Mbrëmësorja
E kremtja e Trinisë së Shenjtë
E diela I pas Rrëshajëve
Mbrëmësorja I
D Hyj, më eja në ndihmë!
C O Zot, shpejto të më ndihmosh!
D Lavdi Atit e Birit e Shpirtit Shenjt,
C si ka qenë në fillim,
ashtu tash e përgjithmonë e jetës. Amen.
Himni
Trini e pamasë një e vetme,
që me pushtet gjithë kohët
krijon dhe i drejton
para shekujve qëndron.
Ti vetëm gëzimplote
mjafton për lumturinë tënde;
e dëlire, e thjeshtë, largpamëse
ti mban tok qiejt e rruzullimin.
O Atë, tërë gurra e hirit,
Ti Drita e lavdisë s’Atit
Shpirti Shenjt i të dyve
dashuri e pakufishme.
Prej teje burimi i epër,
Trini mirëdashëse, rrjedh
çdo gjë që mban krijesat
dhe me stoli i përsos.
Atyre u fal kurorën
e birësimit të ngushtë,
ne na bëj tempuj të hijshëm
me të pëlqyer paprerë.
O dritë e gjallë, me engjëjt
na mblidh në treme qiellore,
për jetë lavde dashurie
të këndojmë ty mirënjohës. Amen.
Ose një himn tjetër, apo një këngë e miratuar nga autoritetet kishtare.
Ant. 1 Lavdi ty, o Trini, e njëjtë në Persona, Hyj i vetëm, para të gjithë shekujve, tani e përgjithmonë.
Psalmi 113 /112/ (1-9)
Lavdërojeni, shërbëtorët e Zotit, *
lavdërojeni, Emrin e Zotit!
Qoftë bekuar Emri i Zotit *
qysh tash e deri në amshim,
Që kur lind dielli e derisa perëndon *
qoftë bekuar Emri i Zotit!
I madhërueshëm është Zoti mbi të gjithë popujt, *
lavdia e tij i tejkalon qiejt.
Kush është si Zoti, Hyji ynë, †
që fronin e ka në Lartësi, *
e nga lart vrojton qiellin e tokën?
Nga pluhuri e ngre skamnorin, *
nga llomi e lartëson të vobektin
për ta vënë të rrijë me princa, *
me princat e popullit të vet.
Ai bën të banojë beronja në shtëpi të vet *
nënë fëmijësh e gëzueshme.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Lavdi ty, o Trini, e njëjtë në Persona, Hyj i vetëm, para të gjithë shekujve, tani e përgjithmonë.
Ant. 2 Lavdi ty, o Trinia e Shenjtë, Njësi e pandashme, që na e shfaqe mëshirën tënde.
Psalmi 147 (1-9)
Lavdëroje, Jerusalem, Zotin, *
madhëroje, o Sion, Hyjin tënd!
Sepse i forcoi shulat e dyerve të tua, *
i bekoi bijtë e tu në ty!
Ai ua siguron kufijve të tu paqen, *
ai të ushqen me palcën e grurit.
Ai e dërgon fjalën e vet mbi tokë, *
lajmi i tij vrapon me shpejtësi.
E hedh borën porsi lesh, *
e derdh brymën porsi hi.
E lëshon breshrin porsi kafshatë, *
kush mund të qëndrojë para të ftohtit të tij?
E dërgon fjalën e vet e ato shkrihen, *
çon erën e vet e ujërat rrjedhin.
Ai ia zbulon fjalën e vet Jakobit, *
drejtësitë e gjyqet e veta Izraelit.
Nuk bëri kështu me asnjë komb tjetër: *
asnjërit nuk ia zbuloi vendimet e veta.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Lavdi ty, o Trinia e Shenjtë, Njësi e pandashme, që na e shfaqe mëshirën tënde.
Ant. 3 Lavd dhe nder një të vetmit Hyj, Atit dhe Birit së bashku me Shpirtin Shenjt, në shekuj të shekujve!
Kënga Krh. Ef 1, 3-10
Qoftë bekuar Hyji.*
Ati i Zotit tonë Jezu Krishtit,
i cili na bekoi me çdo bekim shpirtëror *
në qiell në Krishtin.
Në Të na zgjodhi *
para krijimit të botës –
që të jemi të shenjtë e të papërlyer *
para Tij në dashuri.
Ai na parashënoi për vete *
të jemi bij në shpirt
në saje të Jezu Krishtit *
me pëlqimin e vullnetit të vet
për nder të lavdisë së hirit të tij *
me të cilin na pajisi me anë të të Dashurit:
në Të, në saje të gjakut të tij, *
e fituam shpërblimin;
në Të na u falën fajet *
me anë të begatisë së hirit të tij,
të cilin Hyji e ndikoi në ne *
bashkë me çdo urti e kuptim.
Ai na vuri në dijeni *
mbi misterin e vullnetit të vet
synim që lirisht kishte vendosur *
qysh më parë ta kryente në Të
kur të plotësohej koha: *
të vërë çdo gjë
nën kryesinë e Krishtit,
të gjithë qenësitë *
që janë në qiell e në tokë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Lavd dhe nder një të vetmit Hyj, Atit dhe Birit së bashku me Shpirtin Shenjt, në shekuj të shekujve!
Leximi i shkurtër Rom 11, 33-36
O thellësi e pasurisë, e urtisë dhe e dijes së Hyjit! Sa të pavëzhgueshme janë gjyqet e tija, sa të pashqyrtueshme janë udhët e tija! E njëmend, 'kush e njohu mendimin e Zotit? Kush iu bë Atij këshilltar? Kush i dha Atij më parë që të jetë detyrë t'i kthehet?' (krh. Jak 15, 8; Urt 9, 13). Sepse, gjithçka është, është prej Tij, nëpër Të dhe për Të. Qoftë lavdëruar përgjithmonë e jetës! Amen!
Përgjigjja e shkurtër
C Vetëm Hyjit i qoftë nderi e lavdia:
* atij lavdia në shekuj.
Vetëm Hyjit i qoftë nderi e lavdia:
atij lavdia në shekuj.
D Qoftë bekuar Ati, Biri dhe Shpirti Shenjt:
atij lavdia në shekuj.
Lavdi Atit e Birit e Shpirtit Shenjt.
Vetëm Hyjit i qoftë nderi e lavdia:
atij lavdia në shekuj.
Kënga ungjillore (Magnificat Lk 1, 46-55)
Ant. Ty të falënderojmë Trini një e vetme dhe e vërtetë, Hyj i vetëm dhe i Tejetlartë.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Ty të falënderojmë Trini një e vetme dhe e vërtetë, Hyj i vetëm dhe i Tejetlartë.
Lutjet e besimtarëve
Hyji Atë, për virtyt të Shpirtit Shenjt, e lavdëroi njerëzinë e Krishtit dhe e bëri për ne burim jete dhe shëlbimi. Të bashkuar në lutjen e mbrëmjes ta adhurojmë Trininë e Shenjtë:
Lavdi Atit e Birit e Shpirtit Shenjt.
Atë, Hyji i amshuar dhe i gjithëpushtetshëm, në emër të Birit tënd dërgoje në Kishën tënde Shpirtin Shenjt, Mbrojtës
— që ta ruajë në bashkësinë e dashurisë dhe në të vërtetën e përkryer.
Dërgo o Zot, punëtorë në vreshtin tënd t’i mësojnë mbarë popujt dhe t’i pagëzojnë në emër të Atit e të Birit e të Shpirtit Shenjt
— dhe t’i forcojnë në fe.
Ndihmoju, o Zot, atyre që pësojnë vuajtje për shkak të emrit të Birit tënd
— Shpirti Shenjt që ua premtoi le t’i jep dëshmi përmes gojës së tyre.
Bëj që të gjithë njerëzit të të njohin Ty, o Atë, që me Birin dhe me Shpirtin Shenjt je i vetmi Hyj
— të besojnë në ty, të shpresojnë në ty, të jetojnë në dashurinë tënde.
Atë i të gjithë të gjallëve, bëj që të vdekurit të jenë pjesëmarrës në lavdinë e qiellit
— në të cilën Biri yt dhe Shpirti Shenjt së bashku me ty mbretërojnë në amshim.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj Atë, ti e ke dërguar në botë Birin tënd, Fjalën e së Vërtetës dhe Shpirtin shenjtërues për t’u zbuluar njerëzve misterin e jetës sate, bëj, që me dëshmimin e besimit të vërtetë, ta njohim lavdinë tënde dhe ta adhurojmë Një të Vetmin Hyj në Tri Veta. Nëpër Zotin.
Përfundimi i Orës sikurse në Shërbesën e rëndomtë.