Mbrëmësorja

1 nëntor, Të gjithë shenjtërit

MBRËMËSORJA I

V. Hyj, më eja në ndihmë!

P. O Zot, shpejto të më ndihmosh!

V. Lavdi Atit e Birit e Shpirtit Shenjt,

P. si ka qenë në fillim,

ashtu tash e përgjithmonë e jetës. Amen. (K. P. aleluja).

Himni

O Krisht, shëlbuesi i t’gjithëve

ruaji shërbëtorët e tu,

zbutur nga lutjet shenjte

të Virgjërës përherë të lume.

Të lume dhe ju vallet

e shpirtrave qiellorë,

dëmet e shkuara e t’tashme

dëboni dhe të ardhshmet.

Profetë e apostuj t’Hyjit

gjykatës të amshueshëm,

përvuajtas po ju lypim

shëlbim me lutjet tuaja.

Martirë të ndritur t’Hyjit

dhe dëshmitarë të pastër,

ne me uratat tuaja

na mbartni ndër qiellorët.

Koret e virgjërave shenjte

dhe i të gjithë murgarëve,

së bashku me gjithë shenjtrit

bëni pjestarë të Krishtit.

Trinisë i qoftë lavdia,

bashkoni zërat tuaja

që asaj lavdet e duhura

t’ia thurim gjallërisht. Amen.

Ose një himn tjetër, apo një këngë e miratuar nga autoriteti kishtar.

Ant. 1 Për shenjtërit e tu, o Hyj, shkëlqen një dritë e amshuar dhe një jetë e pafund, aleluja.

Psalmi 113 /112/ (1-9)

Lavdërojeni, shërbëtorët e Zotit, *

lavdërojeni, Emrin e Zotit!

Qoftë bekuar Emri i Zotit *

qysh tash e deri në amshim,

Që kur lind dielli e derisa perëndon *

qoftë bekuar Emri i Zotit!

I madhërueshëm është Zoti mbi të gjithë popujt, *

lavdia e tij i tejkalon qiejt

Kush është si Zoti, Hyji ynë, †

që fronin e ka në Lartësi, *

e nga lart vrojton qiellin e tokën?

Nga pluhuri e ngre skamnorin, *

nga llomi e lartëson të vobektin

për ta vënë të rrijë me princa, *

me princat e popullit të vet.

Ai bën të banojë beronja në shtëpi të vet *

nënë fëmijësh të gëzueshëm.

Lavdi Atit e Birit *

e Shpirtit Shenjt,

si ka qenë në fillim, *

ashtu tash e përgjithmonë e jetës. Amen.

Ant. 1 Për shenjtërit e tu, o Hyj, shkëlqen një dritë e amshuar dhe një jetë e pafund, aleluja.

Ant. 2 Jerusalem, qytet i Hyjit, bijtë e tu do të jenë gëzimi yt: të gjithë do të jenë të bekuar dhe të bashkuar pranë Zotit, aleluja.

Psalmi 147 (1-9)

Lavdëroje, Jerusalem, Zotin, *

madhëroje, o Sion, Hyjin tënd!

Sepse i forcoi shulat e dyerve të tua, *

i bekoi bijtë e tu në ty!

Ai ua siguron kufijve të tu paqen, *

ai të ushqen me palcën e grurit.

Ai e dërgon fjalën e vet mbi tokë, *

lajmi i tij vrapon me shpejtësi.

E hedh borën porsi lesh, *

e derdh brymën porsi hi.

E lëshon breshrin porsi kafshatë, *

kush mund të qëndrojë para të ftohtit të tij?

E dërgon fjalën e vet e ato shkrihen, *

çon erën e vet e ujërat rrjedhin.

Ai ia zbulon fjalën e vet Jakobit, *

drejtësitë e gjyqet e veta Izraelit.

Nuk bëri kështu me asnjë komb tjetër: *

asnjërit nuk ia zbuloi vendimet e veta.

Lavdi Atit e Birit *

e Shpirtit Shenjt,

si ka qenë në fillim, *

ashtu tash e përgjithmonë e jetës. Amen.

Ant. 2 Jerusalem, qytet i Hyjit, bijtë e tu do të jenë gëzimi yt: të gjithë do të jenë të bekuar dhe të bashkuar pranë Zotit, aleluja.

Ant. 3 Shenjtërit e këndojnë një këngë të re para Hyjit dhe para Qengjit: himni i tyre jehon përmbi tokë, aleluja.

Kur këndohet kjo këngë, atëherë Aleluja mund të përsëritet disa herë çdo dy apo katër rreshta.

Kënga Krh. Zb 19, 1-7 Dasma e Qengjit

Aleluja!

Shëlbim, lavdi dhe pushtet Hyjit tonë, *

(C Aleluja.)

sepse gjyqet e tija janë të vërteta dhe të drejta

C Aleluja (aleluja).

Aleluja!

Lavdëroni Hyjin tonë, të gjithë shërbëtorët e tij *

(C Aleluja.)

të gjithë ju që e druani - të vegjël e të mëdhenj!

C Aleluja (aleluja).

Aleluja!

Mbretëron Zoti, *

(C Aleluja.)

Hyji ynë, i Gjithëpushtetshmi!

C Aleluja (aleluja).

Aleluja!

Le të galdojmë e të brohorasim *

(C Aleluja.)

dhe t’i japim lavdi Atij.

C Aleluja (aleluja).

Aleluja!

Sepse erdhi Dasma e Qengjit! *

(C Aleluja.)

Gati është Nusja e tij.

C Aleluja (aleluja).

Lavdi Atit e Birit *

e Shpirtit Shenjt,

si ka qenë në fillim, *

ashtu tash e përgjithmonë e jetës. Amen.

Ant. 3 Shenjtërit e këndojnë një këngë të re para Hyjit dhe para Qengjit: himni i tyre jehon përmbi tokë, aleluja.

Leximi i shkurtër Heb 12, 22-24a

I jeni afruar malit Sion, qytetit të Hyjit të gjallë, Jerusalemit qiellor: numrit të pamasë të engjëjve të bashkuar në festë, bashkimit të parëlindurve, emrat e të cilëve janë të shkruar në qiell, Hyjit - Gjyqtarit të të gjithëve, shpirtrave të të drejtëve që ia arritën përsosmërisë, Jezusit - Ndërmjetësit të Besëlidhjes së re dhe Gjakut stërpikës që flet më mirë se gjaku i Abelit.

Përgjigjja e shkurtër

C Galdojnë të drejtët * në praninë e Zotit.

Galdojnë të drejtët në praninë e Zotit.

D Gëzim i madh e galdim i pakufi

në praninë e Zotit.

Lavdi Atit e Birit e Shpirtit Shenjt.

Galdojnë të drejtët në praninë e Zotit.

Kënga ungjillore (Magnificat Lk 1, 46-55)

Ant. Të brohorit kori i apostujve edhe turma e panjollë e martirëve; zërat e profetëve bashkohen në lavdinë tënde; Kisha e shenjtërve e shpall lavdinë tënde: Trini e Shenjtë, një i vetmi Hyj!

Shpirti im e madhëron Zotin, *

shpirti im me hare i brohorit Hyjit, Shëlbuesit tim,

sepse shikoi me pëlqim mbi shërbëtoren e vet të përvujtë: *

qe se, që tani të gjitha breznitë do të më quajnë të lumtur,

sepse punë të mëdha bëri për mua Hyji i gjithpushtetshëm *

‑ i shenjtë është Emri i tij!

Mëshira e tij brezni më brezni *

për ata që e druajnë.

E tregoi fuqinë e krahut të vet: *

hodhi poshtë qëllimet e krenarëve,

i rrëzoi princat prej froneve të tyre *

i lartësoi të përvujtët.

Me të mira i mbushi ata që s'kishin ç'të hanë

të pasurit i nisi duarthatë.

I ndihmoi Izraelit, shërbëtorit të vet,

duke e sjellë në mend mëshirën

‑ si ua pati premtuar etërve tanë *

në të mirën e Abrahamit e të pasardhësve të tij në amshim.

Lavdi Atit e Birit *

e Shpirtit Shenjt,

si ka qenë në fillim, *

ashtu tash e përgjithmonë e jetës. Amen.

Lutjet e besimtarëve

Me gëzim t’i lutemi Zotit, burim dhe shpërblim të çdo shenjtërie:

O Zot, na shpëto me ndërmjetësinë e shenjtërve të tu.

O Zot i madh, ti nëpër Krishtin apostujt i vure për themel të Kishës

— ruaji besimtarët e tu në mësimin e tyre.

Ti martirëve ua dhe fuqinë që për ty të dëshmojnë deri në gjakderdhje

— bëj që të krishterët të jenë dëshmitarë besnikë të Birit tënd.

Ti virgjrave të shenjta u dhe dhuratën e mrekullueshme që ta ndjekin Krishtin

— bëj që virgjëria e kushtuar të mos i mungojë Kishës si shenjë e veçantë të të mirave qiellore.

Ti në të gjithë shenjtërit e tregon pranishmërinë dhe mirësinë tënde,

— bëj që duke i nderuar ata, të ndihemi në bashkim me Ty.

Bëj që të vdekurit gjithnjë të banojnë me Virgjrën Mari, shën Jozefin dhe të gjithë shenjtërit

— dhe me ndërmjetësinë e tyre na prano edhe ne një ditë në lavdinë e shtëpisë sate.

Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.

Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

Lutja

O Hyj i gjithëpushtetshëm dhe i amshuar, ti na dhe hirin t’i nderojmë meritat e të gjithë Shenjtërve në një festë të vetme: me ndërmjetësinë e përbashkët të të gjithëve, na dhuro mëshirën tënde të pakufi. Nëpër Zotin.

Përfundimi i Orës sikurse në Shërbesën e rëndomtë.