Mbrëmësorja

JAva e dytë e Pashkëve - E premte

 

Mbrëmësorja

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen. Aleluja!

 

   Himni

 

   O Zot, mbret i amshueshëm,

   gjithmonë me Atin Bir,

   sipas shëmbëllesës sate

   njeriun Adam krijove.

 

   Që e kish mashtruar djalli,

   armiku i njerëzimit,

   trajtën e tij të trupit

   nga Virgjëra e more.

 

   Që t’na bashkosh me Hyjin

   në bashkëjetesë të mishit,

   në pagëzim do të na japësh,

   Shëlbues, mëshirë e falje.

 

   Të marrësh kryqin u denjove

   për t’u shërbyer njerëzve;

   ti gjakun tënd dhurove

   çmim për shpëtimin tonë.

 

   Ti u ngjalle duke marrë

   lavdinë e caktuar nga Ati,

   nëpër ty ne besojmë

   me përkushtim të ngjallemi.

 

   Qofsh përherë gëzimi i Pashkëve

   për mendjet tona, o Jezus,

   dhe ne me hir rilindur

   na mblidh në ngadhënjimet e tua.

 

   Ty, Jezus, të qoftë lavdia,

   që shndrit me mundje të vdekjes,

   bashkë me Atin e me Shpirtin

   ndër gjithë shekujt burim jete. Amen.

 

(Në vend të himnit mund të këndohet një këngë e miratuar nga autoritetet kishtare e që i përshtatet kohës)

 

Ant. 1 Zoti e liroi jetën time prej ankthit të vdekjes, aleluja.

 

Psalmi 116 /114/ (1-9)

 

   Falënderim

 

   Duhet të kalojmë nëpër shumë vështirësi për të hyrë në Mbretërinë e Hyjit (Vap 14, 22).

 

E dua Zotin sepse e dëgjon *

   zërin e lutjes sime,

sepse mbi mua e priri veshin e vet *

   atë ditë që e thirra në ndihmë.

Më kishin rrethuar leqet e vdekjes, *

   më kishin shtrënguar leqet e Nëntokës,

 

më ndrydhën trishtime e dhembje, †

   Emrin e Zotit e thirra në ndihmë: *

   »Deh, o Zot, ma shpëto jetën!«

 

I mirë e i drejtë është Zoti, *

   Hyji ynë është vetë mirësia!

Zoti është mbrojtësi i të vegjëlve: *

   isha ngushtë e Ai më shpëtoi!

 

Kthehu, shpirti im, në qetësinë tënde, *

   sepse Zoti është bamirësi yt!

 

Ai ma shpëtoi jetën prej vdekjes, †

   sytë e mi prej lotëve, *

   këmbët e mia prej rënies.

 

Do të eci në praninë e Zotit *

   në tokën e të gjallëve.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Zoti e liroi jetën time prej ankthit të vdekjes, aleluja.

 

Ant. 2 Sikurse bebëzën e syrit të tij Zoti e ruan popullin e vet, aleluja.

 

Psalmi 121 /120/ (1-7)

 

   Rojsi i Izraelit

 

   Më kurrë s'do të kenë uri më kurrë s'do të kenë etje, më s'do t'i djegë dielli as rrezet e tija (Zb 7, 16).

 

Sytë e mi i çoj drejt maleve: *

   prej nga do të më vijë mua ndihma?

Ndihma ime vjen prej Zotit, *

   i cili krijoi qiellin e tokën.

 

S’do te lejojë të të merren këmbët, *

   nuk do të kotet ai që të ruan.

Ja, s’do të kotet as s’do të flejë, *

   ai që e ruan Izraelin.

 

Zoti është rojtari yt, †

   Zoti është hija jote, *

   Zoti është në të djathtën tënde!

 

Dielli nuk do të të bëjë keq ditën, *

   as hëna natën.

Zoti do të të ruajë nga çdo e keqe, *

   Zoti do ta ruajë jetën tënde.

 

Zoti do të ruajë vajtjet e ardhjet e tua *

   që tani e përgjithmonë e jetë.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Sikurse bebëzën e syrit të tij Zoti e ruan popullin e vet, aleluja.

 

Ant. 3 Zoti është fuqia ime dhe lavdia: ai është shpëtimtari im, aleluja.

 

   Kënga Krh. Zb 15, 3-4 Himn adhurimi dhe lavdi

 

Të mëdha dhe të madhërueshme janë veprat e tua, †

   o Zot, Hyj, o i Gjithëpushtetshëm! *

   Të drejta dhe të vërteta janë udhët e tua,

   o Mbreti i popujve!

Kush të mos të druajë ty, o Zot, †

   dhe kush të mos e lavdërojë Emrin tënd?! *

   Ti i vetmi, je Shenjti!

 

Të gjitha kombet do të vijnë †

   dhe do të adhurojnë para Teje, *

   sepse Gjyqet e tua u dëftuan të drejta!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Zoti është fuqia ime dhe lavdia: ai është shpëtimtari im, aleluja.

 

   Leximi i shkurtër Fil 3, 7. 10-11

 

   Të gjitha këto që i mbaja si përparësi, tani i çmoj si një bjerrje për shkak të Krishtit, që ta njoh atë dhe fuqinë e ngjalljes së tij me pjesëmarrjen në vuajtjet e tija, që të bëhem i ngjashëm me Të në vdekjen e tij, që në ndonjë mënyrë të mund t'ia arrij ngjalljes së të vdekurve.

 

   Përgjigjja e shkurtër

 

   C O Krisht, Biri i Hyjit të gjallë, ki mëshirë për ne, * aleluja, aleluja.

   O Krisht, Biri i Hyjit të gjallë, ki mëshirë për ne, aleluja, aleluja.

   D Ti u ngjalle prej të vdekurve.

   aleluja, aleluja.

   Lavdi Atit e Birit e Shpirtit Shenjt.

   O Krisht, Biri i Hyjit të gjallë, ki mëshirë për ne, aleluja, aleluja.

 

   Kënga ungjillore (Magnificat Lk 1, 46-55)

 

Ant. E vuajti kryqin e rëndë ai që e mundi ferrin: tani është i veshur me fuqi dhe i gjallë në lavdi, aleluja.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. E vuajti kryqin e rëndë ai që e mundi ferrin: tani është i veshur me fuqi dhe i gjallë në lavdi, aleluja.

 

   Lutjet e besimtarëve

 

Njëzëri ta lusim Krishtin, burimin e jetës dhe fillimin e çdo shenjtërie:

 

   Mbretëro, o Zot, në mesin tonë.

 

Jezus Shëlbues, i kryqëzuar në trup, gjithmonë i gjallë dhe jetëdhënës në Shpirt

— bëj që të vdekur për mëkatin, ta jetojmë jetën e re sipas Shpirtit.

Ti që i dërgove apostujt për t'ua predikuar ungjillin të gjitha krijesave

— ndihmoju me Shpirtin tënd misionarëve të fjalës sate.

Ti pranove nga Ati çdo pushtet në qiell dhe në tokë, për të bërë dëshminë e së vërtetës

— drejtoji me anë të urtisë sate ata që na sundojnë.

Ti që urdhëron ta presim të zgjuar ardhjen tënde në lavdi

— bëj që gjithnjë e më shumë ta presim qiellin e ri dhe tokën e re duke punuar për përparim dhe paqe.

Zbrite mbi ferr për t'u kumtuar etërve shëlbimin

— bashkoji në gëzimin e përhershëm të gjithë të vdekurit tanë.

 

   Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   O Hyj i gjithëdijshëm dhe i gjithëpushtetshëm, ti deshe që Biri yt t’i pësonte për ne mundimet e kryqit për të na çliruar nga pushteti i djallit: bëj, po të lutemi, ta fitojmë hirin e ngjalljes. Nëpër Zotin.

 

Përfundimi i Orës, sikurse në Shërbesën e rëndomtë.