Mbrëmësorja

Java e tridhjetekatërtë e Kohës së rëndomtë

 

Jezu Krishti Mbreti i gjithësisë

 

E kremte

 

Mbrëmësorja I

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

   ashtu tash e përgjithmonë e jetës. Amen. (K. P. aleluja).

 

   Himni

 

   O Krisht, zotërues hyjnor i të gjitha sendeve,

   për ty jehojnë ndër treme turma lutësish,

   në kohë vjetore kur prapë kthehen festat

   për t’i kremtuar.

 

   Vërtet ky vend ushton nga zërat në tremet

   e mbretit të madh e porta e qiellit të ndritshëm

   që i pret të gjithë që sulen për t’u futur

   n’atdheun e jetës.

 

   Kjo banesë shenjte mbështjell turmën tënde,

   që e përshpirtshme është plot me sakramente,

   për gjellë qiellore ushqen me dhurata

   të jetës s’amshueshme.

 

   Lutemi pra, o Zot, me fytyrë të qetë

   të bësh një shenjë duke drejtuar shërbëtorët,

   që me dashuri të lartë kremtojnë gëzimet

   e tempullit tënd.

 

   Lavd i njëllojtë madhëroftë Prindin e Epërm,

   dhe ty, Shëlbues, mbret i drejtë ndër shekuj;

   le të jehojë lavdia e Shpirtit Shenjt

   nëpër mbarë botën. Amen.

 

   Ose një himn tjetër apo një këngë e miratuar nga autoritetet kishtare.

 

Ant. 1 Mbret i paqes është emri i tij, mbretëria e tij do të qëndrojë përgjithmonë.

 

   Psalmi 113 /112/ (1-9)

 

Lavdërojeni, shërbëtorët e Zotit, *

   lavdërojeni, Emrin e Zotit!

Qoftë bekuar Emri i Zotit *

   qysh tash e deri në amshim,

 

Që kur lind dielli e derisa perëndon *

   qoftë bekuar Emri i Zotit!

I madhërueshëm është Zoti mbi të gjithë popujt, *

   lavdia e tij i tejkalon qiejt.

 

Kush është si Zoti, Hyji ynë, †

   që fronin e ka në Lartësi, *

   e nga lart vrojton qiellin e tokën?

 

Nga pluhuri e ngre skamnorin, *

   nga llomi e lartëson të vobektin

për ta vënë të rrijë me princa, *

   me princat e popullit të vet.

 

Ai bën të banojë beronja në shtëpi të vet *

   nënë fëmijësh të gëzueshme.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 1 Mbret i paqes është emri i tij, mbretëria e tij do të qëndrojë përgjithmonë.

 

Ant. 2 E amshuar është mbretëria e tij, mbretërit dhe të mëdhenjtë e tokës do t’i nënshtrohen.

 

   Psalmi 117 /116/ (1-2)

 

Lavdërojeni Zotin, o kombe të gjitha, *

   madhërojeni së bashku, o popuj të gjithë!

 

Sepse e madhe është dashuria e tij ndaj nesh, *

   besnikëria e Zotit qëndron për amshim!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 2 E amshuar është mbretëria e tij, mbretërit dhe të mëdhenjtë e tokës do t’i nënshtrohen.

 

Ant. 3 Krishtit iu dha çdo pushtet në qiell dhe mbi tokë; popujt dhe kombet të gjitha do ta adhurojnë në amshim.

 

   Kënga    Krh. Zb 4, 11; 5, 9. 10. 12.

 

I denjë je, o Zot, Hyji ynë, *

   të marrësh lavdinë, nderin dhe pushtetin,

 

sepse ti krijove gjithçka, †

   dhe me vullnetin tënd *

   gjithçka u bë dhe u krijua!

 

Ti je i denjë, o Zot,

   të marrësh librin *

   dhe t’ia zgjidhësh vulat,

 

sepse qe prerë †

   dhe me gjakun tënd i shpërbleve për Hyjin *

   njerëzit e çdo fisi, gjuhe, populli dhe kombësie,

 

dhe i bëre për Hyjin tonë

   mbretëri dhe priftërinj *

   dhe ata do të mbretërojnë përmbi tokë.

 

I denjë është Qengji i prerë †

   të marrë pushtetin, pasurinë, dijen, *

   fuqinë, nderin, lumturinë dhe lavdinë!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. 3 Krishtit iu dha çdo pushtet në qiell dhe mbi tokë; popujt dhe kombet të gjitha do ta adhurojnë në amshim.

 

   Leximi i shkurtër Krh. Ef 1, 20-23

 

   Hyji e ngjalli Krishtin nga të vdekurit dhe e vendosi në të djathtën e vet në qiell, mbi çdo Principatë, Pushtet, Fuqi, Zotërim dhe mbi çdo emër që mund të përmendet jo vetëm në këtë, por edhe në botën e ardhshme. Dhe çdo gjë vuri nën këmbët e tija e Atë e vendosi mbi çdo gjë ‑ për Krye të Kishës, e cila është Trupi i tij, plotësimi i Atij që plotëson gjithçka në të gjithë.

 

   Përgjigjja e shkurtër

 

   C Ty të qoftë lavdia dhe pushteti,

   * ty të qoftë mbretëria, o Zot.

   Ty të qoftë lavdia dhe pushteti,

   ty të qoftë mbretëria, o Zot.

   D Ty të qoftë sundimi mbi mbarë gjithësinë,

   ty të qoftë mbretëria, o Zot.

   Lavdi Atit e Birit e Shpirtit Shenjt.

   Ty të qoftë lavdia dhe pushteti,

   ty të qoftë mbretëria, o Zot.

 

   Kënga ungjillore (Magnificat    Lk 1, 46-55)

 

   Ant. Hyji i dha Krishtit fronin e Davidit; ai do të mbretërojë përgjithmonë mbi popullin e tij.

 

Shpirti im e madhëron Zotin, *

   shpirti im me hare i brohorit Hyjit, Shëlbuesit tim,

 

sepse shikoi me pëlqim mbi shërbëtoren e vet të përvujtë: *

   qe se, që tani të gjitha breznitë do të më quajnë të lumtur,

 

sepse punë të mëdha bëri për mua Hyji i gjithëpushtetshëm *

   ‑ i shenjtë është Emri i tij!

 

Mëshira e tij brezni më brezni *

   për ata që e druajnë.

 

E tregoi fuqinë e krahut të vet: *

   hodhi poshtë qëllimet e krenarëve,

 

i rrëzoi princat prej froneve të tyre *

   i lartësoi të përvujtët.

 

Me të mira i mbushi ata që s'kishin ç'të hanë

   të pasurit i nisi duarthatë.

 

I ndihmoi Izraelit, shërbëtorit të vet,

   duke e sjellë në mend mëshirën

 

‑ si ua pati premtuar etërve tanë *

   në të mirën e Abrahamit e të pasardhësve të tij në amshim.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

   Ant. Hyji i dha Krishtit fronin e Davidit; ai do të mbretërojë përgjithmonë mbi popullin e tij.

 

   Lutjet e besimtarëve

 

T’i brohorasim Krishtit, mbretit të gjithësisë, i cili është para të gjitha gjërave dhe çdo gjë qëndron në të. Plot me fe t’ia drejtojmë lutjen tonë:

 

   Ardhtë mbretëria jote, o Zot.

 

O Krisht, mbret dhe bari yni, mblidhe grigjën tënde nga të katër anët e botës,

—    udhëhiqe në kullotat e së vërtetës dhe të jetës.

O Krisht, udhëheqës dhe shëlbues yni, përtërije dhe shenjtëroje popullin tënd,

—    forcoji të dobëtit, mblidhi ata që janë shpërndarë, thirri në njësinë e fesë ata të cilëve u mungon besimi.

O Krisht, gjyqtari i botës, na merr afër vetes në lavdi, kur ta dorëzosh mbretërinë tënde në duart e Atit,

—    na e jep trashëgimin e amshuar të përgatitur për ne që prej fillimit të botës.

Mbret i paqes, shkatërroji mekanizmat dhe intrigat e luftës,

—    bëj që të gjithë njerëzit ta njohin një periudhë të re drejtësie dhe paqeje.

O Krisht, trashëgimtar i të gjithë njerëzve, bëj që njerëzimi, i shtyrë prej Shpirtit Shenjt, të bashkohet në Kishën tënde,

—    dhe mbarë bota le të të pranojë ty si udhëheqës dhe zotëri.

O Krisht, i parëlinduri i atyre që zgjohen nga gjumi i vdekjes,

—    pranoji vëllezërit tanë të vdekur në lavdinë e mbretërisë sate.

 

Ati ynë, që je në qiell, u shenjtëroftë emri yt. Ardhtë mbretëria jote, u bëftë vullnesa jote, si në qiell ashtu në tokë.

   Bukën tonë të përditshme, na e jep sot, na i fal fajet tona si i falim ne fajtorët tanë, e mos na lër të biem në tundim, por na liro nga i Keqi. Amen.

 

   Lutja

 

   O Hyj i gjithëpushtetshëm dhe i amshuar, ti deshe të ripërtërish gjithçka nëpër Krishtin, Birin tënd, Mbretin e gjithësisë, bëj që mbarë krijesat, të liruara nga robëria e mëkatit, t’i shërbejnë madhërisë sate e të lëvdojnë pa pushim. Nëpër Zotin tonë Jezu Krishtin, Birin tënd, që me ty jeton e mbretëron në bashkim me Shpirtin Shenjt, Hyj, për të gjithë shekujt e shekujve. Amen.

 

Përfundimi i Orës sikurse në Shërbesën e rëndomtë.