Mbrëmësorja
Java e katërt e Pashkëve – E Diel
Mbrëmësorja II
D Hyj, më eja në ndihmë!
C O Zot, shpejto të më ndihmosh!
D Lavdi Atit e Birit e Shpirtit Shenjt,
C si ka qenë në fillim,
ashtu tash e përgjithmonë e jetës. Amen. Aleluja!
Himni
Në darkë të Qengjit parafolës,
të bardhë e me rrobë shpëtimi,
pasi u shfaq Deti i Kuq,
t’i këndojmë Krishtit kryeprinc.
Trupi i tij krejt i shenjtë
në altar të kryqit i flijuar,
duke shijuar dhe gjakun
ne në Zotin për të jetuar.
Mbrojtur në mbrëmje të Pashkës
nga engjëlli i shfarosjes,
u çliruam nga zgjedha
e Faraonit të egër.
Tash Pashka jonë është Krishti,
Edhe Qengji që u vra pa faj;
që për ne flijoi trupin
me pastërti të ndorme.
O fli e denjë dhe e çiltër,
nga e cila u shemb ferri,
turma e robëruar çlirohet,
vlerat e jetës po kthehen.
Ngrihet Krishti Zot prej varrit,
kthehet fitues nga humnera,
tiranin e vë ndër pranga,
dhe hap dyert e parajsës.
Përherë ti rrofsh ndër mendje,
o Krisht, gëzimi i Pashkëve,
dhe me hir të rilindur
në triumfin tënd bashkona.
Jezus, Ty të qoftë lavdia,
që shndrit me mundje të vdekjes,
bashkë me Atin e me Shpirtin
ndër gjithë shekujt burim jete. Amen.
(Në vend të himnit mund të këndohet një këngë e miratuar nga autoritetet kishtare e që i përshtatet kohës)
Ant. 1 Të ringjallur me Krishtin, kërkoni gjërat e qiellit: atje ai jeton në të djathtën e Hyjit, aleluja.
Psalmi 110 /109/ (1-5. 7) Mesia, mbret dhe meshtar
Duhet që Ai të mbretërojë derisa t'i vërë nën këmbët e tija të gjithë armiqtë e tij (1 Kor 15, 25).
I tha Zoti Zotit tim: *
»Rri në të djathtën time,
derisa t’i vë armiqtë e tu *
shtrojë për këmbët e tua!«
Skeptrin e pushtetit tënd Zoti do ta shtrijë nga Sioni: *
sundo midis armiqve të tu!
Ty të përket më i larti pushtet *
në ditën e fuqisë sate
në shkëlqime të shenjta *
nga kraharori para Yllit të Dritës
unë të linda.
Zoti u përbetua, assesi s’do të pendohet: *
Ti je prift për amshim
në mënyrën e Melkizedekut.«
Zoti është në të djathtën tënde, *
i dërrmon mbretërit ditën e zemërimit të vet.
Në udhëtim ujë do të pijë prej përroit, *
prandaj lart do ta ngrejë kokën.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Të ringjallur me Krishtin, kërkoni gjërat e qiellit: atje ai jeton në të djathtën e Hyjit, aleluja.
Ant. 2 Në errësirë u ngrit një dritë për të drejtët, aleluja.
Psalmi 112 /111/ (1-10) Lumturia e njeriut të drejtë
Jetoni porsi bij të dritës. Fryti i dritës është: mirësia, drejtësia, e vërteta (Ef 5, 8-9).
Lum ai njeri që e druan Zotin, *
që kënaqet në urdhërimet e tija.
Fara e tij do të jetë e fortë mbi tokë, *
do të bekohet breznia e të drejtëve.
Pasuri e mirëqenie në shtëpinë e tij, *
drejtësia e tij qëndron në shekuj të shekujve.
Ka lindur për të drejtët një dritë në errësirë: *
i butë e i mëshirshëm është njeriu i drejtë.
I ëmbël është njeriu që përdëllen e huajon, †
punët e veta i kryen me ndërgjegje, *
ai askurrë nuk do të bjerë poshtë.
Në kujtim të përhershëm mbetet i drejti, *
nuk i trembet lajmit të keq.
E patrandshme është zemra e tij me shpresë në Zotin, †
të fortë e ka zemrën, nuk do të trembet *
armiqtë e vet i bën asgjë.
Është dorëdhënë, u fal skamnorëve; †
drejtësia e tij qëndron në shekuj të shekujve, *
balli i tij ngallit për nder.
E sheh bakeqi dhe hidhërohet, †
me dhëmbë kërcëllon e vyshket. *
Dëshira e mëkatarëve shkon huq.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Në errësirë u ngrit një dritë për të drejtët, aleluja.
Ant. 3 Aleluja. Shpëtim, lavdi dhe pushtet Hyjit tonë, aleluja.
Kur këndohet kjo këngë, atëherë Aleluja mund të përsëritet disa herë çdo dy apo katër strofa.
Kënga Krh. Zb 19, 1-7 Dasma e Qengjit
Aleluja!
Shëlbim, lavdi dhe pushtet Hyjit tonë, *
(C Aleluja.)
sepse gjyqet e tija janë të vërteta dhe të drejta
C Aleluja (Aleluja).
Aleluja!
Lavdëroni Hyjin tonë, të gjithë shërbëtorët e tij *
(C Aleluja.)
të gjithë ju që e droni - të vegjël e të mëdhenj!
C Aleluja (Aleluja).
Aleluja!
Mbretëron Zoti, *
(C Aleluja.)
Hyji ynë, i Gjithëpushtetshmi!
C Aleluja (Aleluja).
Aleluja!
Le të galdojmë e të brohorasim *
(C Aleluja.)
dhe t’i japim lavdi Atij.
C Aleluja (Aleluja).
Aleluja!
Sepse erdhi Dasma e Qengjit! *
(C Aleluja.)
Gati është Nusja e tij.
C Aleluja (Aleluja).
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Aleluja. Shpëtim, lavdi dhe pushtet Hyjit tonë, aleluja.
Leximi i shkurtër Rom 6, 5-7
Pasi jeni krejtësisht të bashkuar me Të, me një vdekje të ngjashme me të tijën, me siguri do të bëhemi plotësisht një me Të me përngjasimin e ngjalljes së Tij. Le ta kemi parasysh këtë gjë: njeriu ynë i vjetër është kryqëzuar bashkë me Të që të shkatërrohet ky trup i mëkatit, kështu që të mos i robërojmë më mëkatit, sepse i vdekuri është i lirë nga mëkati.
Përgjigjja e shkurtër
C Isha i vdekur: tani jetoj përgjithmonë, * aleluja, aleluja.
Isha i vdekur: tani jetoj përgjithmonë, aleluja, aleluja.
D Vdekja dhe ferri janë nën pushtetin tim.
aleluja, aleluja.
Lavdi Atit e Birit e Shpirtit Shenjt.
Isha i vdekur: tani jetoj përgjithmonë, aleluja, aleluja.
Kënga ungjillore (Magnificat Lk 1, 46-55)
Ant. Delet e mia e dëgjojnë zërin tim, e unë, Zoti, i njoh të gjitha delet e mia, aleluja.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Delet e mia e dëgjojnë zërin tim, e unë, Zoti, i njoh të gjitha delet e mia, aleluja.
Lutjet e besimtarëve
Krishti i ngjallur rri në të djathtën e Atit. Në Emër të tij e lartësojmë lutjen tonë:
O Zot, me lavdinë e Krishtit shëlbo popullin tënd.
Atë i shenjtë që e lavdërove Birin tënd të vdekur në kryq
— drejtoi tek Ai të gjithë njerëzit.
Dërgoje Shpirtin tënd mbi Kishë
— që të jetë sakrament i bashkimit të të gjithë njerëzve.
Mbroji ata, të cilët i rilinde në jetën e re me anë të pagëzimit
— bëj që të rriten në fe dhe ta dëshmojnë Emrin tënd.
Përmes Birit tënd të lavdëruar ndihmoju të varfërve, shëroji të sëmurët, liroji të burgosurit
— shtrij mbi të gjithë popujt begatitë e shëlbimit tënd.
Pranoji në qiell të vdekurit tanë, të cilët u ushqyen me korpin dhe me gjakun e Birit tënd
— bëj që të marrin pjesë në gostinë e gëzimit të përhershëm.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm dhe i amshuar, na prij drejt lumturisë së parajsës; bëj të arrijë atje te grigja, megjithëse e ligshtë, ku Bariu i saj hyri fitimtar. Nëpër Zotin.
Përfundimi i Orës, sikurse në Shërbesën e rëndomtë.