Ora e mesme

25 Dhjetor – Kërshëndellat

 

Ora e mesme

 

V. Hyj, më eja në ndihmë!

P. O Zot, shpejto të më ndihmosh!

 

V. Lavdi Atit e Birit e Shpirtit Shenjt,

P. si ka qenë në fillim,

 ashtu tash e përgjithmonë e jetës. Amen.

 

Ora e tretë

 

   Himni

 

   Tash neve, o Shpirti Shenjt,

   një me Atin e Birin,

   denjohu i gatshëm t’futesh

   i reshur n’parzëm tonë.

 

   Gojë, gjuhë, mendje, forcë, shqisa

   të ushtojnë duke rrëfyer,

   me zjarr t’flakrojë dashuria,

   nxehtësia t’i ngrohë shokët.

 

   Nëpër ty t’kuptojmë Atin,

   të njohim edhe Birin,

   ty Shpirtin e të dyve

   t’besojmë në t’gjitha kohët. Amen.

 

Ora e gjashtë

 

   Himni

 

   Mbret i fortë, Hyj i vërtetë,

   që sundon të gjitha sendet,

   me ndriçim pajis mëngjesin

   dhe me zjarr shkëlqen mesditën.

 

   Shuaji flakët e shamatave,

   flake zjarrin e dëmprurësve,

   jepu trupave shërimin,

   dhe t’vërtetën paqe zemrave.

 

   Bëj, o Atë tërë drejtësi,

   dhe ti Bir baras si Ati,

   bashkë me Shpirtin Ngushëllimtar

   që mbretëroni ndër gjithë shekujt. Amen.

 

Ora e nëntë

 

   Himni

 

   Hyj i gjithësisë, fuqi e qëndrueshme,

   i patrandur në ty mbahesh,

   kohët e dritës së përditshme

   përcakton me shumë mbarësi.

 

   Dhe gjatë netëve lësho dritën,

   që jeta të mos ndërpritet,

   por çmimi i vdekjes shenjte

   të jetë lavdia e përjetshme.

 

   Bëj, o Atë tërë drejtësi,

   dhe, o Bir, baras si Ati,

   bashkë me Shpirtin Ngushëllimtar,

   të mbretëroni ndër gjithë shekujt. Amen.

 

Ora e tretë

 

   Ose und të përdoren himnet që vijojnë

 

Himni

 

   Duke mbajtë radhë të sigurt,

   me shpirt të drejtë të lypim

   n’orën e tretë të ditës

   lavdinë trefish t’virtytit.

 

   Që ne banesë t’i bëhemi

   Atij, Shpirtit Shenjt,

   që dikur ndër apostuj

   në këtë orë derdhi hiret.

 

   Me këtë radhë duke ecur,

   të gjitha i stisi bukur

   Autori i mbretërisë së qiellit

   për ne çmime t’amshueshme.

 

   Hyjit Atë i qoftë lavdia

   e Birit tij të vetëm

   me Shpirtin Ngushëllues

   ndër shekujt e përhershëm. Amen.

 

Ora e gjashtë

 

Himni

 

   T’i thurim lavde Zotit

   gati me shpirt të ndezur;

   në orën gjashtë të sjellur

   na fton ne për t’u lutur.

 

   Njëmend për hir të Kryqit,

   në këtë besnikëve u jepet

   lavdia e shpëtimit,

   dhe flia e Qengjit t’lumtur.

   Nga drita e tij e fortë

   errësohet mesi i ditës;

   të marrim me tërë shpirtin

   hirin e këtij shpëtimi.

 

   Hyjit Atë i qoftë lavdia

   dhe Birit të tij t’vetëm

   me Shpirtin Ngushëllimtar

   ndër shekujt e përhershëm. Amen.

 

Ora e nëntë

 

Himni

 

   Në fund të çdo tri orëve

   shtjellur me ndihmë të Zotit,

   Trini e Njëni e përsosur,

   Atij i këndojmë devotshëm.

 

   Misterin e shenjtë t’Hyjit

   duke ruajtë n’zemër t’pastër,

   rregull i Mësuesit Pjetër

   zbuluar n’shenjë shpëtimi.

 

   Dhe ne me shpirt të psalim

   bashkuar me apostuj,

   që ende bimët e dobëta

   t’i ngrejnë me forcë të Krishtit.

 

   Hyjit Atë i qoftë lavdia

   dhe Birit të tij të vetëm

   me Shpirtin Ngushëllimtar,

   në shekujt e përhershëm. Amen.

 

Ora e tretë – Ora e gjashtë – Ora e nëntë

 

Ant. 1 Jozefi dhe Maria, nëna e Jezusit, mrekulloheshin për të gjitha ato që thuheshin për të.

 

    Psalmi 19 /18 B/ (8-13. 15)

 

I përsosur është Ligji i Zotit, *

   shpirtin përtërin;

për t’u besuar është Dëshmia e Zotit, *

   të miturve u jep dijen.

 

Urdhërimet e Zotit janë të drejta, *

   kënaqin zemrën;

urdhri i Zotit është i qartë, *

   dritë u jep syve.

E panjollë është frika e Zotit, *

   nuk ndërron në shekuj të shekujve;

gjyqet e Zotit janë të vërteta, *

   të gjitha njënjë të drejta.

 

Më të çmueshme se ari, *

   se më i pastri ar,

më të ëmbla se mjalti, *

   se hoja që rrjedh mjaltë.

 

Shërbëtori yt me kujdes i mëson: *

   t’i mbash ato është fitesë e madhe.

Porse kush i heton gabimet? *

   Më pastro, o Zot, prej mëkateve të fshehta,

 

Të pëlqefshin, o Zot, *

   fjalët e gojës sime,

edhe mendimi i zemrës sime para teje, *

   o Zot, Ndihmësi im e Shëlbuesi im!

 

Ant. 1 Jozefi dhe Maria, nëna e Jezusit, mrekulloheshin për të gjitha ato që thuheshin për të.

 

Ant. 2 Maria i ruante me kujdes në zemër ngjarjet e mrekullueshme të birit të vet.

 

    Psalmi 47 /46/ (2-10)

 

Duartrokitni, o popuj të gjithë, *

   brohoritni Hyjit me zë gëzimi!

Sepse Hyji është i tejetlartë, i tmerrshëm, *

   Mbreti i madh mbi tokën mbarë.

 

Popujt i vuri nën sundimin tonë, *

   paganët nën këmbët tona.

Ai e rizgjodhi trashëgimin tonë për ne, *

   nderin e Jakobit, të dashurit të vet.

Ngjitet Hyji me brohori, *

   Zoti me zë trumbete.

 

Këndoni Hyjit, këndoni, *

   këndoni mbretit tonë, këndoni!

Sepse Hyji është mbreti i mbarë tokës: *

   këndoni këngë me mjeshtëri!

 

Hyji mbretëron mbi mbarë popujt, *

   Hyji rri mbi fronin e vet të shenjtë.

 

Princat e popujve paganë bashkohen *

   me popullin e Hyjit të Abrahamit,

sepse Hyjit i përkasin mburojat e botës, *

   Ai është i lartësuar mbi të gjithë.

 

Ant. 2 Maria i ruante me kujdes në zemër ngjarjet e mrekullueshme të birit të vet.

 

Ant. 3 Sytë e mi e panë shëlbimin që e bëre gati në sytë e të gjithë popujve.

 

   Psalmi 48 /47/ (2-15)

 

I madhërishëm është Zoti e tejet i lavdishëm, *

   në qytetin e Hyjit tonë!

Mali i tij i shenjtë, kodrinë e bukur, *

   gëzimi i mbarë botës:

 

Mali Sion, në veriun e skajshëm, *

   Qyteti i Mbretit të madh,

Hyji në pirgjet e tija *

   u tregua kështjellë e pathyeshme.

 

Dhe ja, u bashkuan mbretërit, *

   sulmuan së bashku,

posa panë, u rrudhën, *

   e, të hutuar, ikën praptazi.

 

Aty i kapën të dridhurat *

   si dhimbjet e lindëses,

ishin si stuhia e lindjes *

   që i thyen anijet e Tarsisit.

 

Siç kemi pas dëgjuar, tani po shohim,

   në qytetin e Zotit të Ushtrive, †

   në qytetin e Hyjit tonë *

   - Hyji e themeloi për amshim.

 

Po e kujtojmë, o Hyj, mëshirën tënde *

   në mesin e Tempullit tënd.

 

Sikurse Emri yt, o Hyj, ashtu edhe lavdia jote †

   arrin deri në skajin e botës, *

   e djathta jote është plot drejtësi.

 

Le të galdojë mali i Sionit, †

   le të brohorasin qytetet e Judës *

   për shkak të gjyqeve të tua!

 

Silluni rreth e rreth Sionit,

   përshkojeni kryq e tërthor, *

   numërojani kullat e tija,

 

vëreni mirë muret e tija, †

   vëzhgoni hollë pallatet e tija *

   që të mund t’i tregoni breznisë së ardhshme:

 

Ky është Hyji, Hyji ynë †

   për amshim e në shekuj të shekujve; *

   Ai na prin në amshim.

 

Ant. 3 Sytë e mi e panë shëlbimin që e bëre gati në sytë e të gjithë popujve.

 

Ora e tretë

 

   Leximi i shkurtër Tit 2, 11-12

 

   U duk hiri i Hyjit që u sjell shëlbimin të gjithë njerëzve. Ai na mëson t’i biem mohit pabesimit dhe dëshirave të shekullit për të jetuar në këtë botë urtisht, drejtësisht dhe përshpirtërisht.

 

   D Zoti e kujtoi dashurinë e tij, aleluja,

   C dhe besnikërinë e tij ndaj shtëpisë së Izraelit, aleluja.

 

Ora e gjashtë

 

   Leximi i shkurtër 1 Gjn 4, 9

 

   Ja si u dëftua dashuria e Hyjit në ne: Hyji e dërgoi në botë një të Vetmin Birin e vet që ne të jetojmë në saje të tij.

 

   D Kufijtë e botës e panë, aleluja,

   C shëlbimin e Hyjit tonë, aleluja.

 

Ora e nëntë

 

   Leximi i shkurtër Vap 10, 36

 

   Hyji u dërgoi Fjalën e vet izraelitëve dhe ua shpalli Ungjillin e paqes përmes Jezu Krishtit që është Zotëria i të gjithëve.

 

   D Dashuria dhe besnikëria takohen, aleluja,

   C paqja dhe drejtësia përqafohen, aleluja.

 

   Lutja

 

   O Hyj, ti që denjësinë e natyrës njerëzore e trajtove mrekullisht, dhe mrekullisht e përtërive, bëj, po të lutemi, të bëhemi pjesëtarë të Hyjnisë së Jezu Krishtit, i cili u denjua të marrë pjesë në natyrën tonë njerëzore. Ai që jeton e mbretëron në shekuj të shekujve. Amen.

 

                        Përfundimi i Orës, sikurse në Shërbesën e rëndomtë.