Mbretëria e qiellit i ngjan rrjetës që hidhet në det!

30 KORRIK 2026

 

UNGJILLI I DITËS

 

“Mbretëria e qiellit i ngjan rrjetës që hidhet në det!”

 

PREJ UNGJILLIT TË SHENJTË SIPAS MATEUT- (Mt 13, 47-53)

 

Në atë kohë, Jezusi i tha turmës: "Mbretëria e qiellit i ngjan rrjetës që hidhet në det dhe mbledh çdo lloj peshku. Kur mbushet, peshkatarët e qesin në breg, ulen dhe i mble­dhin peshqit e mirë në enë e të këqijtë i tresin. Kështu do të ndodhë edhe në mbarimin e botës: do të dalin engjëjt e do t'i ndajnë të këqijtë prej të drejtëve dhe do t'i hedhin në furrë të ndezur, ku do të jetë vaj dhe kërcëllim dhëmbësh. A i kuptuat të gjitha këto? "Po!" - iu përgjigjën ata. E ai u tha: "Kështu pra, çdo skrib, që e përvetësoi mësimin e Mbretërisë së qiellit i përngjan zotshtëpisë, që nxjerr nga visari i vet gjëra të reja e të vjetra." Kur Jezusi i kreu së treguari këto shëmbëlltyra, shkoi prej andej.

Të dashur dëgjues, Ungjilli i sotëm na paraqet dy mësime të çmuara të Jezusit. Së pari, shëmbëlltyrën e rrjetës që hidhet në det dhe mbledh peshq të çdo lloji; pastaj fjalët për skribin që është bërë nxënës i Mbretërisë së Qiellit, i cili nxjerr nga thesari i tij gjëra të reja dhe të vjetra.

Në këto dy figura, Jezusi na flet për jetën e Kishës, për përgjegjësinë tonë si të krishterë dhe për shpresën që duhet të na udhëheqë çdo ditë.

Rrjeta që mbledh të gjithë- Jezusi thotë: "Mbretëria e qiellit i përngjan një rrjete të hedhur në det, e cila mblodhi peshq të çdo lloji." (Mt 13,47) Rrjeta nuk zgjedh se cilët peshq do të hyjnë në të. Ajo i mbledh të gjithë. Kjo është figura e Kishës, e cila është e hapur për çdo njeri. Krishti nuk erdhi vetëm për të drejtët, por edhe për mëkatarët; jo vetëm për të fortët në fe, por edhe për ata që janë në kërkim; jo vetëm për ata që janë të shenjtë, por edhe për ata që kanë nevojë për mëshirë. Sa ngushëlluese është kjo! Askush nuk është i përjashtuar nga dashuria e Hyjit. Çdo njeri është i ftuar të hyjë në rrjetën e Mbretërisë.

Shën Gjon Gojarti shkruan: "Rrjeta e Ungjillit përfshin çdo popull dhe çdo njeri, sepse Hyji dëshiron që të gjithë të arrijnë njohjen e së vërtetës." Kisha nuk është bashkësia e njerëzve të përsosur, por familja e atyre që çdo ditë përpiqen të ecin drejt shenjtërisë.

Do të vijë koha e dallimit- Jezusi vazhdon duke thënë se, kur rrjeta mbushet, peshkatarët ndajnë peshqit e mirë nga ata që nuk vlejnë. Kjo është figura e gjykimit të fundit. Këto fjalë nuk synojnë të na frikësojnë, por të na zgjojnë nga gjumi i rutinës së përditshme. Jeta jonë ka një drejtim dhe një përgjegjësi. Çdo ditë, me zgjedhjet tona, po formojmë zemrën tonë. Shpesh jemi të prirur të gjykojmë të tjerët: kush është i mirë e kush jo. Por Jezusi nuk na e beson neve këtë detyrë. Gjykimi i zemrave i përket vetëm Hyjit, i cili njeh gjithçka dhe është njëkohësisht i drejtë dhe i mëshirshëm. Shën Agustini  thotë: "Tani është koha e mëshirës; në fund do të jetë koha e drejtësisë. Prandaj mos vono të kthesh te Hyji." Kjo është ftesa e Ungjillit: të mos e shtyjmë pendimin për nesër. Çdo ditë është një mundësi e re për t'u kthyer te Zoti, tek Ati i Mëshirës që na pret me krah hapur si baba djalin e vet.

Thesari i skribit të Mbretërisë- Në fund të Ungjillit, Jezusi flet për skribin që është bërë nxënës i Mbretërisë dhe që nxjerr nga thesari i tij "gjëra të reja dhe të vjetra." Këtu Jezusi na kujton se një dishepull nuk pushon kurrë së mësuari. Ai ushqehet vazhdimisht me Fjalën e Hyjit, me mësimin e Kishës dhe me përvojën e shenjtërve. Sa më shumë e njeh Krishtin, aq më shumë është në gjendje ta ndajë këtë pasuri me të tjerët. Ky është edhe misioni i çdo të krishteri. Nuk mjafton ta dëgjojmë Ungjillin; duhet ta bëjmë atë pjesë të jetës sonë. Një fjalë e Ungjillit e jetuar me besnikëri mund të ndriçojë një familje, të pajtojë dy njerëz, të ngushëllojë një të trishtuar ose të rikthejë shpresën te ai që është lodhur. Prandaj, "Ai që mediton çdo ditë Shkrimin Shenjt, e mbush zemrën me thesarin e Hyjit dhe di të japë gjithmonë fjalën e duhur."

Të dashur dëgjues, ky Ungjill na fton të jetojmë me shpresë dhe përgjegjësi. Shpresë, sepse Hyji vazhdon të na kërkojë me dashuri dhe askush nuk është i përjashtuar nga mëshira e Tij. Përgjegjësi, sepse besimi nuk është vetëm emri që mbajmë, por është mënyra jonë e të jetuarit, se si sillemi me të tjerët, se sa i duam ata, dhe se sa dashuri ka në veprat tona.  Nuk mjafton të themi vetëm me fjalë se jemi të krishterë; duhet të jetojmë si nxënës të Krishtit në familje, në punë, në bashkësi dhe në çdo takim me njerëzit.

Le ta mbushim zemrën tonë me thesarin e Fjalës së Hyjit. Sa më shumë ta dëgjojmë dhe ta jetojmë atë, aq më shumë jeta jonë do të bëhet një dritë për të tjerët.

 

O Jezus, Ti na ke thirrur që të hyjmë në rrjetën e dashurisë sate dhe na ke bërë pjesëtarë të Kishës. Mos lejo që zemrat tona të largohen prej Teje. Mbushi ato me thesarin e Fjalës sate, që të jetojmë me besnikëri Ungjillin dhe të bëhemi dëshmitarë të shpresës, të paqes dhe të mëshirës sate. Na përgatit për ditën kur do të dalim para Teje dhe bëj që të gjendemi ndër ata që kanë ruajtur besimin dhe kanë jetuar në dashuri. Amen.