Adhurimi me të Shenjtërueshmin Sakrament

Derisa Meshtari e vendos Të Shenjtërueshmin Sakrament, këndohet një këngë e përshtatshme Eukaristike, p.sh. “Shenjtë, Shenjtë, Shenjtë… Të adhuroj me përvujtëri…”.
 
N’përvujtëri të zemrës, t’adhurojmë, o Hyj,
Që nën dukë të bukës vërtetë fshihesh Ti.
Tash kjo zemra ime po Të falet krejt,
duke t’përkujtuar mendja ime mbet.
 
Jezu që të fshehur n’hoste t’bardh t’shikoj,
T’lutem m’plotëso ëndjen që kaq fort kërkoj.
Një ditë dua të shoh t’shfaqur n’bukuri,
Më bëj që të gëzoj  me  Ty n’lumturi.  Amen!
 
Pas kësaj lexohet një pjesë e përshtatshme nga Ungjilli që flet për Eukaristinë. Në vend të kësaj mund të bëhet një meditim i përshtatshëm për Eukaristinë. Pas kësaj, i kalojmë 5 deri 10 minuta në adhurim dhe heshtje. Gjatë kësaj kohe, të gjithë meditojnë mbi fjalët e Shkrimit të shenjtë të vetëdijshëm se janë para Krishtit të gjallë e të pranishëm në të Shenjtërueshmin Sakrament të Altarit. Pas një kohe, mund të shprehen lutjet personale. Pas heshtjes, meshtari mund të thotë ndonjë uratë përkatëse, p.sh. luten Litanitë e Zemrës së Krishtit, ose të Gjakut të Krishtit... Pak  para  bekimit  me  të  Shenjtërueshmin  Sakrament këndohet kënga:
 

«Sakrament pra kaq t'madhnuem»

 

Sakramend pra kaq t'madhnuem

Le t'adhrojmë me f'tyrë për dhé,

Edhe dokja e motit t'shkuem

t'ia lshojë rendin sjelljes s're;

N'çka s'mbrrin mendja me kuptue,

Ndihmë t'na bahet shejtja fe.

 

Atit, Birit sot përhera

u qoftë kanga plot hare,

jetë pushtet u qoftë e ndera

Bekue qofshin n'qiell e n'dhé;

Shpirtit rrjedhë dy Vetjesh tjera

Njaj i qoftë lavdi i shejtes fe. Amen!

 

M: Bukën qiellore ua dha atyre (Aleluja).

P: Që në vetvete ka çdo shije (Aleluja).

 

Të lutemi: O Zot, që nën Sakrament të bind-shëm na e ke lënë kujtimin e mundimit tënd; po të lutemi, bëj ashtu t'i nderojmë fshehtësitë e Trupit e të Gjakut tënd, që përherë të provojmë frytin e shpërblimit tënd. Që jeton dhe mbretëron përgjithmonë e jetës. Amen!

 

Pas kësaj meshtari bën Bekimin me të Shenjtërueshmin Sakrament.
 

Pas bekimit luten:

 

Lavdërimet e Emrit të Hyjit

 

Qoftë bekuar Zoti!

Qoftë bekuar emri i shenjtë i tij!

Qoftë bekuar Jezu Krishti, Hyj i vërtetë dhe njeri i vërtetë!

Qoftë bekuar emri Jezus!

Qoftë bekuar Zemra tejet e shenjtë e tij!

Qoftë bekuar Gjaku tejet i shenjtë i tij!

Qoftë bekuar Jezu Krishti në sakramentin tejet të shenjtë të altarit!

Qoftë bekuar Shpirti Shenjt ngushëllues!

Qoftë bekuar e madhërishmja Nëna e Hyjit, Virgjëra Mari!

Qoftë bekuar të Zënët e shenjtë e të panjollë të saj!

Qoftë bekuar të ngriturit e lumtur të saj në qiell!

Qoftë bekuar emri i Zojës, Virgjër dhe Nënë!

Qoftë bekuar Shenjti Jozef, fati tejet i pastër i tij!

Qoftë bekuar Zoti ndër engjëjt e shenjtërit e vet! Amen!

 

Pas kësaj, meshtari e kthen Të Shenjtërueshmin sakrament në Tabernakull. Gjatë kësaj kohe, këndohet një këngë e përshtatshme me të kremten apo kohën liturgjike.