Mbrëmësorja
9 nëntor, Kushtimi i Bazilikës së Lateranit
MBRËMËSORJA
Himni
Jerusalem, qyteti i lumtur,
me pamje shprehje e paqes,
nder qiej po ndërtohet
me gurë plot gjallëri,
nga engjëj kurorëzuar
si nusja i shoqëruar.
E re po vjen prej qiellit,
në shtratin nusëror
bërë gati, dhe e paprekur
me Zotërinë po bashkohet.
Muret e saja e sheshet
prej arit të kulluar.
Dyert prej margaritarësh
n’hyrje të shenjta ndrisin,
e për hir të virtyteve
atje mundet të futet
kush për emrin e Krishtit
këtu në botë sfilitet.
Prej rrahjeve e trysnive
mermerët e zbukuruar
vihen ndër vende t’veta
rreshtuar nga duart e mjeshtrit:
dhe përgjithmonë vendosen
n’ndërtesat e shenjtëruara.
Nder e lavdi i qoftë Hyjit
kudo n’lartësitë e epra,
dhe Atit bashkë me Birin
dhe Frymën e Shenjtëruar,
u qoftë pushteti e lavdet
ndër shekujt e amshueshëm. Amen.
Ose një himn tjetër, apo një këngë e miratuar nga autoritetet kishtare.
Ant. 1 Hyji e shenjtëroi tendën e vet; ai banon në të: nuk do të trandet askurrë.
Psalmi 46 /45/ (2-12)
Hyji është për ne strehim dhe fuqi, *
ndihmë gjithherë e gatshme në çdo vështirësi.
Prandaj as s’do të tutemi edhe nëse lëkundet toka *
dhe nëse malet do të kapërdihen nga deti!
Le të gjëmojnë e le të përzihen ujërat e tij, *
le të dridhen malet në furinë e tij!
Rrëketë e lumit do ta gëzojnë qytetin e Hyjit, *
tendat e shenjta të të Lartit Zot.
Hyji është brenda nuk do të trandet askurrë, *
Hyji i ndihmon herët në agim.
Ulëritën popujt, ranë mbretëritë, *
bubulloi Zoti, toka u shkri!
Zoti i Ushtrive është me ne, *
strehimi ynë, Hyji i Jakobit!
Ejani e shikoni veprat e Zotit *
- mrekullitë që i bëri ai përmbi dhé!
Ndalon luftërat deri në skajet e tokës, †
do t’i thyejë harqet, do t’i copëtojë armët, *
mburojat në zjarr do t’i djegë.
Ndaluni e shihni se unë jam Hyji, *
i madhërueshëm mbi popuj, i madhërueshëm mbi tokë!
Me ne është Zoti, Hyji i Ushtrive, *
strehimi ynë, Hyji i Jakobit.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen
Ant. 1 Hyji e shenjtëroi tendën e vet; ai banon në të: nuk do të trandet askurrë.
Ant. 2 Eja të shkojmë me gëzim në Shtëpinë e Zotit!
Psalmi 122 /121/ (1-9)
Seç u gëzova kur më thanë: *
»Eja të shkojmë në Shtëpinë e Zotit!«
Ja, tashmë këmbët tona shkelën *
në dyert e tua, o Jerusalem!
O Jerusalem, qytet i ndërtuar me mjeshtëri, *
thuaj se i tëri një cope të vetme je!
Atje ngjiten fiset, fiset e Zotit, †
sipas rregullores në Izrael *
për të kremtuar Emrin e Zotit.
Atje janë selitë e gjykatores së drejtësisë, *
selitë e shtëpisë së Davidit!
Lutuni për paqen e Izraelit: *
»U priftë e mbara atyre që të duan ty!
Mbretëroftë paqja në muret e tua *
dhe qetësia në pirgjet e tua!«
Për dashuri ndaj vëllezërve e miqve të mi *
do të them: »Paqja me ty!«
Për dashuri ndaj Shtëpisë së Zotit, Hyjit tonë, *
do të lutem t’i kesh të gjitha të mirat!
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen
Ant. 2 Eja të shkojmë me gëzim në Shtëpinë e Zotit!
Ant. 3 Lavdërojeni Hyjin tonë, ju shenjtërit e tij.
Kur këndohet kjo këngë, atëherë Aleluja mund të përsëritet disa herë çdo dy apo katër rreshta.
Kënga Krh. Zb 19, 1-7
Dasma e Qengjit
Aleluja!
Shëlbim, lavdi dhe pushtet Hyjit tonë, *
(C Aleluja).
sepse gjyqet e tija janë të vërteta dhe të drejta
C Aleluja (aleluja).
Aleluja!
Lavdëroni Hyjin tonë, të gjithë shërbëtorët e tij *
(C Aleluja).
të gjithë ju që e droni - të vegjël e të mëdhenj!
C Aleluja (aleluja).
Aleluja!
Mbretëron Zoti, *
(C Aleluja).
Hyji ynë, i Gjithëpushtetshmi!
C Aleluja (aleluja).
Aleluja!
Le të galdojmë e të brohorasim *
(C Aleluja).
dhe t’i japim lavdi Atij.
C Aleluja (aleluja).
Aleluja!
Sepse erdhi Dasma e Qengjit! *
(C Aleluja).
Gati është Nusja e tij.
C Aleluja (aleluja).
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen
Ant. 3 Lavdërojeni Hyjin tonë, ju shenjtërit e tij.
Leximi i shkurtër Zb 21, 2-3. 22. 27
Pashë qytetin e shenjtë - Jerusalemin e ri: zbriste nga qielli, prej Hyjit, i stolisur porsi nusja e përgatitur për fatin e vet. Atëherë dëgjova një zë të fortë, që vinte nga froni: “Ja Tenda e Hyjit me njerëz! Hyji do të banojë me njerëz! Ata do të jenë populli i tij, kurse Ai, vetë Hyji, do të jetë Hyji i tyre”.
Në qytet tempull nuk pashë: sepse tempulli i tij është Zoti, Hyji, i Gjithëpushtetshmi edhe Qengji. Në të s’do të hyjë asgjë, që nuk është e pastër, as ai që bën punë të liga ose gënjen; por vetëm ata që janë të shkruar në librin e jetës së Qengjit.
Përgjigjja e shkurtër
C Lum ai njeri që jeton * në shtëpinë tënde, o Zot.
Lum ai njeri që jeton në shtëpinë tënde, o Zot.
D Do të të lavdërojë në shekuj të shekujve,
në shtëpinë tënde, o Zot.
Lavdi Atit e Birit e Shpirtit Shenjt.
Lum ai njeri që jeton në shtëpinë tënde, o Zot.
Kënga ungjillore (Magnificat Lk 1, 46-55)
Ant. E shenjtë është shtëpia e Zotit: këtu thirret emri i tij, këtu Zoti është i pranishëm në mesin tonë.
Shpirti im e madhëron Zotin, *
shpirti im me hare i brohorit Hyjit, Shëlbuesit tim,
sepse shikoi me pëlqim mbi shërbëtoren e vet të përvujtë: *
qe se, që tani të gjitha breznitë do të më quajnë të lumtur,
sepse punë të mëdha bëri për mua Hyji i gjithpushtetshëm *
‑ i shenjtë është Emri i tij!
Mëshira e tij brezni më brezni *
për ata që e druajnë.
E tregoi fuqinë e krahut të vet: *
hodhi poshtë qëllimet e krenarëve,
i rrëzoi princat prej froneve të tyre *
i lartësoi të përvujtët.
Me të mira i mbushi ata që s'kishin ç'të hanë
të pasurit i nisi duarthatë.
I ndihmoi Izraelit, shërbëtorit të vet,
duke e sjellë në mend mëshirën
‑ si ua pati premtuar etërve tanë *
në të mirën e Abrahamit e të pasardhësve të tij në amshim.
Lavdi Atit e Birit *
e Shpirtit Shenjt,
si ka qenë në fillim, *
ashtu tash e përgjithmonë e jetës. Amen
Ant. E shenjtë është shtëpia e Zotit: këtu thirret emri i tij, këtu Zoti është i pranishëm në mesin tonë.
Lutjet e besimtarëve
T’ia lartësojmë lutjen tonë Krishtit Shëlbues, që e dha jetën e vet për t’i bashkuar në një familje të vetme të gjithë bijtë e shpërndarë të Hyjit:
Le të të bjerë ndër mend për Kishën tënde, o Zot.
O Zot Jezus, që e ndërtove shtëpinë tënde përmbi shkëmb,
— forcoje fenë dhe shpresën tonë.
O Zot Jezus, që prej kraharorit tënd të shporuar bëre që të rrjedhë gjak dhe ujë,
— pastroje dhe ripërtërije Kishën tënde me sakramentet e Besëlidhjes së re.
O Zot Jezus, i pranishëm në mesin e atyre që bashkohen në emrin tënd,
— dëgjoje lutjen e një zemre të Kishës sate.
O Zot Jezus, që së bashku me Atin dhe me Shpirtin Shenjt banon në ata që të duan,
— bëje të përsosur Kishën tënde në përvojën e dashurisë sate.
O Zot Jezus, që nuk refuzon ata që vijnë te ti,
— pranoji të gjithë të ndjerët në shtëpinë e Atit.
Ati ynë, që je në qiell, u shenjtëroft emri yt. Ardhtë mbretëria jote, u bëftë vullnesa jote, si në qiell ashtu në tokë.
Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.
Lutja
Në kishën e kushtuar:
Dëgjoje, o Zot, lutjen e popullit tënd, që me gëzim e kremton ditën e kushtimit të këtij tempulli; bëj që këtu gjithherë të kryhet denjësisht shërbesa liturgjike në nder e lavd të emrit tënd, që ta ndikojë në ne hirin e shëlbimit. Nëpër Zotin.
Jashtë kishës së kushtuar:
O Hyj, ti zgjedh gurë të gjallë për të ndërtuar banesën e amshueshme të lavdisë sate, jepi me begati Kishës sate frytet e Shpirtit Shenjt, që populli yt besimtar vazhdimisht të dëftohet në Jerusalemin qiellor. Nëpër Zotin.
Ose:
O Hyj, ti deshe që bashkësia e besimtarëve të quhet Kisha jote: bëj që populli yt i bashkuar në emrin tënd të të adhurojë, të të duajë, të të ndjekë ty dhe, nën udhëheqjen tënde, t’u arrijë premtimeve të tua qiellore. Nëpër Zotin.
Përfundimi i Orës sikurse në Shërbesën e rëndomtë.