Mbrëmësorja
14 shtator, Lartësimi i Kryqit të shenjtë
Festë
MBRËMËSORJA I
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. (K. P. aleluja).
Himni
Po na prijnë flamujt e mbretit,
shkëlqen misteri i kryqit,
ku vetë krijuesi i trupit
me trup është varë në atë kryq.
Ku, mbi të i plagosur
me majë mizore t’heshtës,
për të larë ne nga mëkati,
derdhi një rrëké të gjakut.
Dru e hijshme dhe e shkëlqyer,
stolisë me purpur mbreti,
nga trung fisnik e zgjedhur
sa gjymtyrë shenjte prekin.
E lume, krahë të cilës
rri varë vlera e gjithë botës,
që u bë ballancë e trupit,
e i hoqi plaçkën ferrit.
Altar e fli, po ju falem,
për lavdinë e mundimeve,
ku jeta i dha fund vdekjes,
e me vdekje ktheu prapë jetën.
Të falem Kryq shpresë e vetme,
në këtë kohë të mundimeve
shtoju hirin të drejtëve,
fajtorëve shlyeju krimet.
Ty gurrë shpëtimi, o Trini,
çdo shpirt të lavdëroftë ty;
ata që me Kryq shpëtove
ruaji përher për vete. Amen.
Ant. 1 Jezusi, i kryqëzuari, u ringjall prej së vdekuri; ai na liroi, aleluja.
Psalmi 147 /146/ (1-11)
Lavdërojeni Zotin, sepse është mirë, †
është bukur t’i këndosh Hyjit tonë, *
është kënaqësi ta lavdërosh si i ka hije!
Zoti e rindërton Jerusalemin, *
i bashkon izraelitët e mërguar!
Ai i shëron zemrat e copëtuara, *
i lidh plagët e tyre!
Ai e njeh numrin e yjeve *
dhe e thërret secilin me emër.
I madh është Zoti ynë, i gjithëpushtetshëm, *
e pakufishme është dija e tij.
Zoti i lartëson të përvujtët, *
kurse përdhe i shtron keqbërësit.
Këndojani Zotit këngën e falënderjes, *
bini harpës për nder të Hyjit tonë!
Ai me re e mbulon qiellin *
dhe ia përgatit dheut shiun.
Bën të rritet maleve bari *
edhe bimë për të mirën e njeriut.
Ai u jep ushqime bagëtive, *
deri edhe zogjve të korbave kur ia kërkojnë.
S’i jep rëndësi fuqisë së kalit, *
s’i merr parasysh kërçikët e trimit:
Zotit i pëlqejnë ata që e druajnë, *
ata që shpresojnë në mirësinë e tij.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Jezusi, i kryqëzuari, u ringjall prej së vdekuri; ai na liroi, aleluja.
Ant. 2 Në zemrën e qytetit të shenjtë ngrihet pema e jetës; gjethet e saj i shërojnë njerëzit, aleluja.
Psalmi 147 (1-9)
Lavdëroje, Jerusalem, Zotin, *
madhëroje, o Sion, Hyjin tënd!
Sepse i forcoi shulat e dyerve të tua, *
i bekoi bijtë e tu në ty!
Ai ua siguron kufijve të tu paqen, *
ai të ushqen me palcën e grurit.
Ai e dërgon fjalën e vet mbi tokë, *
lajmi i tij vrapon me shpejtësi.
E hedh borën porsi lesh, *
e derdh brymën porsi hi.
E lëshon breshrin porsi kafshatë, *
kush mund të qëndrojë para të ftohtit të tij?
E dërgon fjalën e vet e ato shkrihen, *
çon erën e vet e ujërat rrjedhin.
Ai ia zbulon fjalën e vet Jakobit, *
drejtësitë e gjyqet e veta Izraelit.
Nuk bëri kështu me asnjë komb tjetër: *
asnjërit nuk ia zbuloi vendimet e veta.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Në zemrën e qytetit të shenjtë ngrihet pema e jetës; gjethet e saj i shërojnë njerëzit, aleluja.
Ant. 3 Lavdia jonë është kryqi i Zotit tonë Jezu Krishtit.
Kënga Fil 2, 6-11
Krishti Jezus, edhe pse me natyrë Hyj, *
barazinë e vet me Të
nuk e çmoi si një visar që s’mundet pa të,
por ia mohoi vetvetes *
e mori natyrën e shërbëtorit
dhe u bë i ngjashëm me njerëz
dhe, për kah pamja e jashtme, *
dukej vetëm njeri.
E përuli vetveten
duke u bërë i dëgjueshëm deri në vdekje, *
mu deri në vdekje në kryq.
Prandaj edhe Hyji e lartësoi tesve *
dhe i dha Emrin që është mbi çdo emër
që në Emër të Jezusit të përkulet çdo gju *
i atyre që janë në qiell, në tokë e në nëntokë
dhe çdo gjuhë të dëshmojë: *
‘Jezu Krishti është Zot!’
Në nder të Hyjit Atë.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Lavdia jonë është kryqi i Zotit tonë Jezu Krishtit.
Leximi i shkurtër 1 Kor 1, 23-24
Ne predikojmë Krishtin e kryqëzuar ‑ për hebrenj shkandull e për paganë marri, kurse për të grishurit ‑ si për hebrenj si për grekë ‑ Krishtin ‑ fuqinë e Hyjit dhe dijen e Hyjit.
Përgjigjja e shkurtër
C Zoti po kthehet: * në qiell paraqitet shenja e tij.
Zoti po kthehet: në qiell paraqitet shenja e tij.
D Lirimi juaj është i afërt:
në qiell paraqitet shenja e tij
Lavdi Atit e Birit e Shpirtit Shenjt.
Zoti po kthehet: në qiell paraqitet shenja e tij.
Kënga ungjillore (Magnificat Lk 1, 46-55)
Ant. Krishti duhej të vuante: tash u ngjall së vdekuri që të hyjë në lavdi.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithëpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvuajturit.
Me të mira i mbushi ata që s'kishin ç'të hanë
e të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Krishti duhej të vuante: tash u ngjall së vdekuri që të hyjë në lavdi.
Lutjet e besimtarëve
Me lutje plot shpresë t’i drejtohemi Shëlbuesit, i cili na shpërbleu me kryqin e tij:
Nëpër kryqin tënd na ngrite në mbretërinë tënde.
O Jezu Krisht, ti vetveten e përule duke u bërë shërbëtor në përngjasim me njerëz
— bëj që anëtarët e Kishës ta trashëgojnë përvujtërinë tënde.
O Krisht, ti u përvujtërove duke u bërë i dëgjueshëm deri në vdekje, madje deri në vdekje në kryq
— bëj që shërbëtorët e tu të jenë të dëgjueshëm, të durueshëm dhe të qëndrueshëm.
O Krisht, ty Hyji të lartësoi dhe ta dha emrin që është mbi çdo emër
— jepu besimtarëve të tu qëndrueshmëri deri në fund të jetës.
O Jezu Krisht, në emrin tënd duhet të përkulet çdo gju në qiell, në tokë e në nëntokë
— mbushi njerëzit me dashuri që të të adhurojnë në paqe.
O Jezu Krisht çdo gjuhë do të dëshmojë se ti je Zot, në nder të Hyjit Atë
— pranoji vëllezërit tanë të vdekur në mbretërinë e lumturisë së amshuar.
Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj, ti deshe që i Njëlinduri Biri yt të vdiste në Kryq për shëlbimin e të gjithë njerëzve: bëj që, pasi e njohëm këtu mbi tokë misterin e dashurisë së tij, t’i gëzojmë në qiell frytet e shpërblimit të tij. Nëpër Zotin.
Përfundimi i Orës sikurse në Shërbesën e rëndomtë.