Mbrëmësorja
Java e katërt e Pashkëve – E Diel
Mbrëmësorja I
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. Aleluja!
Himni
Në darkë të Qengjit parafolës,
të bardhë e me rrobë shpëtimi,
pasi u shfaq Deti i Kuq,
t’i këndojmë Krishtit kryeprinc.
Trupi i tij krejt i shenjtë
në altar të kryqit i flijuar,
duke shijuar dhe gjakun
ne në Zotin për të jetuar.
Mbrojtur në mbrëmje të Pashkës
nga engjëlli i shfarosjes,
u çliruam nga zgjedha
e Faraonit të egër.
Tash Pashka jonë është Krishti,
Edhe Qengji që u vra pa faj;
që për ne flijoi trupin
me pastërti të ndorme.
O fli e denjë dhe e çiltër,
nga e cila u shemb ferri,
turma e robëruar çlirohet,
vlerat e jetës po kthehen.
Ngrihet Krishti Zot prej varrit,
kthehet fitues nga humnera,
tiranin e vë ndër pranga,
dhe hap dyert e parajsës.
Përherë ti rrofsh ndër mendje,
o Krisht, gëzimi i Pashkëve,
dhe me hir të rilindur
në triumfin tënd bashkona.
Jezus, Ty të qoftë lavdia,
që shndrit me mundje të vdekjes,
bashkë me Atin e me Shpirtin
ndër gjithë shekujt burim jete. Amen.
(Në vend të himnit mund të këndohet një këngë e miratuar nga autoritetet kishtare e që i përshtatet kohës)
Ant. 1 Paqja e Krishtit le t’i gëzojë zemrat tuaja, aleluja.
Psalmi 122 /121/ (1-9) Përshëndetje Jerusalemit, qytetit të shenjtë
I jeni afruar malit Sion, qytetit të Hyjit të gjallë (Heb 12, 22).
Seç u gëzova kur më thanë: *
»Eja të shkojmë në Shtëpinë e Zotit!«
Ja, tashmë këmbët tona shkelën *
në dyert e tua, o Jerusalem!
O Jerusalem, qytet i ndërtuar me mjeshtëri, *
thuaj se i tëri një cope të vetme je!
Atje ngjiten fiset, fiset e Zotit, †
sipas rregullores në Izrael *
për të kremtuar Emrin e Zotit.
Atje janë selitë e gjykatores së drejtësisë, *
selitë e shtëpisë së Davidit!
Lutuni për paqen e Izraelit: *
»U priftë e mbara atyre që të duan ty!
Mbretëroftë paqja në muret e tua *
dhe qetësia në pirgjet e tua!«
Për dashuri ndaj vëllezërve e miqve të mi *
do të them: »Paqja me ty!«
Për dashuri ndaj Shtëpisë së Zotit, Hyjit tonë, *
do të lutem t’i kesh të gjitha të mirat!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Paqja e Krishtit le t’i gëzojë zemrat tuaja, aleluja.
Ant. 2 Me gjakun tënd, o Krisht, na ktheve përsëri te Hyji, aleluja.
Psalmi 130 /129/ (1-8) Nga humnera të thërras
Ai do ta shëlbojë popullin e vet prej mëkateve të tija (Mt 1, 21).
Prej humnerës klitha tek ti, o Zot, *
o Zot, dëgjoje britmën time!
Le ta dëgjojnë veshët e tu, *
zërin e lutjes sime.
Nëse do t’i mbash mend paudhësitë, o Zot, *
O Zot, e kush do të qëndrojë para teje?
Por tek ti gjendet falja *
që të dimë të të druajmë.
Shpresoj në ty, o Zot, *
shpirti im shpreson në premtimin e tij.
E pret shpirti im Zotin *
më tepër se rojtarët agimin.
Më tepër se rojtarët agimin *
le të shpresojë Izraeli në Zotin,
sepse te Zoti është mëshira *
dhe i madh është tek Ai shpërblimi.
Ai do ta nxjerrë Izraelin *
prej të gjitha paudhësive të tija.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Me gjakun tënd, o Krisht, na ktheve përsëri te Hyji, aleluja.
Ant. 3 Ishte e nevojshme që Krishti të kalonte nëpër vdekje, e që kështu të hynte në lavdi, aleluja.
Kënga Fil 2, 6-11 Krishti, shërbëtor i Hyjit
Krishti Jezus, edhe pse me natyrë Hyj, *
barazinë e vet me Të
nuk e çmoi si një visar që s’mundet pa të,
por ia mohoi vetvetes *
e mori natyrën e shërbëtorit
dhe u bë i ngjashëm me njerëz
dhe, për kah pamja e jashtme, *
dukej vetëm njeri.
E përuli vetveten
duke u bërë i dëgjueshëm deri në vdekje,*
mu deri në vdekje në kryq.
Prandaj edhe Hyji e lartësoi tesve *
dhe i dha Emrin që është mbi çdo emër
që në Emër të Jezusit të përkulet çdo gju *
i atyre që janë në qiell, në tokë e në nëntokë
dhe çdo gjuhë të dëshmojë: *
‘Jezu Krishti është Zot!’
Në nder të Hyjit Atë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Ishte e nevojshme që Krishti të kalonte nëpër vdekje, e që kështu të hynte në lavdi, aleluja.
Leximi i shkurtër Rom 5, 10-11
Në qoftë se u pajtuam me Hyjin në saje të vdekjes së Birit të tij ‑ kur ende ishim armiqtë e tij, sa me më shumë arsye, njëherë të pajtuar, do të shëlbohemi me anë të jetës së tij! Dhe, jo vetëm kaq! Ne e vëmë mburrjen tonë në Hyjin në saje të Jezu Krishtit, Zotit tonë, me anë të cilit tani fituam pajtimin.
Përgjigjja e shkurtër
C Rri me ne, o Zot, * aleluja, aleluja.
Rri me ne, o Zot, aleluja, aleluja.
D Tashmë po bëhet natë.
aleluja, aleluja.
Lavdi Atit e Birit e Shpirtit Shenjt.
Rri me ne, o Zot, aleluja, aleluja.
Kënga ungjillore (Magnificat Lk 1, 46-55)
Ant. Unë jam dera, thotë Zoti: kush hyn nëpër mua, do të shëlbohet: do të hyjë e do të dalë dhe do të gjejë kullosë, aleluja.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Unë jam dera, thotë Zoti: kush hyn nëpër mua, do të shëlbohet: do të hyjë e do të dalë dhe do të gjejë kullosë, aleluja.
Lutjet e besimtarëve
T'i lutemi me fe të gjallë Krishtit, i cili e mundi vdekjen dhe e ripërtëriu jetën:
O Krisht, ti që jeton në amshim, dëgjoje lutjen tonë.
Ti që je gur, të cilin ndërtuesit e hodhën jashtë përdorimit e Ati e zgjodhi për gurë këndi
— bëje secilin prej nesh gurë të gjallë për ndërtimin e Kishës sate.
Ti që je dëshmitar besnik dhe i vërtetë
— bëj që Kisha jote të dëshmojë gjithmonë me fjalë, me vepra dhe me ngjalljen tënde.
Ti i vetmi dhëndër i Kishës sate, e cila lindi nga zemra jote e shporuar
— na bëj dëshmitarë të këtij sakramenti martesor me Kishën tënde.
Ti që ishe i vdekur dhe tani jeton përgjithmonë
— na jep forcë që t'i mbajmë premtimet e pagëzimit për ta merituar kurorën e jetës.
O dritë e lavdishme e qytetit shenjt të Hyjit
— shndriti të vdekurit tanë në shekuj të shekujve.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm dhe i amshuar, na prij drejt lumturisë së parajsës; bëj të arrijë atje te grigja, megjithëse e ligshtë, ku Bariu i saj hyri fitimtar. Nëpër Zotin.
Përfundimi i Orës, sikurse në Shërbesën e rëndomtë.