Sepse, ku është visari yt, aty do të jetë edhe zemra jote!

19 QERSHOR 2026

 

UNGJILLI I DITËS

 

“Sepse, ku është visari yt, aty do të jetë edhe zemra jote!”

 

PREJ UNGJILLIT TË SHENJTË SIPAS MATEUT - Mt 6,19-23

 

Në atë kohë Jezusi u tha nxënësve të vet: »Mos grumbulloni për vete thesare mbi tokë, ku i brejnë tenja e ndryshku, ku vjedhësit birojnë muret e vjedhin! Mblidhni për vete visare në qiell, ku s'brejnë as tenja as ndryshku e u vjedhësit nuk birojnë mure as nuk vjedhin. Sepse, ku është visari yt, aty do të jetë edhe zemra jote.« »Syri është dritëza e trupit. Në qoftë, pra, se syri yt është i shëndoshë, i tërë trupi yt do të jetë i ndriçuar. Por në qoftë syri yt i sëmurë, i tërë trupi yt do të jetë i errët. Në qoftë, pra, se drita që është në ty është errësirë, se ç'terr i madh do të jetë!«

 

Kjo pjesë e Ungjillit të sotëm bën pjesë në Predikimin në mal, ku Jezusi i mëson nxënësit e Tij të jetojnë sipas logjikës së Mbretërisë së Hyjit. Ai prek një nga çështjet më të ndjeshme të zemrës njerëzore: marrëdhënien tonë me pasuritë, dëshirat dhe drejtimin e jetës.

Jezusi nuk dënon të mirat materiale në vetvete. Ato janë dhurata të Hyjit dhe mund të përdoren për të mirën. Problemi lind kur zemra lidhet aq fort pas tyre sa ato bëhen thesari ynë i vetëm. Prandaj Jezusi thotë: “Aty ku është thesari yt, atje do të jetë edhe zemra jote” (Mt 6,21). Zemra ndjek gjithmonë atë që e konsideron më të çmuar. Kush është thesari i zemrës sime? Pasuria, suksesi, fama apo jeta e fshehtë me Krishtin që është thesari i jetës së amshuar?

Shën Augustini vëren se njeriu bëhet i ngjashëm me atë që do. Nëse i do gjërat kalimtare, zemra e tij bëhet e paqëndrueshme; nëse e do Hyjin, zemra e tij fiton qëndrueshmërinë dhe paqen e përjetshme. Prandaj pyetja themelore nuk është: “Çfarë zotëroj unë?”, por: “Kush e zotëron zemrën time?” Skllave kujt është?

Jezusi flet më pas për syrin si “drita e trupit”: “Nëse syri yt është i i shëndoshë, i gjithë trupi yt do të jetë i ndriçuar.” (Mt 6,22). Në gjuhën biblike syri nuk është vetëm organi i shikimit, por simbol i qëllimit të brendshëm, i mënyrës se si njeriu e shikon realitetin. Një sy i kthjellët është një zemër e pastër, e lirë nga egoizmi, zilia dhe lakmia. Një sy i sëmurë është ai që e sheh gjithçka vetëm për interesin e vet. Një sy që sheh vetëm të keqen, që sheh në mesin e një çarçafi të bardhë, vetëm pikën e zezë të vogël. Pra një sy që sheh vetëm të keqen.

Shën Gjon Gojarti shpjegon se ashtu si syri udhëheq trupin, po ashtu qëllimi i zemrës udhëheq jetën e njeriut. Kur qëllimi është Hyji, gjithçka merr dritë; kur qendra bëhet vetvetja ose pasuria, jeta errësohet.

Jeta shpirtërore kërkon një ushtrim të vazhdueshëm të lirisë së brendshme. Nuk mjafton të mos kemi shumë pasuri; duhet që pasuritë të mos na zotërojnë ne. Mund të jesh i varfër por i lidhur pas gjërave, ose i pasur por zemërgjerë. Jezusi na fton të kultivojmë virtytin e shkëputjes shpirtërore- pra të lirisë së brendshme, që na lejon t'i përdorim të mirat e kësaj bote pa u bërë skllevër të tyre.

Në kulturën e sotme, ku suksesi shpesh matet me atë që zotërojmë, Ungjilli na kujton se thesaret më të mëdha janë ato që nuk ndryshken: feja, dashuria, mëshira, lutja, shërbimi ndaj të tjerëve dhe veprat e bamirësisë. Këto janë thesaret që askush nuk mund t'i vjedhë dhe që na shoqërojnë deri në amshim. Njeriu nuk është krijuar për të jetuar vetëm për atë që kalon, por për të vërtetën dhe dashurinë që mbeten përgjithmonë. Zemra e njeriut është shumë e madhe për t'u kënaqur me gjëra kalimtare; ajo është krijuar për Hyjin.

Prandaj ky Ungjill na fton të bëjmë një shqyrtim ndërgjegjeje: Ku është thesari im? Çfarë kërkoj me më shumë zell? Çfarë e ndriçon ose e errëson shikimin tim shpirtëror?

Kur Hyji bëhet thesari ynë, atëherë edhe gjërat e kësaj bote marrin vendin e duhur. Zemra bëhet më e lirë, më paqësore dhe më e aftë për të dashur.

Le ta pyesim veten:

1. Cilat janë “thesaret” që zënë vendin më të madh në zemrën dhe mendimet e mia të përditshme?

2. A kam ndonjë lidhje të tepruar me pasuritë, suksesin, prestigjin ose sigurinë materiale që më largon nga feja?

3. Si mund të siguroj më shumë “thesare në qiell” përmes lutjes, bamirësisë dhe dashurisë ndaj të tjerëve?

Lutja:

O Jezus, Ti që njeh thellësinë e zemrës sonë, na ndihmo të kërkojmë mbi të gjitha thesarin e Mbretërisë sate. Çliroje zemrën tonë nga çdo lidhje që na largon prej Teje dhe na dhuro një sy të kthjellët për të parë gjithçka në dritën e dashurisë sate. Bëj që pasuritë e kësaj bote t’i përdorim me urti dhe bujari, duke grumbulluar thesare që zgjasin për amshim. Na mëso të të duam Ty mbi çdo gjë dhe të gjejmë në Ty gëzimin, paqen dhe sigurinë e vërtetë. Amen.