Mbrëmësorja
1 nëntor, Të gjithë shenjtërit
V. Hyj, më eja në ndihmë!
P. O Zot, shpejto të më ndihmosh!
V. Lavdi Atit e Birit e Shpirtit Shenjt,
P. si ka qenë në fillim,
ashtu tash e përgjithmonë e jetës. Amen. (K. P. aleluja).
Himni
O Krisht, shëlbuesi i t’gjithëve
ruaji shërbëtorët e tu,
zbutur nga lutjet shenjte
të Virgjërës përherë të lume.
Të lume dhe ju vallet
e shpirtrave qiellorë,
dëmet e shkuara e t’tashme
dëboni dhe të ardhshmet.
Profetë e apostuj t’Hyjit
gjykatës të amshueshëm,
përvuajtas po ju lypim
shëlbim me lutjet tuaja.
Martirë të ndritur t’Hyjit
dhe dëshmitarë të pastër,
ne me uratat tuaja
na mbartni ndër qiellorët.
Koret e virgjërave shenjte
dhe i të gjithë murgarëve,
së bashku me gjithë shenjtrit
bëni pjestarë të Krishtit.
Trinisë i qoftë lavdia,
bashkoni zërat tuaja
që asaj lavdet e duhura
t’ia thurim gjallërisht. Amen.
Ose një himn tjetër, apo një këngë e miratuar nga autoriteti kishtar.
Ant. 1 Dhe pashë para fronit një turmë të madhe, prej çdo kombi e fisi, dhe askush nuk mund t’i numëronte.
Psalmi 110 /109/ (1-5. 7)
I tha Zoti Zotit tim: *
»Rri në të djathtën time,
derisa t’i vë armiqtë e tu *
shtrojë për këmbët e tua!«
Skeptrin e pushtetit tënd Zoti do ta shtrijë nga Sioni: *
sundo midis armiqve të tu!
Ty të përket më i larti pushtet *
në ditën e fuqisë sate
në shkëlqime të shenjta *
nga kraharori para Yllit të Dritës
unë të linda.
Zoti u përbetua, assesi s’do të pendohet: *
Ti je prift për amshim
në mënyrën e Melkizedekut.«
Zoti është në të djathtën tënde, *
i dërrmon mbretërit ditën e zemërimit të vet.
Në udhëtim ujë do të pijë prej përroit, *
prandaj lart do ta ngrejë kokën.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 1 Dhe pashë para fronit një turmë të madhe, prej çdo kombi e fisi, dhe askush nuk mund t’i numëronte.
Ant. 2 Hyji i provoi dhe i gjeti të denjë për vete: do ta pranojnë një kurorë të shkëlqyer prej dorës së Zotit.
Psalmi 116 /115/ (10-19)
Besoj edhe atëherë kur më duhet të them: *
»Jam i pafat për së tepërmi!«.
Në hutimin tim kam thënë: *
»Rrenacak është çdo njeri!«
Si do t’ia shpërblej Zotit *
për të gjitha të mirat që m’i ka dhënë?
Do të ngre gotën e shëlbimit *
e me nderim do të thërras Emrin e Zotit.
Do t’i kryej kushtet e mia bërë Zotit *
në praninë e mbarë popullit të tij.
E çmueshme është para Zotit *
vdekja e shenjtërve të tij.
O Zot, unë jam shërbëtori yt, †
shërbëtori yt dhe biri i shërbëtores sate. *
Ti i këpute hekurat e mi:
ty do të ta kushtoj flinë e lavdit, *
me nderim do të thërras Emrin e Zotit.
Do t’i kryej kushtet e mia bërë Zotit *
në praninë e mbarë popullit të tij,
në oborret e Shtëpisë së Zotit, *
midis teje, o Jerusalem!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 2 Hyji i provoi dhe i gjeti të denjë për vete: do ta pranojnë një kurorë të shkëlqyer prej dorës së Zotit.
Ant. 3 Me gjakun tënd ti na shpërbleve, na thirre prej çdo populli dhe race, prej çdo gjuhe dhe kombësie: bëre prej nesh një mbretëri për Hyjin tonë.
Kënga Krh. Zb 4, 11; 5, 9. 10. 12.
I denjë je, o Zot, Hyji ynë, *
të marrësh lavdinë, nderin dhe pushtetin,
sepse ti krijove gjithçka, †
dhe me vullnetin tënd *
gjithçka u bë dhe u krijua!
Ti je i denjë, o Zot,
të marrësh librin *
dhe t’ia zgjidhësh vulat,
sepse qe prerë †
dhe me gjakun tënd i shpërbleve për Hyjin *
njerëzit e çdo fisi, gjuhe, populli dhe kombësie,
dhe i bëre për Hyjin tonë
mbretëri dhe priftërinj *
dhe ata do të mbretërojnë përmbi tokë.
I denjë është Qengji i prerë †
të marrë pushtetin, pasurinë, dijen, *
fuqinë, nderin, lumturinë dhe lavdinë!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. 3 Me gjakun tënd ti na shpërbleve, na thirre prej çdo populli dhe race, prej çdo gjuhe dhe kombësie: bëre prej nesh një mbretëri për Hyjin tonë.
Leximi i shkurtër 2 Kor 6, 16b; 7, 1
Ne jemi Tempulli i Hyjit të gjallë, siç tha vetë Hyji: 'Do të banoj në ta e ndër ta do të eci, do të jem Hyji i tyre dhe ata populli im.
Pasi ne i kemi këto premtime, të pastrohemi, o të dashurit e mi, nga çdo ndyrësi e trupit dhe e shpirtit, e ta përfundojmë shenjtërimin tonë në frikën e Hyjit.
Përgjigjja e shkurtër
C Shenjtër të Zotit, * galdoni në Zotin.
Shenjtër të Zotit, galdoni në Zotin.
D Hyji ju zgjodhi si trashëgimi të vetën:
galdoni, në Zotin.
Lavdi Atit e Birit e Shpirtit Shenjt.
Shenjtër të Zotit, galdoni në Zotin.
Kënga ungjillore (Magnificat Lk 1, 46-55)
Ant. Mbretëri e lavdishme, ku shenjtërit kënaqen me Krishtin dhe me petka të bardha shkojnë pas Qengjit.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen.
Ant. Mbretëri e lavdishme, ku shenjtërit kënaqen me Krishtin dhe me petka të bardha shkojnë pas Qengjit.
Lutjet e besimtarëve
Me gëzim t’i lutemi Zotit, burim dhe shpërblim të çdo shenjtërie:
O Zot, na shpëto me ndërmjetësinë e shenjtërve të tu.
O Zot i madh, ti nëpër Krishtin apostujt i vure për themel të Kishës
— ruaji besimtarët e tu në mësimin e tyre.
Ti martirëve ua dhe fuqinë që për ty të dëshmojnë deri në gjakderdhje
— bëj që të krishterët të jenë dëshmitarë besnikë të Birit tënd.
Ti virgjrave të shenjta u dhe dhuratën e mrekullueshme që ta ndjekin Krishtin
— bëj që virgjëria e kushtuar të mos i mungojë Kishës si shenjë e veçantë të të mirave qiellore.
Ti në të gjithë shenjtërit e tregon pranishmërinë dhe mirësinë tënde,
— bëj që duke i nderuar ata, të ndihemi në bashkim me Ty.
Bëj që të vdekurit gjithnjë të banojnë me Virgjrën Mari, shën Jozefin dhe të gjithë shenjtërit
— dhe me ndërmjetësinë e tyre na prano edhe ne një ditë në lavdinë e shtëpisë sate.
Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
O Hyj i gjithëpushtetshëm dhe i amshuar, ti na dhe hirin t’i nderojmë meritat e të gjithë Shenjtërve në një festë të vetme: me ndërmjetësinë e përbashkët të të gjithëve, na dhuro mëshirën tënde të pakufi. Nëpër Zotin.
Përfundimi i Orës sikurse në Shërbesën e rëndomtë.