Mbrëmësorja

3 korrik, Shën Toma, apostull

 

Lutjet e mbrëmjes

 

V.    Hyj, më eja në ndihmë!

P.    O Zot, shpejto të më ndihmosh!

 

V.    Lavdi Atit e Birit e Shpirtit Shenjt,

P.    si ka qenë në fillim,

      ashtu tash e përgjithmonë e jetës. Amen.

 

      Himni

 

      Ti që shkëlqen me dritën më të madhen

      e radhës së Apostujve,

      prano, o Thoma, mirëdashës

      lavdet që ty të thurim.

 

      Ty në selitë e ndritshme

      vendos dashnia e Krishtit,

      ti i gatshëm prej dashnie

      lakmon me vdekë për Mësuesin.

 

      Ty të mundon dëshira

      kur të tregojnë vëllezrit,

      për siguri don t’shohësh

      duke prekë n’plagë Jezusin.

 

      Me sa gëzim të zemrës

      atë e shikon me dhimbje,

      e thua se i beson Hyjit,

      që e adhuron me valë të shpirtit.

 

      Për ne që nuk e shohim

      më e mprehtë n’ty bëhet feja,

      e zjarrtë dhe më e fuqishme

      ku ne kërkojmë dashninë e Krishtit.

 

      Krishtit i qoftë e tërë lumnia,

      që ne me lutjet tua

      t’na japë n’fé duke ecur

      parreshtur atë të shohim. Amen.

 

      Ose një himn tjetër, apo një këngë e miratuar nga autoritetet kishtare.

 

Ant. 1 Zotëri, ne s’dimë kah po shkon, si, pra, mund ta dimë udhën? Unë jam Udha, e Vërteta dhe Jeta.

 

Psalmi 116 /115/ (10-19)

 

Besoj edhe atëherë kur më duhet të them: *

      »Jam i pafat për së tepërmi!«.

Në hutimin tim kam thënë: *

      »Rrenacak është çdo njeri!«

 

Si do t’ia shpërblej Zotit *

      për të gjitha të mirat që m’i ka dhënë?

Do të ngre gotën e shëlbimit *

      e me nderim do të thërras Emrin e Zotit.

 

Do t’i kryej kushtet e mia bërë Zotit *

      në praninë e mbarë popullit të tij.

E çmueshme është para Zotit *

      vdekja e shenjtërve të tij.

 

O Zot, unë jam shërbëtori yt, †

      shërbëtori yt dhe biri i shërbëtores sate. *

      Ti i këpute hekurat e mi:

 

ty do të ta kushtoj flinë e lavdit, *

      me nderim do të thërras Emrin e Zotit.

 

Do t’i kryej kushtet e mia bërë Zotit *

      në praninë e mbarë popullit të tij,

në oborret e Shtëpisë së Zotit, *

      midis teje, o Jerusalem!

 

Lavdi Atit e Birit *

      e Shpirtit Shenjt,

si ka qenë në fillim, *

      ashtu tash e përgjithmonë e jetës. Amen

 

Ant. 1 Zotëri, ne s’dimë kah po shkon, si, pra, mund ta dimë udhën? Unë jam Udha, e Vërteta dhe Jeta.

 

Ant. 2 Kur erdhi Jezusi, Toma nuk ndodhej me apostujt e tjerë. I thanë nxënësit e tjerë: E pamë Zotërinë, aleluja.

 

Psalmi 126 /125/ (1-6)

 

Kur Zoti i ktheu robërit e Sionit, *

      na dukej si të ishim në ëndërr.

Atëherë goja na u mbush me gaz *

      e gjuha jonë ia thoshte këngës së gëzimit!

 

Asohere thuhej ndër paganë: *

      »Zoti bëri për ta punë të mëdha!«

Vërtet Zoti bëri për ne mrekulli *

      e zemrat na u mbushën me gëzim!

 

Ktheji, o Zot, robërit tanë *

      porsi përrenjtë e mesditës!

Ata që mbjellin me lot, *

      deh, le të korrin me gëzim!

 

Në të shkuar ecnin e qanin *

      duke mbartur farën për ta mbjellë,

kurse në kthim do të vijnë plot gëzim *

      duke mbartur duajt e vet.

 

Lavdi Atit e Birit *

      e Shpirtit Shenjt,

si ka qenë në fillim, *

      ashtu tash e përgjithmonë e jetës. Amen

 

Ant. 2 Kur erdhi Jezusi, Toma nuk ndodhej me apostujt e tjerë. I thanë nxënësit e tjerë: E pamë Zotërinë, aleluja.

 

Ant. 3 Shtjere gishtin tënd në shenjat e gozhdave: mos ji njeri që s’beson, por besimtar, aleluja.

 

Kënga Krh. Ef 1, 3-10

 

Qoftë bekuar Hyji.*

      Ati i Zotit tonë Jezu Krishtit,

i cili na bekoi me çdo bekim shpirtëror *

      në qiell në Krishtin.

 

Në Të na zgjodhi *

      para krijimit të botës

që të jemi të shenjtë e të papërlyer *

      para Tij në dashuri.

 

Ai na parashënoi për vete *

      të jemi bij në shpirt

në saje të Jezu Krishtit *

      me pëlqimin e vullnetit të vet

 

për nder të lavdisë së hirit të tij *

      me të cilin na pajisi me anë të të Dashurit:

në Të, në saje të gjakut të tij, *

      e fituam shpërblimin;

 

në Të na u falën fajet *

      me anë të begatisë së hirit të tij,

të cilin Hyji e ndikoi në ne *

      bashkë me çdo urti e kuptim.

 

Ai na vuri në dijeni *

      mbi misterin e vullnetit të vet

synim që lirisht kishte vendosur *

      qysh më parë ta kryente në Të

 

kur të plotësohej koha: *

      të vërë çdo gjë

      nën kryesinë e Krishtit,

të gjithë qenësitë *

      që janë në qiell e në tokë.

 

Lavdi Atit e Birit *

      e Shpirtit Shenjt,

si ka qenë në fillim, *

      ashtu tash e përgjithmonë e jetës. Amen

 

Ant. 3 Shtjere gishtin tënd në shenjat e gozhdave: mos ji njeri që s’beson, por besimtar, aleluja.

 

      Leximi i shkurtër Krh. Ef 4, 11-13

 

      Krishti i ‘dha' disa apostuj, disa tjerë profetë, disa prapë ungjilltarë, do të tjerë barinj dhe mësues, që shenjtërit t'i bëjë të aftë për veprën e shërbesës, për ndërtimin e trupit të Krishtit, deri që të gjithë t'ia arrijmë njësisë së fesë dhe njohjes së Birit të Hyjit deri në gjendjen e njeriut të përsosur, deri në masën që i përket pjekurisë së plotë të Krishtit.

 

      Përgjigjja e shkurtër

 

      C Shpallni në mes të popujve * mrekullitë e Zotit.

      Shpallni në mes të popujve mrekullitë e Zotit.

      D Kumtoni në mbarë kombet,

      mrekullitë e Zotit.

      Lavdi Atit e Birit e Shpirtit Shenjt.

      Shpallni në mes të popujve mrekullitë e Zotit.

 

Kënga ungjillore (Magnificat Lk 1, 46-55)

 

Ant. E vura gishtin në varrën e gozhdëve, dhe dorën në kraharorin e shporuar dhe thashë: Zoti im dhe Hyji im! Aleluja.

 

Shpirti im e madhëron Zotin, *

      shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

      qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithpushtetshëm *

      ‑ i shenjtë është Emri i tij!

 

Mëshira e tij brezni më brezni *

      për ata që e druajnë.

 

E tregoi fuqinë e krahut të vet: *

      hodhi poshtë qëllimet e krenarëve,

 

i rrëzoi princat prej froneve të tyre *

      i lartësoi të përvujtët.

 

Me të mira i mbushi ata që s'kishin ç'të hanë

      të pasurit i nisi duarthatë.

 

I ndihmoi Izraelit, shërbëtorit të vet,

      duke e sjellë në mend mëshirën

 

‑ si ua pati premtuar etërve tanë *

      në të mirën e Abrahamit e të pasardhësve të tij në amshim.

 

Lavdi Atit e Birit *

      e Shpirtit Shenjt,

si ka qenë në fillim, *

      ashtu tash e përgjithmonë e jetës. Amen.

 

Ant. E vura gishtin në varrën e gozhdëve, dhe dorën në kraharorin e shporuar dhe thashë: Zoti im dhe Hyji im! Aleluja.

 

      Lutjet e besimtarëve

 

Të ndërtuar mbi themelin e apostujve, t’i lutemi Zotit, Hyjit të gjithëpushtetshëm, për popullin e tij të shenjtë dhe t'i drejtohemi duke i thënë:

 

      O Zot, le të të bjerë në mend për Kishën tënde.

 

O Atë, ti deshe që Biri yt i ngjallur prej të vdekurve së pari t'u lajmërohet apostujve

—    bëj që të jemi dëshmitarët e tij deri në mbarim të botës.

Birin tënd e dërgove në botë që të varfërve t'u shpallë lajmin e gëzueshëm të shëlbimit

—    bëj që Ungjilli t'i predikohet çdo krijese.

Birin tënd e dërgove që ai ta mbjellë farën e fjalës

—    bëj që edhe ne të cilët në vuajtje e mbjellim farën, me gëzim të korrim frytet e saj.

Ti e dërgove Birin tënd që me gjakun e vet ta pajtojë botën me ty

—    bëj që të gjithë ne të marrim pjesë në pajtimin tënd me botën.

Birin tënd e vure në qiell në të djathtën tënde

—    merri në Mbretërinë e të të lumturve të vdekurit tanë të dashur.

 

      Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.

      Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

      Lutja

 

      Bëj, o Hyj i gjithëpushtetshëm, ta kremtojmë me gëzim festën e shën Tomës apostull, që, me ndërmjetësinë e tij, e në saje të fesë, të kemi jetën në emër të Krishtit, të cilin ai e dëshmoi për Zot e Hyj të tij. Nëpër Zotin.