Mbrëmësorja
27 gusht, Shën Monika
MBRËMËSORJA
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. (K. P. aleluja).
Himni
Të gjithë të lavdrojmë gruan
e fortë me shpirt burrnor,
që me lavdi shenjtrie,
kudo shkëlqen famëmadhe.
Nga dashni e shenjtë plagosur,
ndërsa shkel gjëra të pavlefshme
të kësaj bote, drejt qiellit
rrugën e vështirë e kreu.
Mposht me agjërime trupin,
duke ushqyer mendjen
me ushqim t’ëmbël të lutjes,
shtie n’dorë gëzimet e qiellit.
Krisht Mbret, fuqi e të fortve,
që veç ti bën punë të mëdha,
me uratë të kësaj, të lypim,
mirëdashës dëgjo lutësit.
Ty, Jezus, t’ qoftë lavdia,
që na jep të shpresojmë
t’lumes shërbtore kushtet,
dhe çmimet e amshueme. Amen.
Ant. 1 Unë të thirra në ndihmë, o Zot, e ti më shërove, do të të lavdëroj përgjithmonë.
Psalmi 30 /29/ (2-13) Falënderim për shpëtim nga vdekja
Krishti e falënderon Atin për ringjalljen e tij të lavdishme (Cassiano).
Të madhëroj, o Zot, pse më shpëtove *
e nuk lejove të ngihen armiqtë e mi mbi mua.
O Zot, Hyji im, *
unë të thirra e ti më shërove,
ti, o Zot, ma nxore shpirtin nga Nëntoka, *
më ktheve në jetë që të mos zbres në varr.
Këndoni Zotit ju, o besimtarët e tij, *
falënderojeni Emrin e shenjtë të tij!
Sepse një çast zgjat hidhërimi i tij *
e tërë jetën dashamirësia e tij!
Mbrëmja vjen me lot, *
e mëngjesi plot hare!
Kur nuk më mungonte gjë, thosha: *
»Askurrë s’do të trandem!«
Më ke vënë, o Zot, në majën e malit të sigurt, *
porse, posa ma fsheh fytyrën tënde, frikësohem.
Atëherë ty, o Zot, të lëshoja kushtrimin, *
i lutesha Hyjit tim.
Ç’dobi nga gjaku im *
në qoftë se zbres në shkatërrim?
A thua do të të lavdërojë pluhuri, *
e do ta kumtojë besnikërinë tënde?
Më dëgjoi Zoti e pati mëshirë për mua, *
Zoti u bë ndihmëtari im.
Ti vajin ma ktheve në valle, *
ma zhgjeshe grathoren time e më ngjeshe me hare,
që shpirti im të të këndojë e të mos pushojë: *
»O Zot, Hyji im, do të të lavdëroj për amshim!«
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Unë të thirra në ndihmë, o Zot, e ti më shërove, do të të lavdëroj përgjithmonë.
Ant. 2 Lum ai njeri të cilit Zoti ia fal mëkatin.
Psalmi 32 /31/ (1-11) Falënderim për faljen e mëkateve
Davidi e shpall të lumtur atë njeri të cilin Hyji e bën të drejtë pavarësisht nga veprat (Rom 4, 6).
Lum ai që iu fal mëkati, *
që iu mbulua faji!
Lum ai njeri që Zoti nuk e numëron ndër mëkatarë, *
në shpirtin e të cilit nuk ka dredhi.
Pse heshta, eshtrat m’u kalbën *
prej dënesës së vazhdueshme,
sepse ditën, natën dora jote rëndonte mbi mua, *
fuqia më lëshonte porsi në vapë të verës.
Atëherë ta dëftova mëkatin tim, *
fajin tim më nuk e fsheha.
Thashë: »Do t’ia rrëfej Zotit fajin tim,« *
e ti ma fale fajësinë e mëkatit tim.
Prandaj le të lutet çdo besimtar *
në kohë të përshtatshme,
kur të vërshojnë ujërat e shumta, *
atë s’do ta zënë.
Ti je strehimi im, ti më ruan prej vështirësisë, *
do të më rrethosh me këngë gëzimi.
Do të të bëj të dijshëm,
do të ta mësoj rrugën që duhet ndjekur, *
sytë e mi do t’i përqendroj mbi ty.
Mos u bëni si kali e mushku
që nuk kanë mend. †
Për ta lypset kapistër e fre për t’i sunduar, *
përndryshe s’do të afroheshin te ti.
Shumë vështirësi e rrethojnë bakeqin, *
atë që shpreson në Zotin e rrethon hiri.
Gëzohuni në Zotin e galdoni, o të drejtë, *
brohoritni të gjithë ju që jeni zemërpastër.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Lum ai njeri të cilit Zoti ia fal mëkatin.
Ant. 3 E mori në dorë mbretërinë e vet, Zoti Hyj, Zotëruesi i gjithësisë.
Kënga Krh. Zb 11, 17-18; 12, 10b-12a Gjyqi i Zotit
Po të falënderojmë, o Zotëri,
Hyj i Gjithëpushtetshëm, *
ty që je, ty që ishe,
sepse e ushtrove fuqinë tënde të madhe *
dhe e more mbretërimin!
Paganët u hidhëruan, †
por arriti zemërimi yt! *
Erdhi koha të gjykohen të vdekurit,
koha e shpërblimit për shërbëtorët e tu *
profetët dhe shenjtërit
dhe për të gjithë ata që e druan Emrin tënd *
- për të vegjël e të mëdhenj.
Ja, tani koha e shëlbimit, †
e pushtetit dhe e Mbretërisë së Hyjit tonë *
dhe e sundimit të Krishtit të tij!
Sepse u hodh poshtë paditësi i vëllezërve tanë *
që ditë e natë i padiste para Hyjit tonë.
Por ata e mundën në fuqi të gjakut të Qengjit †
dhe në saje të dëshmisë së vet: *
nuk e deshën jetën e vet aq sa ta dronin vdekjen.
Prandaj galdo, o qiell, *
galdoni edhe ju, o qiellorë të gjithë!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 E mori në dorë mbretërinë e vet, Zoti Hyj, Zotëruesi i gjithësisë.
Leximi i shkurtër Rom 8, 28-30
Ne e dimë se Hyji në gjithçka bashkëpunon me ata që e duan, me ata që, me vendimin e tij, janë të thirrur. Sepse, ata që ka njohur që më parë, ata edhe i paracaktoi të jenë të ngjashëm me Birin e vet, kështu që Biri i tij të jetë vëllai i parë në mes të shumë vëllezërve. Ata që i paracaktoi, ata edhe i grishi; ata që i grishi, ata edhe i shfajësoi, ata që i shfajësoi, ata edhe i lavdëroi.
Përgjigjja e shkurtër
C Zoti të zgjodhi * dhe të parapëlqeu.
Zoti të zgjodhi dhe të parapëlqeu.
D Në tendën e vet të bëri të banosh,
dhe të parapëlqeu.
Lavdi Atit e Birit e Shpirtit Shenjt.
Zoti të zgjodhi dhe të parapëlqeu.
Kënga ungjillore (Magnificat Lk 1, 46-55)
Ant. Me jetën tënde besnike dhe bujare, Monikë, e dashura e Krishtit, ti i dhe lavdi Zotit.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvuajturit.
Me të mira i mbushi ata që s'kishin ç'të hanë
e të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Me jetën tënde besnike dhe bujare, Monikë, e dashura e Krishtit, ti i dhe lavdi Zotit.
Lutjet e besimtarëve
Me ndërmjetësinë e çmueshme të të gjithë shenjtërve dhe shenjtëreshave të qiellit t’i lutemi Zotit:
Le të të bjerë ndër mend për Kishën tënde, o Zot.
Për hir të martireve të shenjta, që me forcë të krishterë mundën vdekjen,
— jepi Kishës sate, që gjendet në mes të vuajtjeve dhe vështirësive, fuqinë e Shpirtit tënd.
Për të gjitha ato që u shenjtëruan me hirin e sakramentit të martesës,
— jepi Kishës sate frytshmërinë apostolike.
Për të vejat, që e shndritën vetminë e tyre me lutje dhe me vepra dashurie,
— bëj që Kisha jote t’i dëshmojë botës fuqinë e mistershme të dashurisë dhe të lutjes.
Për nënat e shenjta, që i lindën dhe i edukuan fëmijët e tyre për një jetë të ndershme qytetare dhe për dëshminë e mbretërisë sate,
— bëj që Kisha jote t’i lindë të gjithë njerëzit në të vërtetën dhe në hirin tënd.
Për të gjitha gratë e shenjta, të cilat e merituan të kundrojnë dritën e fytyrës sate,
— bëj që vëllezërit tanë e motrat tona të vdekura ta shijojnë gëzimin e jetës së pasosur.
Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj, ngushëllimi i atyre që janë në trishtim, ti i pranove lotët e shën Monikës për kthimin e birit të saj Augustinit, bëj që, me ndërmjetësinë e të dyve, të dimë t’i qajmë mëkatet tona e, për mëshirën tënde, të fitojmë faljen e tyre. Nëpër Zotin.
Përfundimi i Orës sikurse në Shërbesën e rëndomtë.