: më kurrë nuk do të trandem!

 

Në Hyjin është shëlbimi im e nderi im, *

   në Hyjin shpresa e fuqisë sime, strehimi im në Hyjin.

 

Shpreso në të gjithmonë, o popull, †

   atij hapi zemrën, *

   sepse Hyji është strehimi ynë.

 

Vërtet si avull janë bijtë e Adamit, *

   rrenë e thjeshtë bijtë e njeriut:

në qoftë se hipin në peshore, *

   të gjithë dalin më të lehtë se tymi!

 

Ruaj se shpresoni në dhunë, *

   ruaj se ju rren preja;

në pasuri kur ato shtohen *

   mos e ngjitni zemrën për to!

 

Hyji një herë foli, *

   unë këto dy herë dëgjova:

»Pushteti i përket Hyjit, *

   yti, o Zot, është përdëllimi!

 

Ti shpërblen gjithkënd *

   sipas veprave që të ketë bërë!«

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Mos të shqetësohet zemra juaj, por keni besim në mua, aleluja.

 

Ant. 2 Le të të lavdërojnë popujt, o Hyj, le të galdojnë për shëlbimin tënd, aleluja.

 

   Psalmi 67 /66/ (2-8) Mbarë popujt le ta madhërojnë Zotin

 

   Ta dini, pra, të gjithë: Shëlbimi i Hyjit u është dërguar popujve joçifutë (Vap 28, 28).

 

Hyji pastë mëshirë për ne e na bekoftë, *

   bëftë të ndriçojë fytyra e tij mbi ne,

që në tokë të njihet udha e tij, *

   në të gjitha kombet shpëtimi i tij.

 

Të dhënçin lavdi mbarë popujt, o Hyj, *

   mbarë popujt e botës ty të lavdërofshin!

 

Le të galdojnë e le brohorisin popujt, †

   sepse popujt i gjykon me drejtësi, *

   sepse kombet mbi tokë ti i sundon.

 

Të lavdërofshin mbarë popujt, o Hyj, *

   mbarë popujt e botës ty të lavdërofshin!

 

Toka e dha frytin e vet: *

   na bekoftë Hyji, Hyji ynë!

Na bekoftë Hyji! *

   Frikë e paçin mbarë skajet e botës!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Le të të lavdërojnë popujt, o Hyj, le të galdojnë për shëlbimin tënd, aleluja.

 

Ant. 3 Madhështia jote i mbulon qiejt, toka është e mbushur me lavdinë tënde, aleluja.

 

   Kënga Krh. Kol 1, 3. 12-20

 

   Krishti, i Parëlinduri i çdo krijese, është i Parëlinduri i atyre që ngjallen prej të vdekurve.

 

E falënderojmë Hyjin, *

   Atin e Zotit tonë Jezu Krishtit,

sepse na bëri të aftë të kemi pjesë *

   në trashëgimin e shenjtërve në dritë.

 

Ai na nxori nga pushteti i errësirës *

   dhe na kaloi në Mbretërinë e Birit të vet të dashur,

në të cilin kemi shpërblimin *

   - faljen e mëkateve.

 

Ai është shëmbëllesa e Hyjit të papashëm, *

   i Parëlinduri - para çdo krijese.

Ai është para çdo gjëje *

   dhe çdo gjë qëndron në Të.

 

Gjithçka u krijua nëpër Të dhe për Të *

   në qiell e në dhe,

   çka shihet e çka nuk shihet.

 

Ai është Kryet e Trupit - Kishës; *

   Ai është Fillimi,

i Parëlinduri ndër të vdekurit *

   - që të jetë në gjithçka i Pari.

 

Sepse Hyjit i pëlqeu

   të banojë në Të e tërë Plotësia *

   dhe, me anë të Tij, gjithçka të pajtohet me të.

 

Në saje të Gjakut të kryqit të Tij, †

   Hyji vendosi paqen me krijesat e veta *

   qoftë në tokë qoftë në qiell.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Madhështia jote i mbulon qiejt, toka është e mbushur me lavdinë tënde, aleluja.

 

   Leximi i shkurtër 1 Kor 15, 12-14. 20

 

   Në qoftë se predikohet se Krishti është ngjallur prej të vdekurish: si atëherë disa prej jush thonë: »Nuk ka ngjallje prej të vdekurve.«? Po qe se të vdekurit nuk do të ngjallen ‑ atëherë as Krishti nuk është ngjallur. Por, në qoftë se Krishti me të vërtetë nuk është ngjallur, [atëherë] i kotë është predikimi ynë ‑ i kotë besimi juaj.

   Por, vërtet, Krishti u ngjall prej të vdekurve! Ai është fryti i parë i të vdekurve!

 

   Përgjigjja e shkurtër

 

   C Mos e kërkoni të gjallin ndër të vdekur, * aleluja, aleluja.

   Mos e kërkoni të gjallin ndër të vdekur, aleluja, aleluja.

   D Ai u ngjall, dhe mbretëron përgjithmonë.

   aleluja, aleluja.

   Lavdi Atit e Birit e Shpirtit Shenjt.

   Mos e kërkoni të gjallin ndër të vdekur, aleluja, aleluja.

 

   Kënga ungjillore (Magnificat Lk 1, 46-55)

 

Ant. Ai që e vë në zbatim të vërtetën, ai del në dritë që të dalë ballafaqe se veprat e tij u bënë siç thotë Hyji, aleluja.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Ai që e vë në zbatim të vërtetën, ai del në dritë që të dalë ballafaqe se veprat e tij u bënë siç thotë Hyji, aleluja.

 

   Lutjet e besimtarëve

 

T'i lutemi Hyjit Atë, i cili me Birin e vet Jezu Krishtin na hapi rrugën drejt jetës së amshuar:

 

   Për fitoren e Krishtit shëlboje popullin tënd, o Zot.

 

O Hy i etërve tanë, që e lavdërove Birin tënd, na e jep hirin e një kthimi të vërtetë

— bëj që e gjithë jeta jonë t’a kumtojë Pashkën e Krishtit.

Ti që i bashkove shpirtrat tanë duke i thirrur te Bariu dhe te Mbrojtësi

— na e ruaj fenë me anë të barinjve të Kishës sate të shenjtë.

I zgjodhe apostujt e parë të Birit tënd në popullin e vjetër të zgjedhur

— ndihmoju bijve të Izraelit që te Krishti ta njohin plotësuesin e të gjitha premtimeve.

Le të bjerë në mend për ata që vuajnë, për bonjakët dhe për të vejat

— mos i lësho dore asnjërin prej atyre të cilët Krishti i shëlboi me gjakun e vet.

E thirre martirin e parë Shtjefnin për ta ndarë lavdinë e Birit tënd

— pranoji në mbretërinë tënde të gjithë të vdekurit që luftuan dhe vuajtën për shkak të fesë.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   O Hyj, po kremtojmë përkujtimin vjetor të Pashkëve, me të cilat njeriun e ktheve në denjësinë e parë dhe ia dhurove shpresën e ngjalljes. Po të lutemi, bëj të fitojmë me dashuri tënde të përhershme atë që e kremtojmë me fe. Nëpër Zotin.

 

   Përfundimi i Orës, sikurse në Shërbesën e rëndomtë.