Mbrëmësorja
E kremtja e zemrës së Krishtit
E premtja pas të dielës II pas Rrëshajëve
Mbrëmësorja II
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. Aleluja.
Himni
Krijuesi i lum i shekullit,
o Krisht, Shëlbuesi i të gjithëve,
ndriçim nga drita e Atit
Hyj i vërtetë prej Hyjit:
Të shtyu Dashuria jote
të marrësh trupin e vdekshëm,
si Adam i ri të ktheje
çka pat humbur i vjetri.
Atij dashuri, krijues jetëdhënës
i tokës, detit, yjeve,
i erdh keq për faj të të parëve
dhe na i këputi prangat.
Mos iu ndaftë zemrës tënde
forca e dashurisë së ndritur;
nga kjo gurrë nxjerrshin kombet
hirin e shlyerjes së fajeve.
Për këtë heshtën e hidhët
dhe për këtë vuajti plagët,
që ne ndyrësinë të na lante
me gjak e ujë të rrjedhshëm.
Ty, Jezus, të qoftë lavdia
që zbraz në zemër hirin,
me Atin dhe me Shpirtin
ndër gjithë shekujt burim jete. Amen.
Ant. 1 Sundo, o Zot, në mes të armiqve të tu, zgjedha e jote është e lehtë.
Psalmi 110 /109/ (1-5. 7)
I tha Zoti Zotit tim: *
»Rri në të djathtën time,
derisa t’i vë armiqtë e tu *
shtrojë për këmbët e tua!«
Skeptrin e pushtetit tënd Zoti do ta shtrijë nga Sioni: *
sundo midis armiqve të tu!
Ty të përket më i larti pushtet *
në ditën e fuqisë sate
në shkëlqime të shenjta *
nga kraharori para Yllit të Dritës
unë të linda.
Zoti u përbetua, assesi s’do të pendohet: *
Ti je prift për amshim
në mënyrën e Melkizedekut.«
Zoti është në të djathtën tënde, *
i dërrmon mbretërit ditën e zemërimit të vet.
Në udhëtim ujë do të pijë prej përroit, *
prandaj lart do ta ngrejë kokën.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Sundo, o Zot, në mes të armiqve të tu, zgjedha e jote është e lehtë.
Ant. 2 Hir dhe mëshirë është Zoti: ai u dha ushqim atyre që e druajnë.
Psalmi 111 /110/ (1-10)
Lavdi veprave të Hyjit
Me gjithë shpirt do ta lavdëroj Zotin, *
në kuvendin e të drejtëve, në mbledhjen e tyre.
Të mëdha janë veprat e Hyjit, *
për t’u shqyrtuar prej atyre që i duan.
Stoli e shkëlqim është vepra e tij, *
drejtësia e tij qëndron në shekuj të shekujve.
U ngre përmendore mrekullive të veta, *
i mëshirshëm e mëshirëdhënës është Zoti.
U jep ushqim atyre që e druajnë, *
kurrë s’e harron Besëlidhjen e vet.
Popullit të vet ia kumtoi fuqinë e veprave të veta, *
duke ua dhuruar pronën e paganëve.
Veprat e duarve të tij janë drejtësi e besnikëri, *
urdhërimet e tij janë të vërteta,
të qëndrueshme në jetë të jetëve, *
të themeluara mbi të vërtetën e drejtësinë.
Shpërblim i dha popullit të vet, *
Besëlidhjen e vet e bëri të amshueshme:
i shenjtë dhe i tmerrshëm është Emri i tij. *
Fillimi i dijes është frika e Zotit,
janë të mençur të gjithë ata që veprojnë sipas saj, *
lavdia e Tij qëndron për amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Hir dhe mëshirë është Zoti: ai u dha ushqim atyre që e druajnë.
Ant. 3 Qe Qengji i Hyjit, Ai që i shlyen mëkatet e botës.
Kënga Fil 2, 6-11
Krishti Jezus, edhe pse me natyrë Hyj, *
barazinë e vet me Të
nuk e çmoi si një visar që s’mundet pa të,
por ia mohoi vetvetes *
e mori natyrën e shërbëtorit
dhe u bë i ngjashëm me njerëz
dhe, për kah pamja e jashtme, *
dukej vetëm njeri.
E përuli vetveten
duke u bërë i dëgjueshëm deri në vdekje,*
mu deri në vdekje në kryq.
Prandaj edhe Hyji e lartësoi tesve *
dhe i dha Emrin që është mbi çdo emër
që në Emër të Jezusit të përkulet çdo gju *
i atyre që janë në qiell, në tokë e në nëntokë
dhe çdo gjuhë të dëshmojë: *
‘Jezu Krishti është Zot!’
Në nder të Hyjit Atë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Qe Qengji i Hyjit, Ai që i shlyen mëkatet e botës.
Leximi i shkurtër Ef 2, 4-7
Hyji, i pasur me mëshirë, në saje të dashurisë së madhe, me të cilën na deshi, ne që ishim të vdekur për shkak të fajeve, na ngjalli bashkë me Krishtin ‑ ju jeni të shëlbuar me hir ‑ dhe, bashkë me të na ngjalli dhe na vendosi në qiell në Krishtin Jezus: që me mirësinë e tij ndaj nesh në Jezu Krishtin ta tregojë në shekujt e ardhshëm pasurinë e patregueshme të vetën.
Përgjigjja e shkurtër
C Krishti për dashuri na ka pastruar nga çdo faj
* me gjakun e vet.
Krishti për dashuri na ka pastruar nga çdo faj
me gjakun e vet.
D Bëri prej nesh një popull mbretërish,
meshtarë për lavdinë e Atit,
me gjakun e vet.
Lavdi Atit e Birit e Shpirtit Shenjt.
Krishti për dashuri na ka pastruar nga çdo faj
me gjakun e vet.
Kënga ungjillore (Magnificat Lk 1, 46-55)
Ant. Zoti na pranoi në zemrën e vet, duke e kujtuar mëshirën e vet.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Zoti na pranoi në zemrën e vet, duke e kujtuar mëshirën e vet.
Lutjet e besimtarëve
T’i lutemi Krishtit, që t’u japë paqe dhe freskim shpirtrave tanë:
Mbret mirësie, ki mëshirë për ne.
O Jezus, zemra jote u shporua me heshtë dhe prej saj rrodhën gjak dhe ujë që i japin jetë Kishës, Nuses sate
— bëje atë të shenjtë dhe të panjollë.
O Jezus, Tempull i shenjtë i Hyjit, i rrënuar prej njerëzve dhe i rindërtuar prej Atit,
— bëj që Kisha të jetë shenjtërorja e gjallë e lavdisë sate.
O Jezus, Mbret dhe qendër e të gjitha zemrave, na e trego mëshirën tënde
— ripërtërije me njerëzit e kohës sonë besëlidhjen e dashurisë sate.
O Jezus, paqja dhe pajtimi ynë, që me anë të kryqit shkatërron çdo armiqësi dhe na bashkon në të Vetmin Njeriun e Ri,
— bëj që të jetojmë në bashkësi me Ty në të vetmin Shpirt.
O Jezus, për shkak të dashurisë së madhe u bëre i dëgjueshëm deri në vdekje
— bëji pjesëtarë të lavdisë sate të gjithë ata që vdiqën duke shpresuar në ty.
Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm, po e nderojmë me gëzim Zemrën e Birit tënd të dashur dhe po i përkujtojmë mrekullitë e dashurisë së tij ndaj nesh, bëj të fitojmë prej këtij burimi të pashtershëm begatinë e hireve të tua. Nëpër Zotin.
Përfundimi i Orës sikurse në Shërbesën e rëndomtë.