Mbrëmësorja

24 qershor Lindja e Shën Gjon Pagëzuesit

 

E kremte

 

Lutjet e mbrëmjes I

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

      ashtu tash e përgjithmonë e jetës. Amen. (K. P. aleluja)

 

      Himni

 

      Për t’mundur skllevrit tërë tejzat e zërit

      ti bëjnë me ushtue çuditë e punëve tua,

      zgjidhe mëkatin e buzve fajtore,

      o Shën Joan.

 

      Kur erdh nga qielli i epër Lajmëtari

      ke yt atë se ti do lindësh njeri i madh,

      emrin dhe vargun e jetës që do bëje

      me radhë ia shfaqi.

 

      Ai me dyshim n’premtimin e të Eprit

      humbi në çast mënyrën e të folurit;

      por kur u linde ia përtërive organet

      e zërit t’shuar.

 

      Strukur n’folenë e mbuluar të barkut

      kishe ndier mbretin që në dhomë qëndronte;

      këtej nëna e foshnjës për meritë të dyve

      shfaqi të fshehtat.

 

      Banorët e qiellit madhërojnë me lavde

      ty, o Zot i thjeshtë e i barabartë n’Trini;

      dhe ne si lutës ty të lypim falje:

      fali t’shpërblyerit. Amen.

 

      Ose një himn tjetër, apo një këngë e miratuar nga autoriteti kishtar.

 

Ant. 1 Prej Elizabetës lindi Gjoni, pararendësi i Krishtit.

 

      Psalmi 113 /112/    (1-9)

 

Lavdërojeni, shërbëtorët e Zotit, *

      lavdërojeni, Emrin e Zotit!

Qoftë bekuar Emri i Zotit *

      qysh tash e deri në amshim,

 

Që kur lind dielli e derisa perëndon *

      qoftë bekuar Emri i Zotit!

I madhërueshëm është Zoti mbi të gjithë popujt, *

      lavdia e tij i tejkalon qiejt

 

Kush është si Zoti, Hyji ynë, †

      që fronin e ka në Lartësi, *

      e nga lart vrojton qiellin e tokën?

 

Nga pluhuri e ngre skamnorin, *

      nga llomi e lartëson të vobektin

për ta vënë të rrijë me princa, *

      me princat e popullit të vet.

 

Ai bën të banojë beronja në shtëpi të vet *

      nënë fëmijësh të gëzueshme.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Prej Elizabetës lindi Gjoni, pararendësi i Krishtit.

 

Ant. 2 Plakë dhe beronjë, Elizabeta e qiti në dritë Gjon Pagëzuesin.

 

Psalmi 146 /145/    (1-10)

 

Lavdëroje, shpirti im, Zotin! †

      Do ta lavdëroj Zotin gjithë jetën time, *

      derisa të jem, Hyjit tim do t’i këndoj.

 

Mos e vini shpresën tuaj në princa, *

      në njeri që s’është i zoti të të shpëtojë.

Njeriu jep shpirt e kthehet në dheun e vet, *

      brenda një dite humbasin synimet e tij.

 

I lumi ai që e ka ndihmën e Hyjit të Jakobit, *

      që e ka shpresën në Zotin, Hyjin e vet,

i cili krijoi qiellin e Tokën, *

      detin e gjithçka është në ta,

 

që e mban besnikërinë për amshim, †

      që u jep të drejtën të nëpërkëmburve, *

      u jep ushqimin të uriturve.

 

Zoti i çliron robërit, *

      Zoti u jep dritën e syve të verbërve,

Zoti i ndreq të kërrusurit, *

      Zoti i do të drejtët,

 

Zoti i mbron ardhacakët, †

      u ndihmon bonjakëve e të vejave, *

      ndërsa mëkatarëve ua pështjellon udhët.

 

Zoti do të mbretërojë për jetë, †

      Hyji yt, o Sion, nga breznia në brezni.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 Plakë dhe beronjë, Elizabeta e qiti në dritë Gjon Pagëzuesin.

 

Ant. 3 Prej të gjithë atyre që lindën prej gruaje nuk lindi kush më i madh se Gjon Pagëzuesi.

 

Qoftë bekuar Hyji.*

      Ati i Zotit tonë Jezu Krishtit,

i cili na bekoi me çdo bekim shpirtëror *

      në qiell në Krishtin.

 

Në Të na zgjodhi *

      para krijimit të botës

që të jemi të shenjtë e të papërlyer *

      para Tij në dashuri.

 

Ai na parashënoi për vete *

      të jemi bij në shpirt

në saje të Jezu Krishtit *

      me pëlqimin e vullnetit të vet

 

për nder të lavdisë së hirit të tij *

      me të cilin na pajisi me anë të të Dashurit:

në Të, në saje të gjakut të tij, *

      e fituam shpërblimin;

 

në Të na u falën fajet *

      me anë të begatisë së hirit të tij,

të cilin Hyji e ndikoi në ne *

      bashkë me çdo urti e kuptim.

 

Ai na vuri në dijeni *

      mbi misterin e vullnetit të vet

synim që lirisht kishte vendosur *

      qysh më parë ta kryente në Të

 

kur të plotësohej koha: *

      të vërë çdo gjë

      nën kryesinë e Krishtit,

të gjithë qenësit *

      që janë në qiell e në tokë.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Prej të gjithë atyre që lindën prej gruaje nuk lindi kush më i madh se Gjon Pagëzuesi.

 

      Leximi i shkurtër Vap 13, 23-25

 

      Hyji, prej pasardhësve të Davidit, si pati premtuar, ia ngriti Izraelit Shëlbuesin: Jezusin. Para ardhjes së Jezusit Gjoni i predikoi mbarë popullit të Izraelit pagëzimin e kthimit. E kur Gjoni po i jepte fund misionit të vet, thoshte: 'Unë nuk jam ai që ju mendoni se jam! Por, ja, pas meje po vjen, ai, të cilit unë nuk jam i denjë t'ia zgjidh të mbathurat e këmbëve.'

 

      Përgjigjja e shkurtër

 

      C Drejtoni shtigjet e Zotit, * përgatitni udhët e tija.

      Drejtoni shtigjet e Zotit, përgatitni udhët e tija.

      D Pas meje po vjen një, që ishte para meje:

      përgatitni udhët e tija.

      Lavdi Atit e Birit e Shpirtit Shenjt.

      Drejtoni shtigjet e Zotit, përgatitni udhët e tija.

 

      Kënga ungjillore (Magnificat Lk 1, 46-55)

 

      Ant. Në tempullin e Zotit, në të djathtën e lterit të kemit, Zakaria pa engjëllin Gabriel.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

      Ant. Në tempullin e Zotit, në të djathtën e lterit të kemit, Zakaria pa engjëllin Gabriel.

 

      Lutjet e besimtarëve

 

Me plot hare t’i lutemi Hyjit që Gjon Pagëzuesin e zgjodhi në mes të njerëzve që të kumtojë mbretërinë e Krishtit:

 

      Drejtoji, o Zot, hapat tanë në shtigjet e paqes.

 

Gjonin e thirre nga kraharori i nënës për të përgatitur rrugën e Birit tënd

—    na thirr edhe ne të shkojmë pas Zotërisë me zellin e Gjonit, i cili ia përgatiti rrugën.

Ti bëre që Gjon Pagëzuesi ta njohë Qengjin e Hyjit

—    bëj që Kisha jote t’ua tregojë të gjithëve, dhe njerëzit e kohës sonë ta njohin.

Ti bëre që profeti yt të zvogëlohet, ndërsa Krishti të rritet

—    bëj që edhe ne të zvogëlohemi, dhe ti të shfaqesh nëpër ne.

Nëpër mundimet e Gjonit deshe që të mbrohet e drejta

—    na bëj të palëkundshëm në dëshminë e së vërtetës sate.

Le të të bjerë në mend për ata që kaluan nga kjo jetë

—    vendosi në brigjet e dritës dhe e paqes.

 

      Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.

      Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

      Lutja

 

      Bëj, o Hyj i gjithëpushtetshëm, që familja jote të ecë udhës së shëlbimit nën udhëheqjen e shën Gjonit pararendës dhe të arrijë me siguri te Jezu Krishti, Zoti ynë, të cilin Gjoni e tregoi të pranishëm. Nëpër Zotin.

 

      Përfundimi i Orës sikurse në Shërbesën e rëndomtë.