Mbrëmësorja
JAva e dytë e Pashkëve - E enjte
Mbrëmësorja
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. Aleluja!
Himni
O Zot, mbret i amshueshëm,
gjithmonë me Atin Bir,
sipas shëmbëllesës sate
njeriun Adam krijove.
Që e kish mashtruar djalli,
armiku i njerëzimit,
trajtën e tij të trupit
nga Virgjëra e more.
Që t’na bashkosh me Hyjin
në bashkëjetesë të mishit,
në pagëzim do të na japësh,
Shëlbues, mëshirë e falje.
Të marrësh kryqin u denjove
për t’u shërbyer njerëzve;
ti gjakun tënd dhurove
çmim për shpëtimin tonë.
Ti u ngjalle duke marrë
lavdinë e caktuar nga Ati,
nëpër ty ne besojmë
me përkushtim të ngjallemi.
Qofsh përherë gëzimi i Pashkëve
për mendjet tona, o Jezus,
dhe ne me hir rilindur
na mblidh në ngadhënjimet e tua.
Ty, Jezus, të qoftë lavdia,
që shndrit me mundje të vdekjes,
bashkë me Atin e me Shpirtin
ndër gjithë shekujt burim jete. Amen.
(Në vend të himnit mund të këndohet një këngë e miratuar nga autoritetet kishtare e që i përshtatet kohës)
Ant. 1 Krishti është gjyqtari i të gjallëve dhe i të vdekurve: e ka vendosur Hyji i gjithëpushtetshëm.
Psalmi 72 /71/
Pushteti i Mesisë
I hapën thesaret e veta e i dhuruan: ar, kem e mirrë (Mt 2, 11).
I (1-11)
O Hyj, jepja mbretit gjyqin tënd *
dhe drejtësinë tënde birit të mbretit,
që ta gjykojë popullin tënd me drejtësi *
e skamnorëve të tu t’u japë të drejtën.
Malet le t’i sjellin paqen popullit *
e kodrat drejtësinë.
Ai do t’i gjykojë të vobektët e popullit, †
do t’i shpëtojë bijtë e skamnorit *
do ta përulë shpifësin.
Ai do të jetojë sa dielli e hëna, *
nga breznia në brezni.
Do të zbresë porsi vesa mbi bar, *
porsi shiu që e lag tokën.
Në ditët e tija do të lulëzojë drejtësia *
dhe paqe e madhe derisa të jetë Hëna.
Do të sundojë prej detit në det, *
prej Lumit e deri në skajin e botës.
Para tij do të bien përmbys banorët e shkretëtirës, *
kundërshtarët e tij do të lëpijnë dheun.
Mbretërit e Tarsisit edhe të ishujve
dhurata do të sjellin, *
mbretërit e arabëve e të Sabës do të lajnë të dhjetat,
të gjithë mbretërit para tij përmbys do të bien *
e popujt mbarë do t’i shërbejnë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Krishti është gjyqtari i të gjallëve dhe i të vdekurve: e ka vendosur Hyji i gjithëpushtetshëm.
Ant. 2 Në të do të bekohen të gjithë popujt e tokës, aleluja.
Psalmi 72 /71/ II (12-19)
Mbretëria e paqes dhe e bekimit
Dilni në mbarë botën e predikoni Ungjillin (Mk 16, 15).
Ai do ta shpëtojë skamnorin që fshan, *
të varfrin që nuk ka ndihmëtar.
Mëshirë do të ketë për të mjerin e të vobektin, *
dhe skamnorëve do t’ua shpëtojë jetën.
Do t’i shpëtojë prej padrejtësisë e dhunës, *
gjaku i tyre do të jetë i çmueshëm përpara tij.
Do të jetojë e do t’i jepet prej arit të Arabisë, †
gjithmonë do të luten për të, *
gjithë ditën do ta bekojnë.
Toka do të japë drithëra me shumicë, *
në maja të maleve do të valëviten kallëzat,
porsi Libani frytet e tokës, *
do të lulëzojnë porsi bari i tokës banorët e qytetit.
Qoftë bekuar emri i tij në shekuj, *
sa të jetë Dielli mos iu harroftë emri!
Nëpër të do të bekohen të gjitha fiset e dheut, *
të gjithë paganët të lumtur do ta quajnë.
Qoftë bekuar Zoti Hyj, Hyji i Izraelit, *
që i vetmi bën mrekulli!
Qoftë bekuar Emri i tij i madhërueshëm, †
toka mbarë u mbushtë me lavdinë e tij. *
Amen! Amen!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Në të do të bekohen të gjithë popujt e tokës, aleluja.
Ant. 3 Krishti dje, sot dhe përgjithmonë, aleluja.
Kënga Krh. Zb 11, 17-18; 12, 10b-12a Gjyqi i Zotit
Po të falënderojmë, o Zotëri,
Hyj i Gjithëpushtetshëm, *
ty që je, ty që ishe,
sepse e ushtrove fuqinë tënde të madhe *
dhe e more mbretërimin!
Paganët u hidhëruan, †
por arriti zemërimi yt! *
Erdhi koha të gjykohen të vdekurit,
koha e shpërblimit për shërbëtorët e tu *
profetët dhe shenjtërit
dhe për të gjithë ata që e druan Emrin tënd *
- për të vegjël e të mëdhenj.
Ja, tani koha e shëlbimit, †
e pushtetit dhe e Mbretërisë së Hyjit tonë *
dhe e sundimit të Krishtit të tij!
Sepse u hodh poshtë paditësi i vëllezërve tanë *
që ditë e natë i padiste para Hyjit tonë.
Por ata e mundën në fuqi të gjakut të Qengjit †
dhe në saje të dëshmisë së vet: *
nuk e deshën jetën e vet aq sa ta dronin vdekjen.
Prandaj galdo, o qiell, *
galdoni edhe ju, o qiellorë të gjithë!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Krishti dje, sot dhe përgjithmonë, aleluja.
Leximi i shkurtër 2 Kor 4, 13-14
E pasi kemi të njëjtin shpirt feje, sikurse është në Shkrim shenjt: 'Besova, prandaj edhe fola', edhe ne besojmë, prandaj edhe flasim, sepse e dimë se Ai që ngjalli Jezusin Zot, edhe ne do të na ngjallë bashkë me Jezusin dhe do të na vërë bashkë me ju pranë vetes.
Përgjigjja e shkurtër
C Krishti është i gjallë në saje të pushtetit të Hyjit, * Aleluja, aleluja.
Krishti është i gjallë në saje të pushtetit të Hyjit, Aleluja, aleluja.
D Për ne u përul deri në vdekje në kryq.
aleluja, aleluja.
Lavdi Atit e Birit e Shpirtit Shenjt.
Krishti është i gjallë në saje të pushtetit të Hyjit, Aleluja, aleluja.
Kënga ungjillore (Magnificat Lk 1, 46-55)
Ant. Kush beson në Birin ka jetën e pasosur, aleluja.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Kush beson në Birin ka jetën e pasosur, aleluja.
Lutjet e besimtarëve
Të bashkuar me gëzim vëllazëror ta thërrasim Krishtin e ngjallur, të vendosur nga Ati si fillim dhe themel i shpresës sonë:
O Mbret i lavdisë, na dëgjo.
O Zot Jezu, që me gjakun tënd dhe me të ngjallurit tënd hyre njëherë e përgjithmonë në shenjtëroren qiellore
— na drejto me ty në lavdinë e Atit.
E forcove fenë e apostujve dhe e vendose dërgimin e tyre me anë të dëshmisë së Shpirtit tënd
— bëj që ipeshkvinjtë dhe meshtarët të jenë predikues të gjallë të fjalës sate.
Ti je për të gjithë burim pajtimi dhe paqeje
— bëj që të krishterët të bashkohen me bashkimin e fesë dhe të dashurisë.
Me anë të fesë në të ngjallur ia ripërtërive shëndetin të paralizuarit në derë të tempullit
— hidhe shikimin tënd mbi të sëmurët tanë dhe tregoje mbi ta lavdinë tënde.
Ti je fryti i parë i vdekjes që jep jetë dhe i ringjalljes
— pranoi në dritën tënde të pavdekshme ata të cilët shpresuan në ty.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm, bëj të shohim se si gjatë gjithë jetës sonë rriten e shtohen hiret që na i jep koha e Pashkëve. Nëpër Zotin.
Përfundimi i Orës, sikurse në Shërbesën e rëndomtë.