Ora e mesme

Java e madhe – E shtunë

 

Ora e mesme

 

Ora e tretë

 

   Himni

   Shpëto, o Shëlbues, veprën tënde fisnike,

   shkruar me dritë të shenjtë t’fytyrës sate,

   mos lër të prishet nga mashtrimi i djajve,

   për të cilën çmimin e vdekjes Ti lave.

 

   Ki dhimbje, shërbëtorët e tu rob të mos bëhen,

   fali fajtorët, prangat robërve zgjidhja,

   e ata që me gjakun tënd shpërbleve,

   o mbret i mirë, me ty në amshim gëzofshin. Amen.

 

Ora e gjashtë

 

   Himni

   O Kryq, që i jep botës bekimin,

   ti je shpresa e shpërblimi,

   dikur ti e mbartje ferrin,

   tash je derë plot dritë e qiellit.

 

   Në ty po ngrihet flija

   që çdo gjë mbi vete mori,

   që i rëndoi princi i botës

   dhe asgjë të veten s’gjeti.

 

   Atit, Ty, e Shpirtit Shenjt

   lavdi e njëjtë, o Jezus, qoftë

   që me fitore të kryqit

   gjithmonë na jep të gëzojmë. Amen.

 

Ora e nëntë

 

   Himni

   Krisht, për mes Kryqit, lutemi,

   na ço në shpërblim të jetës

   që në dru të shenjtë mbërthyer

   të na shëlbosh u denjove.

   Neni i ligjit tënd

   e thyen ligjin e vjetër;

   vdes skllavëria e hershme,

   liria e vërtetë kthehet.

 

   Atit, Ty e Shpirtit Shenjtë

   lavdi e njëjtë, o Jezus, qoftë

   që me fitore të kryqit

   na bën gjithmonë të fitojmë. Amen.

 

   (Në vend të himnit mund të këndohet një këngë e miratuar nga autoritetet kishtare e që i përshtatet kohës)

 

Në njërën prej tri orëve thuhen psalmet që vijojnë:

 

Ant. Do ta shoh mirësinë e Zotit në tokën e të gjallëve.

 

   Psalmi 27 /26/ (1-14)

 

Zoti është drita ime dhe shpëtimi im, *

   kë do të kem frikë?

† Zoti është mbrojtësi i jetës sime, *

   para kujt do të dridhem?

 

Kur më sulen keqbërësit *

   për të më ngrënë gjallë,

kundërshtarëve e armiqve të mi, *

   ora u liget dhe rrëzohen.

 

Le të çohet, në dashtë, edhe një ushtri e tërë *

   kundër meje: zemra nuk më trembet,

le të shpërthejë, në dashtë, edhe lufta kundër meje; *

   edhe atëherë jam plot shpresë.

 

Për një gjë të vetme i lutem Zotit, *

   vetëm atë ia kërkoj

që të jetoj në Shtëpinë e Zotit *

   të gjitha ditët e jetës sime,

 

që ta shijoj kënaqësinë e Zotit *

   e ta vërej Shtëpinë e Zotit.

 

Zoti më fsheh në tendën e vet †

   në ditë të vështirë, *

   më strehon në vend të fshehtë.

E tani e lartësoj kryet *

   mbi armiqtë e mi që më rrethojnë,

në tendën e tij do të kushtoj fli gëzimi, *

   do t’i këndoj Zotit këngë hareje.

 

Dëgjoje, o Zot, zërin e britmës sime, *

   ki mëshirë për mua dhe më dëgjo!

Për ty tha zemra ime: “Kërkojeni fytyrën time!” *

   “Fytyrën tënde, o Zot, po kërkoj.”

 

Mos e fsheh fytyrën tënde prej meje, *

   mos e dëbo me felgrim shërbëtorin tënd!

Ti je ndihmëtari im, mos më përbuz, *

   mos hiq dorë prej meje, Hyji i shpëtimit tim!

 

Im atë e nëna ime hoqën dorë prej meje, *

   por Zoti më mori ndore.

 

Ma trego, o Zot, udhën tënde †

   dhe më drejto shtegut të drejtë *

   për shkak të armiqve të mi!

 

Mos më lësho në pamëshirën e kundërshtarëve të mi, †

   sepse u ngritën kundër meje dëshmitarë të rrejshëm, *

   të cilët shfryjnë dhunë.

Besoj se do t’i shijoj të mirat e Zotit *

   në tokën e të gjallëve.

Shpreso në Zotin: bëhu burrë! *

   Ji zemërfortë e prite Zotin!

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Do ta shoh mirësinë e Zotit në tokën e të gjallëve.

 

Ant. Ti, o Zot, më ngrite prej mbretërisë së të vdekurve.

 

   Psalmi 30 /29/ (2-13)

 

Të madhëroj, o Zot, pse më shpëtove *

   e nuk lejove të ngihen armiqtë e mi mbi mua.

O Zot, Hyji im, *

   unë të thirra e ti më shërove,

 

ti, o Zot, ma nxore shpirtin nga Nëntoka, *

   më ktheve në jetë që të mos zbres në varr.

 

Këndoni Zotit ju, o besimtarët e tij, *

   falënderojeni Emrin e shenjtë të tij!

Sepse një çast zgjat hidhërimi i tij *

   e tërë jetën dashamirësia e tij!

 

Mbrëmja vjen me lot, *

   e mëngjesi plot hare!

 

Kur nuk më mungonte gjë, thosha: *

   “Askurrë s’do të trandem!”

 

Më ke vënë, o Zot, në majën e malit të sigurt, *

   porse, posa ma fsheh fytyrën tënde, frikësohem.

 

Atëherë ty, o Zot, të lëshoja kushtrimin, *

   i lutesha Hyjit tim.

 

Ç’dobi nga gjaku im *

   në qoftë se zbres në shkatërrim?

A thua do të të lavdërojë pluhuri, *

   e do ta kumtojë besnikërinë tënde?

 

Më dëgjoi Zoti e pati mëshirë për mua, *

   Zoti u bë ndihmëtari im.

 

Ti vajin ma ktheve në valle, *

   ma zhgjeshe grathoren time e më ngjeshe me hare,

që shpirti im të të këndojë e të mos pushojë: *

   “O Zot, Hyji im, do të të lavdëroj për amshim!”

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Ti, o Zot, më ngrite prej mbretërisë së të vdekurve.

 

Ant. Në paqe është vendbanimi i tij, në Sion banesa e tij.

 

   Psalmi 76 /75/ I (2-13)

 

I njohur është Hyji në Jude, *

   i madh është Emri i tij në Izrael.

Në Salem është tenda e tij, *

   vendbanimi i tij në Sion.

 

Atje ai i theu shigjetat e harkut, *

   shqytin, shpatën e luftën.

 

Shkëlqen, o i Madhërishëm, *

   mbi malet e presë!

 

Qenë rrëmbyer të fortët, gjumi i kapi, *

   asnjë trim s’diti t’i përdorë duart e veta

 

nga kërcënimi yt, Hyji i Jakobit, *

   shtang mbetën qerre e kalë!

 

Ti je i tmerrshëm e kush mund të të bëjë ballë? *

   Atëherë kur shfrenohet felgrimi yt!

Nga qielli e jep vendimin gjykatës; *

   Toka u trand dhe heshti,

 

kur të ngrihet Hyji në gjyq *

   për t’i shpëtuar të përvujtët e dheut.

 

Të goditurit nga felgrimi yt të lavdërojnë, *

   të shpëtuarit nga felgrimi do të të bëjnë festë.

 

Bëni kushte dhe plotësojani Zotit, Hyjit tuaj, *

   të gjithë ju përreth tij jepni dhurata të Tmerrshmit,

Atij që ua merr frymën princave, *

   që është tmerr për mbretërit e tokës.

 

Lavdi Atit e Birit *

   e Shpirtit Shenjt,

si ka qenë në fillim, *

   ashtu tash e përgjithmonë e jetës. Amen.

 

Ant. Në paqe është vendbanimi i tij, në Sion banesa e tij.

 

Ora e tretë

 

   Leximi i shkurtër 1 Gjn 1, 8-9

 

   Po nëse themi: “Ne nuk kemi mëkat”, gënjejmë vetveten dhe e vërteta nuk është në ne. Por, nëse i pranojmë mëkatet tona, Ai është besnik dhe i drejtë: do të na i falë mëkatet dhe do të na pastrojë nga çdo padrejtësi.

 

   D Mos më braktis në varr, o Zot;

   C mos lejo që shenjti yt ta shohë shkatërrimin.

 

Ora e gjashtë

 

   Leximi i shkurtër 1 Gjn 2, 1b-2

 

   E kemi Mbrojtësin te Ati - Jezu Krishtin, Të Drejtin. Ai është flija pajtuese për mëkatet tona, dhe jo vetëm për mëkatet tona, por edhe për të mbarë botës.

 

   D Zoti bën që të jetojmë dhe të vdesim,

   C Ai bën që të zbresim në ferr e të ngjitemi lart.

 

Ora e nëntë

 

   Leximi i shkurtër 1 Gjn 2, 8b-10

 

   Errësira po kalon e drita, ajo e vërteta, po ndriçon. Kush thotë: “Jam në dritë”, por e urren vëllain, ai mbetet deri tani në errësirë. Kush e do vëllain e vet, ai është vazhdimisht në dritë, në të s’ka asgjë që ta bëjë të gabojë.

 

   D E vunë Zotërinë brenda dhe e vulosen varrin,

   C i vunë ushtarët që ta ruanin varrin.

 

   Lutja

 

   O Hyj i gjithëpushtetshëm dhe i amshuar, ti që na e jep hirin të kremtojmë misteret e të Njëlindurit Birit tënd, të zbritur prej qiellit në thellësinë e tokës, bëj që, të varrosur me të në pagëzim, të ringjallemi së bashku me të në lavdinë e ringjalljes. Ai që është Zot.

 

Përfundimi i Orës, sikurse në Shërbesën e rëndomtë.